هەری مەینەتی
بەشۍ: ششەمە (دما بەش)
مایجانە بە دیەی دووبارەو کۆپان لاری شاذی و شۆقێو کە جە گۆرەکەکەیش گرتە بێ، فەرامۆش کەردو بە هیچ شێوێو حەز نەکەرۍ کە جارێوتەر ئا وەزعێ ۋېیەردەیە، پەیش گېڵۆوە دماوە.
هۆڵش دا کە وېش گېرۆ و بەرەکەی نەکەرۊوە، بەڵام تەقەو دەربازەکەی دوبارە کریاوە. ئی جارە سابیر وەختێو ئەذاش دیەش کە تۆزێو پەشۆکیێنە، ئاما بەر جە وەرهەیوانەکەنە تەماشەو واریش کەرد. بە دەنگی بەرز چڕیش ئۆ ئەذێش و واتش؛ ئەذا گېیان بیە!کۆپان لاری ئامانۆ! گردو زارۆڵەکا وەختێو ئینەشا ئەژنەوی، چېرو لێفیەنە بەر ئامێ و چەنی سابیری بە بۍ ئانەیە جە ئەذێشا پەرسو و جۆوێو کەرا ئامێرە وار.
بەرەو دەربازەکەێشا کەردۆ، کۆپان لاری ئەرامەنذە وېش کەرد دەربازەکەرە. بە حاڵ تاوێنی بژناسیشۆ، لەمەش باریکە بیێبێوە و دانە بە دانەو پەراسوەکاش ئەژمارێێنێ. سەرو مازیش یاگێ زەخمە کۆنەکا بەر کۆتێ بێنێ. سەرو سمتێش یاگێ گۆچەوەنا و نەقیزا، دیارە بێ. بە حاڵ تاوێ چەمۍش هۊر بڕنۆ. برژانگێ چەرمێش تەپێ بێنێ ملو چەماشەرە، هەڵسەو چەماش سەرو قەپۆسێشەرە جوېوەشا وەشە کەردێبێ. قاچش بریندار بیەبێ و ونی تازێش چەنە لوێ. ئینە ئانەیە نیشآنە دێ کە وەختێو زارۆڵا تار نیان، یاگێوەنە کۆتەنەرە، هەم قاچش و هەم چیرو لەمێش بریندار بېیەن.
زارۆڵەکا دۆر دابێ، مایجانە گیرش واردە بۍ و نەزانێ چېش کەرۊ و چېش واچۆ.
کۆپان لار پا وەزعێوە نەتاوێ وېش گېرۆ سەرو پەیاوە. دۆرو وېشەنە خۆلیاوە و وتەرە. سەرەش نېیا سەرو یۊ جە پلەکانەکاوە. بە حەسرەتێوۆ تەماشەو دانە بە دانەو زارۆڵەکاش کەرد. چەمۍوش هۊر وس پەی لا مایجانێ بەڵام فرە زوو سەرەش هۆرگېڵناوە وەنەش. دیار بۍ دڵش پەڕ بۍ جە کارەساتو (25) ساڵەو ژیوایش چەنی خانەوادەکەیش. هەناسێوی قوڵش هۆرکېشت و ڕازېوەش پەی زارۆڵەکا، پی جۊرە، دەس پەنە کەردە.
یۆ بۍ یۊ نەبۍ، بېژگەم خوای هیچ کەس نەبۍ:
ساڵیانېوی درێژ چېوەڵتەر، دەگێوە گۆلانێ بۍ بە نامۍ گۆڵ ئاوای. ئی دەگا خنجیلانێ دلێ دەشتێوێ پەڕ جە سۊزەڵانېیەنە بێ، کە هەرتا چەم هەرمانە کەرۍ هەر دەشتە بۍ بە بۍ هیچ دار و درەختېو.
