بە خووگیشا وات ڕۊنە بەرمەگنی، ماچۊ: وەرو هەرمانەکا شەوېم
خووگ گېیاندارێ زەرەر دەرەن، نېرەو خووگی(یەکانە) دوۍ شاخۍ تیژۍ ئینێ سەرەشۆ، فرەو وەختی شەوېنە بەرمەگنۊ، بە نېیازو ئېستەیۆ خوراکۍ، بنەو دارەکا و دلۍ باخەکا و کېیارەکا بە شاخەکاش کاڵۊ، زەرەر مڎۊ خاوەن باخەکا، بەڵام بەرکۆتەو ڕۊیش کەمەن.
بڕێ خەڵکېچ هەنۍ چېرەنە هەرمانۍ گەڼۍ کەران، یان شەوېنە دزی دلۍ باخ و کېیارەو خەڵکینە کەران، ڕۊنە تېکەڵی خەڵکی نمەکەران، دلۍ چایخانە و کۊنیشتو پیا ماقووڵانە نمەپېویان، چوونکوم بڕواشان بە وېشان نېیەنە، ڕوەشا نېیەنە بڎیانە مېیاچەماو خەڵکی، پەوکەی گمېنۍ.
ئانە کریان بە ئیدیۆمێ، یانی ئا هەرمانە قۊڕۍ کە خووگ شەوېنە کەرۊشا، پېسەنۍ ئا هەرمانا کە بڕێ جە کەسەکا کەراشان، پەوکەی ڕەفتارشان وېناکریان بە ڕەفتارو خووگا.[1]