تیکەی زل دەمیچ دڕۊو قنگەیچ دڕۊ
مروڤ هەروەخت جە ژیوای سرووشتی وېش زیارەو ئا مەرزەشە بەزنا، ئیتر مەگنۊنە دلۍ واقیعێ تازەی کە چەنی فیترەتو ئینسانی ناسازەن، مەگنۊ سەرو بارێ کە هەر دەم ئەشۊ چەمەڕایی قومیای کەرۊن. ئی ئیدیۆمۍ تالېقێنە پەی ئا کەسا کە چا بەرگە سرووشتیەو وېشانە مزیارەو گەرەکشانە بە هەنگامێ بېیاوان پا ئامانجاشا هەکە دلۍ مەژگیشانە نەخششان پەی کېشتېنۍ، کە یاوای بە هەر ئامانجێ مەشۊم بە پلە بەڼیی بۊن و بە تەرزێ سرووشتی هەرمانەش سەر بکریۊ. پەی نموونەی بڕێ کەسۍ هەنۍ پەی یاوای بە سەروەت وسامانێ فرەی ڕای ڕاسەو سرووشتیە نمەگېران، بەڵکوم بە هەنگامۍ گۆری کەرەکشان ڕاکېشان بڕان، بەڵام ئیتر یاساکۍ سرووشتی ئەچامنېنۍ گەر ترازیای چەنەشا، مەگنینە کەڼێ قووڵو ئانەی کە هەنیچت جە دەسش مڎەی، ئیتر ئانەن گەر مروڤ تەماحەش فرۍ بېیە، پەلامارەو فرەیش دا، مەشۊم باجەکەیچش گۆرە بۊن.[1]