بنەما بنەڕەتیەکۍ ڕاوڕەچەو یارسانی
بەشۊ سېڼزەهەمۍ
تەمبوور:
تەمبوور، دلۍ سروودە هونەریەکاو یارسانەکانە یاگێ سەنگینەش هەنە، ئاڎۍ سروودەکاشا بەئاوازو سیاچەمانەی، بە تەمبوور سەڎا کەران، تەمبوور ئڼە یاگێ دیارەش هەنە دلېشانە، جەمنشینەکۍ وەرش هۊرزاوە، یۊ یۊ ماچش کەران، فرەو پیا دینییە ئەشناسیێکېشا شاعېر و تەمبوور ژەنۍ بیېنۍ، شېعرەکۍ ۋېشان هەم شېعرۍ دلۍ تێکستە پیروزەکاشان دلۍ جەمخانەینە چەنی تەمبوورژەنەی ۋانێنێ، پەی نموونەی نامۍ ژمارێشان منویسمۍ:
بابا ڕەجەبی لوڕستانی
بابا حاتەمی لوڕستانی
بابا قەیسەری هۆرامی
بابا گەرچکی هۆرامی
بابا سرنجی کەلاتی
دایە تەورێزی هۆرامی
جەلالە خانمی لوڕستانی
ڕېحان خانم، لزا خانمەو جافی، بابا هیندۆی هۆرامی، بابا ناۋسی سەرگەتی، ...هتد) ، بابا ناۋسی سەرگەتی، کە یۊن جە پەنج ڕابەرە گۆرەکا یارسانی سەردەمو ژیوایشەنە، بە یارەکاش واتەنش:
دمای ۋېم جە هەر یاگێنە دەنگو ئی تەمبوورېمە ئاما، ئانە چاگە ڕابەرێ تەرو یارسانی پېڎا بۊن.
[1]