بەپاو هەواڵێ یاوان دەسما، ئایېرەکەو قەڵاو مێرۆتمانی و وېرانێ , دماو ئانەی زەرەرێ فرەش وستەن ژیوگە، گېیاندارەکا و دارستانەکا، کۊشېیانۆ.
دیارا بەپاو واتەکا، نەفەرێ خەڵکوو کەیمنەی، شېخەڵش سۊچنان و ئایېرەکە دەسشەنە پەرەشېیەن، جە کونترۆڵی بەر شېیەن.
داوا مەکەرمۍ جە ئایېرکەردەیۆ پەی سوچنانی شېخەڵ و گژو گیواوی وشکی، بە بەهانی پاک ڪەردەیۆ باخەکاتا، دووری گېردۍ.
ئەرکوو پارېزنای ژیوگای و دارستانەکا، شەرعەن و ئەخلاقەن و عورفەن، ئینا سەرو شانەو گردیماوە.
ویرێ چانەی کەردېوە، سمورێوە، کیسەڵێ، باڵدارێ هیلیانەکۍ، یام بەچەکېشا سۊچا!
ئایا ئا کەسە ئایېرەکەش وستەنۆ ڕەحەت سەرمنیۊ سەرو سەرنگای و موسۊ؟
تەمەڼا ڪەرمۍ ئی کارەساتۍ با دوبارە نەباوە.[1]