بنەچەو بەگزاڎەکا هۆرامانی
بەشۊ ۋیس و پەنجەمۍ
جافرسان:
(جافرسان کوڕو حەمەسەعیدسانی کوڕو عوسمان سانی کوڕو عەلیمەردان سانی کوڕو حسێن سانی کوڕو دەروېش بەگی کوڕو بارام سانی یەکەمی کوڕو عەباسقولی سانی کوڕو بارام میرزابەگی کوڕو سڵېمان بەگی کوڕو میر سەعیدی کوڕو میر جەلالەدینی کوڕو باریە بەگی کوڕو بەهمەنین) ، ئەڎاش نامېش (فەیروزە خانمە کناچۍ شېخ عەلی عەبابەیلۍ) نە، وەختێ تاتەش کوشیان ئەڎاش پۆشۆ دوەگیانە بېیېنە، دمای شش مانگا جە تەکیەو (دەوڵەتئاوای ڕوانسەر) ی جە ئەڎێ بییەن.
جافرسان، یۊن جە سانە بەنامبانگەکا هۆرامانی، دمای (عەباسقولی سانی و هەسەن سانی) بە یەرەم سانو هۆرامانی مژماریۊ پەی بەتەواناییش، پېسە کەسایەتی هەم پېسە دەسەڵاتی و نامبانگی، ماوەو دەسەڵاتو ئی سانەیە پەڕبېیەن جە قومیا سیاسی و سەربازی و کومەڵایەتیەکا جە ئێرانەنە، پېسە خېزیاو مەشرووتەکا، لەشکرکېشی عوسمانیەکا پەی سەرو ناوچە وەرنیشتەکا ئێرانی، تاکو سەردەمو جەنگی جەهانی دوەمی و هەرەسەو حوکمو قاجاریەکا و پېڎابېیەی دەسەڵاتو پەهلەوی، دلۍ ئا گرد قومیایانە (جافرسان) ۋەراۋەر بە داگیرکەرا مدرامانیش کەردەن، سەرکردایەتی هۆرامیەکا لهونیش کەردەن، جافرسان شش ژەنیش ئاردېنۍ، (36) زاروڵېش بیېنۍ.
وەختێ ساڵەو (1931ز) ئامان پەی دیمو ئێراقی تەنیا (3) یەرۍ تمەنېش کېسەنە بییەن، سەرو مەرزیۆ فڕەشدان ئۆ دیم، فرە شەیداو زۋان و کەلتوور و ڕەسەنی ژیوای کوردەواری بییەن، بە تەرزێ وەختێ (میر عەبدوڵڵای تاماسبی) پەنەش واتەن ئەرۍ فارسی مزانی؟
جافرسان پی شېۋە و بە زوانی هۆرامی جوابش دانۆ (بزانو نەزانو چېشەن، خۊ ئایەتەو قورئانی نېیەن) .جافرسان ساڵەو (1941ز) جە شارو هەڵەبجەی وەفاتش کەردەن، وەسیەتش کەردەن (کەریم بەگ) ی کوڕش کریۊ بە سانو هۆرامانی، جە گوڕستانو عەبابەیلۍ ئەسپەردەکریان.[1]