خەڵکو گۆڵ ئاوای چەنی یەکتری فرە مێهرەبانێ بێنێ، فرە مێمان دۆسێ بێنێ، هەرمانە و کاسبیشا حەیوان داری و کەشاوەرزی بێ. هەر و ماهەرۍ هەم جنسو من چا دەگێنە فرێ بێنێ. یانەو ئېمە دلێڕاسەو گۆڵ ئاوایەنە بی. یانېوی هەڕین بۍ کە چوار پەنج هۆذێش چەنە بێنێ. من تاتەم نەذیەنم، ئەذام ۋاچۍ بە جوانی چۆذارا بەردەن. نەزانێنێ چۆذار یانی چېش!ڕوێو پەرسام ئۆ ئەذێم، ئەرۍ ئەذا گېیان چۆذارێ چېشێنێ و کېنۍ و چکۆوە مەیا؟!ئەذام جە جوابەکەشەنە واتش؛ ڕۊڵە گېیان چۆذارێ خەڵکو ئی لاو ئۆ لایەنێ، کە جار جاریچ ڕاشا گنۆ ئی دەگاو ئېمەیچە، کۆڕەکاما بەرا و کناچەکاما مازاوە!
ئیتر من چا ڕوۆ کە ئەڎێم باسو چۆڎاراش کەردە بێ، چەنەشا تەرسێنێ. عاقیبەت ئا ڕوە سیاوە ئاما وەرۆ. چوار پەنج نەفەرێ، هەر یۊ بە گۆچانێوۆ ئامێبێنێ پەی گۆڵ ئاوای، جل و بەرگەکەشا چەنی خەڵکو گۆڵ ئاوای فەرق کەرۍ.
ئامێ ڕوەو یانەو ئېمە، من حەیبەتیێنە وېم دابێ پاڵو ئەذێم، خوا خوڎام بۍ نەوینام، ئاخر من فرە زارۆڵە بێنێ، ساڵێو چن مانگێ زیاتەرم نەبۍ. هەڵای شۊتە شیرین و چەربەکەو ئەذێم، جار جار وەرێنێ. چا وەختەنە فرە کەم حەزم جە گیواو واردەی بێ.
وەختێو ئامێ تەماشەو منشا کەرد، یۊ جە چۆذارەکا چەنی کێخوا مەحموذی ساحێبێما کۆت قسە کەردەی. دڵم کۆتەرە، ئەڎام لامەنە بێ، دەسو پاش لەرزێ.
کۆپان لار وەختو ئەوەگېڵناو ڕازەکێ چن جارێ دڵش پەڕ بی، هەناسێوش هۆرکېشا و دەسش کەردۆ بە ئەوەگېڵنای ڕازەکێ.
بەڵۍ، کۊرپە ئازیزەکام، پا جۊرە من چۆذارا جە ئەذێم جیا کەرداوە، هەر ئا ڕوە، وساشآ دلێ جەمېوی فرە جە هەمجنسا وېم.
دوێ شەوانە ڕوێ ڕانە بێنمێ تاکو یاونانېشا دلێ ئی دەگاو شمە. تەنیا ئانذە ڕەحمشا پەنە کەردا کە ڕاکێنە سوارێم نەبېیێ چوونکە زانێنێ کە فرە زارۆڵەنا. پا جۊرە ژیوای تازەم چېگە، لا مامۊ بارامی تاتەیتاوە دەس پەنە کەرد. مامۊ بارام بە ڕەحمەتبۊ فرە عال بۍ چەنیم. ویرما تاکو یەرێ مانگێچ کۆپانەش پەی نەوراستا، هەمیشە ۋاچۍ زارۆڵەن!جارێو زووشا!
