داستانو حەیاتۍ و قاسمی
بەشۊ: دەهەمۍ
قاسم و حەیاتە تازە لوێبێنێ دلێ هۆدەکەی، جە عالەموو وېشانە بێنێ و ئاگاشا بەری نەبۍ. جە پڕێوەنە قاسم دەنگو سەعەیش ئەژناساوە! دڵچرکېوەش پەی ئاما.ویرێش کەردېوە.
سەعە ئارۊ دماو نیمەرۆی دیارش نەبۍ و ئیسە چی ئامان پەی ئێگەیە؟
وېش نەگرت و هۆرسۆ، دلێ دەلاقەو هۆدەکەیەنە دیارە وار. سەعە چەنی کابراکەی داڵانەکەنە قسێ کەرېنێ. کوچېو پەشۆکیا و دیا حەیاتێرە. هەردوێ هۆدەکەنە ئامێ بەر بزانا چېش بېیەن.
چاوەختەنە بەرەکەشا کەردۆ، کابرای ڕیش چەرمە چەنی سەعەی، پلەکانەکارە ئامێ سەر.
سەر و سیماو کابراکەی نوورانی دێ چەمۆ، ڕیشە چەرمەکەش و چەمە سیاوەکېش فرە بە یۆی وەرێنێ و ڕۊخسارش فرە مێهرەبان دیار بێ.
کەوا و پانتۊڵۍوی کەوەی ئاسمانی، چەنی گجیێوی چەرمەی شەکەریش پۊرە بێنێ. فەقیانە چەرمەکېش هۊر دایبێنێوە و مەچەکە پەڕ جە موەکېش دیارێ بێنێ. ساکە سوورە چەرمیەکەو دەسیش چەنی جلەکاش و ڕیشەکەێش، گرد جارێوەنە هەیبەتێوی تایبەتاشا پەنە بەخشابێ.
ئی کابرا ئۊسا ئۆرەحمانی دەلاک بۍ کە دوێ یەرێ ساڵێ جارێو سەرو نسارەی دێ و خەتەنەو زارۆڵا کەرۍ.
قاسم وەختێو چەمش پەنە کۆت، ئەژاناساشۆ، گردو لاشەیش کۆت لەرزای، ڕەنگەش چەنە نەمەنە، وەختێو تەماشەو کیفە سوورەکەو دەسیش کەردش، کافرمانە تیژەکش ئاماوە ویر،
حەیاتە لاشەنە مدرێبێرە و سەرسامە بیێبێ و نەزانێ مەسەلێ چېشەنە، ئەڎا و تاتەو قاسمی، یاسێ و هەیاس هەردوێ یاگێ وېشانە وشکێ بیێ. یاسێ ئانندە حالش تێک شی، نەتاوێ سەرو پەیاوە وېش گیڕۆ، هەنگامێوەش نیاوە دما و پاڵش دا دیوارەکەو وەرهەیوانەکەیۆ.
ئۊسا ئۆرەحمان، بە ڕوەێوەی وەشۆ سڵام و ئەحوالپەرسیێوی گەرمش چەنی گردی کەرد. ڕوەش کەردەنە قاسمی و واتش:
ڕۆڵە قاسم ئینە تۆنی، ماشەڵڵا چن گۆرە بېیەنی، خۊ بېیەنی پېیێوی حەسابی. عەمر درێژ بی یاخوڎا. سەعەی وات ماچۊ زەماوندەش کەردێنە یاخوڎا مەبارەکەتبۊ. وەخت فرە زوو ویەرۆ، بخوڎا هەر ئەجۊم هیزی بێ، چیروو دەسیمەنە بەرشېیەی. هاهاهاهاها، چا وەختۆ تاکو ئیسە دە ساڵێو لوان. دەی خۊ ئی ماوە، ئەجیانم هەرمانەکۍت پەی کریان. من وەڵتەر فرە جارێ ئامانا ئێگە، دەی چی نامانی لام و وېت نەجات دەی؟ ئەرۍ هەیاس چی ئی کوڕتا تاکو ئیسە هەرپاسە ئاستەنۆ؟ وەڵڵا من چی ڕوانە سەعە ئاما دووکانوو وېما پەی سەرە تاشتەی، پەرسێوەش چەنە کەردا، خۊ ئانا وێچش شاهێدا و پەرساش:
ئەرۍ ئۊسا ئۆرەحمان ئاخر جارەکە قاسم کوڕەکەو هەیاسی چیروو دەساتەنە بەرشی و وەرهەیوانەکەشانە پڕارە وار، ئاقیبەت ئا ڕوە، تۊ هەرمانەکېت پەی تەمامنا؟
منیچ واتم ناوەڵڵا من وېم ڕوو سېیاو و خوڎای مەکەروو و دروێچ مەدەو. ئا ڕوە من هیچم پەی نەکەرد. کوڕەکە هینوو ئانەیە نەبۍ کە دەسش پەی بەری، فرە حاڵش خراب بێ.
