ترێیان دەخوات و درۆیان دەکات.
پێشوان دەڵێن: لە یەکێک لە گوندەکانی کوردستان، بێوەژنێکی گەنجی جوان هەبوو، ڕەزێکی ترێی هەبوو، بژێوی لەسەر ئەو ڕەزە بوو، بۆ هەموو مێوەکان کەپری کردبوو، ڕۆژێک دەچێتە ناو ڕەز، دەبینێ کابرایەک چووەتە سەر کەپرێک و بە ئارەزووی خۆی ترێ دەخوات، کام هێشووەی جوانە لێیدەکاتەوە، بێوەژنیش دەست بە قسەی بەرز و نزم دەکات و هاوار لە کابرا دەکات کە بێتەخوار، کابراش دەڵێت: ئەوە شەرم ناکەی قسەی وا بەمن دەڵێی، خۆمن یەک دوو هێشووم خواردووە، زۆر تووڕەم کەیت بێمەخوار سوارت دەبم! ئەوە کابرا لەسەر کەپرەکە بەردەوام ترێ دەخوات، بێوەژنەکەش قسەکەی پێخۆش دەبیت، دەڵێت: ترێیان دەخوات و درۆیان دەکات. [1]