ئاڵفە جاڕە... کوٙگەن و یانێ چیٛش؟!
نویستەی: ئیبراهیم مەیکە عەلی
واچەکۍ جە دوۍ بەشا پېکە ئامێنە:
یوە: ئاڵف... بەماناو لەوەڕی و ئالیکو ئاژەڵی مێ.
دوۍ: جاڕە... پا یاگۍ وچیۊ هەکە ئاڵفەکەش چەنە ڕنیانۆ. پېسەو: جاڕە گەنم، جاڕە شەتڵ، جاڕە تەماکۊ، هەنیچتەر.
وەڵتەر هەکە ژیوای فرە سادە و سەرەتایی بېیەن و ئاژەڵیچ کەم بېیەن، لەوەڕو ئاژەڵەکا کەما و لۊ بېیەن، سەرو ئا بنەڕەتەیە کەشۍ و دارەسانۍ و کوېسانەکۍ هەر دەگێوە، بەشۍ کریێنۍ ملو بنەیانەکاو دەگاکېرە و بە بەشەو هەر یانېوە یام بنەیانېوە وچیان: قەڎەغەو خېڵو فڵانەکەسی، دلۍ قەڎەغەکەیچەنە پایاگا هەکە کەما و لۊشا چەنە بېیەن وچیان: ئاڵفە جاڕە.
بە کوڵیی و پوختەیی، ئاڵفەجاڕە لەوەڕگا یام ئا یاگېنە هەکە کەما و لۊش چەنەن و ساڵانە کەناش پەی لەوەڕو ئاژەڵی و پا هەرمانۍ وچیۊ: لۊ کەنڎەی.
پەوچی پەنەیچش وچیۊ ئاڵفە جاڕە، چوون جاڕەو ئا گیواوانە هەکە کریا بە ئاڵف پەی ئاژەڵی.
سەرنجە: ۋەرو ئانەیە ئی باسمە ئیسە وەڵاو کەردۆ، چوون ئیسە هەکە ئینایمۍ دمادمای مانگەو چېڵکڕینەو سەرەتاو مانگەو کۊپڕینە، وەختو ئاڵف درونای و لۊ و کەما کەندەین، بەتایبەت جە کوېسانەکاو هۆرامانینە.[1]