وەختێو ئەوەڵ جار کۆپانەشا کەردا، تاکو چن ڕوێ مازیم فرە وریێ، فرە گۊل بێ، نەزانێنێ چېش کەرو. چا وەختۆ کە کۆپانەشا کەردا، ئیتر خزمەتو من بە یانەو شمە دەسش پەنە کەرد. چی ماوە دوور و درێژەنە، فرە جارێ توشوو کارەساتا بېیەنا. جارێوشا مڵکەنە، شەوۍوە وەرگا دانێ وەنە، وەخت بۍ بوەرام، ڕانێوم کەڵبەڵاشا کەرد. فرە چېوێ تەرێم وەنە قۆمیێ، چا دۆرانەنە، کە ئیسە ویرێم نېیەنێ. مامۊ بارم فرە ئاگاش چەنەم بێ. تاکو ئیسە ویرمەنە نېیا کە ئەر پەی یەک جاریچ بیەبۆ، بارێوی قۆرسش نیابو وەنە. بەڵام جار جار هامسا مڵکەکێما بەرێنێم، ڕەحمم پەنە نەکەرۍنێ، جارێوشا یۊ جە کۆڕەکا مامۊ خەفاری یارۆ بەذجنسەکەشآ مەزانۇ نامۍش چېش بێ، بەرداش بارە هەنارېوی فرە قۆرسش نیانێ وەنە. وەختێو یاوایمێ دەرەو ویکۊڵە لاری، زاتم نەبۍ دەو دلێ ئاوەکێ، پەشتیۆ لەقێوەش دانێ وەنە، کۆتانە دلێ جوەو دەرەکەی، وەرێسەکێ گیریانە ملم، وەخت بۍ خنیکیەو، زیاتەر جە سەعاتێوی چا دەرەنە بێنێ، تاکو مامۊ بارام ئاما و نەجاتش دانێ.
بەڵۍ، ئازیزەکام، بە سەرئامێ فرێنێ کە پەیتا گېڵنوۆ، بەڵام چېوێو کە هەتا ئیسەیچ هەر وەرمش پۆ وینو، ئانەنە کە من تاکو ئیسە جنسی مۆخالفو ویم نەذیەنم. تاکو ئیسە مەزانۇ ماهەرە چەنینەنە سەرو شێوەش چەنینا.
ساڵێوشا قەرەچیێ ئامێبێنی پەی ئی دەگاو ئېمە. جە مڵکەکەو مامۊ خەفاریەنە بارشا وسە بێ. وەڵێ ئانەیەنە ئاذێ بارەکەیشا وزا، من بوێوە وەشەم ئەژنەویە کە تاکو ئیسە تەجرەبەو ئا بوېمە نەکەردەبۍ. وەڵتەر جە زارۆڵام ئەژنەویەبێ کە قەرارا قەرەچێێ بەیا و چن ڕوێو چېگە مەناوە. بوەکێ هەرتا ئێ زیاتەر مەسم کەرۍ، تاکو نیمەروانێو کە دۆرم چۆڵ بێ، وېم نەگرت و تەنافەکێم پڕچنا. لوانێ ڕوەو مڵکەکەو مامۊ خەفاری، شۆنەو بوە وەشەکێرە. هەر ئانذە دنیام دی، شش نەفەرێم وەنە پێڎێ بیێ، ئێڼەشا دانێ وەنە کە کۊڵەوارشا کەردا. بە بۍ ئانەیە هیچم کەردەبۆ، جە دووریچۆ ڕەنگەو ماهەرەکێم نەذیە. فرە گلیێم هەنێ چی خەڵکیە، وەختێو ویرشا کەروۆ خەریکا دڵم تەقۊوە.
کۆپان لار، جە ئاخرو ڕازەگرفتنە، گەرماو دلێ داڵانەکەی، کە دوە مانگێو بۍ گەرمای چامنەشە نەذیەبێ، چەنی گلېرۊ بېیەی زارۆڵەکا پاڵشەنە، کەم کەم وەرمش کۆت پۊرە، وەرمېوی فرە قۆرس، وەرمێو پەی هەمیشەی!
مایجانە زاناش کە کۆپان لار وەرمەکەش فرە قوڵا، نەما دەسو زارۆڵەکا و بەرڎۍشۆ سەر. سابیرش چەنی وېش ئاردەراوە وار، بەردش دلێ کاذانەکەی، خەڵوزێوش دا دەسشۆ و واتش ئادەی کۆڕەکەم جە پاڵو ئا نەقاشیەنە، تۆیچ کۆپان لاری هەر پېسە وېش سەرو ئا دیواریۆ، نەقاشی کەرە.
ڕەزا بەهمەنی.[1]