ئیسەیچ دێر نەبېیەن کوڕو من. سەعە پی کاریشە خەیرێوە گۆرێ نەسیبەش بېیېنە. ئەر ئاد نەبېیێ، هەرمانە جە کاری ترازیابێ و خوڎا نەخاسە، گردیما تووشوو گوناحێوی گۆرەی بێنمێ.
ئینە سوننەتوو پێغەمریا سەلەڵڵاهوو عەلەیهی وەسەلەم، گرد موسڵمانێو وەڵێ ژەن ئاردەیش مشیۊ کەرۊش. ئیسە من هەر ئۍ شەو مشیۊ گېڵوۆ، کاروو خێری هەرچی زووتەر کریۆ دێرا.
حەیاتە بە ئەژنیەی قسەکا ئۊسا ئۆرەحمانی، تووشوو شۆکی بیێبێ و نەزانێ خوۊ یا گرەوۆ! هەناسێوش هۆرکېشت و تۆزێوتەر نزیکەو قاسمی کۆتۆ. دەسێش نیێنە دلێ دەساش و تەماشێو ڕەنگە پڕاکێ قاسمیش کەردە.
قاسە گېیان هەردوێ چەمەکێم، مەتەرسە من ئینانێ لاتەنە،
یاسێ وەختێو دیێ ڕوخساروو چەرمەو کوڕەکەیشەرە، وەخت بۍ جە حاڵوو وېش بلۆ بەر. بە دەنگێ گیریېوە بە بۍ ئانەیە سەرە بەرز کەرۊوە و تەماشەو ئوسا ئۆرەحمانی کەرۊ، واتش:
ئۊسا ئۆرەحمان گېیان تۊ یاگێ تاتەیمەنی. زەحمەتت کېشتەن تاکو ئێگە ئامانی. من و هەیاس وادەت پەنە مدەیمێ وەڵێ ئانەیەنە ئی کوڕما دەس بەرۆ پەی ژەنەکېش، بەرمێش پەی بیمارستانیێوی و عەمەلیاتش پەی کەرمۍ!چوونکە ئیسە پا وەزعێوە کە وینیش ئامادەو ئا کاریە نیا.
ئۊسا ئۆرەحمان دیا یاسێرە و فرە بە مێهرەبانیۆ واتش:
ئەدالەکێم من مزانوو تۊ ورکەو چېشیتا، هیچ خەمت نەبۊ، من زیاتەر جە پەنجا ساڵێن ئینە کارما، فرە کەسێم نەجات دێنێ کە جە قاسمی گۆرەتەرێ بېیېنۍ، هەر ئا کارە کە جە بیمارستانوو شارېونە کریۆ، من بە تەجرەبێوی خاستەر چادیشا، کەرووش. نامۍ خوڎای بەرمێ و هەر ئیسە تاکو دێرش نەکەردەن هەرمانەکۍش پەی کەرمۍ، ئیشەڵڵا هیچ مەبۊ و بە خێر ملۆ وەرۆ.
قاسم ئیتر زاناش ئی جارە ڕاو بەرشېیەیش نېیەنە، هەتا ئێ فرەتەر دەسێش دلێ دەساو حەیاتێنە لەرزێنێ. دیا دلێ چەما حەیاتێرە، پەرۍ بێنێ جە ئەشق وەشەویسی. پەی ساتێوی کوڵی هەسش کەرد کە شۆقوو ئەشقوو دلێ چەما حەیاتێ، تێژی کافرمانەکەیش خیاڵۍشەنە لا بەرد.
پەی چن ساتێوی کوڵی گرد ماتشا کەرد. ئۊسا ئۆرەحمان دیا دلێ وەرهەیوانەکەیەرە، چەمېش لوێ سەرو تەنەکە ڕوەنێوی کە گۊشێوەنە نریابێرە. ئیشارېوش کەرد ئۆ سەعەی و چفناش گۊششەرە تاکو تەنەکەکەی بەرۆ دلێ ئا هۆدەیە کە پەی وەیوێ و زەمای حازر کریابێ و دۊشەکڵېوش بنیۆ سەرۆ.
سەعە بە بۍ ماتڵی تەنەکەش هۊر گرت و لوا دلێ، ئۊسا ئۆرەحمان تەماشێو قاسمیش کەرد و دەسش نېیا سەرو کیفە سوورەکەیشۆ و ملېوش چەرخنا ڕوەو هۆدەکەی.
ڕەزا بەهمەنی.[1]