ناوی هۆنراوە: کتێبی کۆچ
نووسەر: #حەمە ئەحمەد جاف#
لە سەمای مەرگی ئێوەدا...
کتێبی کۆچيک ئەخوێنمەوە
کۆچی مێژووی نیشتمانێک
ڕۆچۆتە هزر و خوێنمەوە
***
عومری عشق و خەندەی لێوتم
بە فرمێسکی چاو سپاردووە
نوسخەیەک لە (کتێبی کۆچ)تم
بۆ ئەرشیفی ئاو ناردووە
****
کتێبێک پڕ لە ئەشکی ئێوە و...
سەمای مەرگ و ماڵئاوایی
کۆچی تراژیدی بەهار و...
لایلایەی دایکی ئاوایی
****
کتێبێک لە ڕەشبەڵەکی ئاو
شەڕی شەپۆل و ڕەشەبا
لە بەلەمێکدا ڕێ ئەکەم
نازانم بەرەو کوێم ئەبا؟
****
ڕەوتی لەرزۆکی کەشتییەک
لە پێچی باو گێژەنی ئاو
لە کەناری دابڕانەوە...
هەرئەڕوا و ناگاتە هەتاو
****
لەگەڵ ڕەوتی کۆچتا.. ئەسرین
بەسەر تەوێڵما دائەکەی!
تۆ لە ئامێزما گەورەبووی،
بۆ لە سێبەرم ڕائەکەی؟
****
وەرەو ئێستا لە خەڵوەتی
خەمی خاک و خوێن مەترسە
هەواڵی مەرگی (ئایلان) و،
کەنار لە (ئیجە) بپرسە!
****
وەرەو بەسەر فەرشی سووری
یەختی دەریای دڵما بڕۆ
چیتر. مەکولێنەوە زامی
نیشتمانی ئازار و سۆ!؟
****
تووڕەیی شەپۆلی ئیجە و...
کتێبی کۆچی کەشتی خنکاو
هەواڵی شەوانی کەنار...
نادەنە دەست پەیکی هەتاو
****
خەون و خۆزگە و ئاواتی تۆ
لەگەڵ ئەشکا سەرهەڵئەگرن
گەر ئیجەش نەیانخنکێنێ..
لە گۆشەی غوربەتا ئەمرن!
****
چوارفەسڵە، باخت پڕگوڵە
سەیرە گوڵی وێت پێ جوانە!
پێشینان ڕاستییان فەرمووە:
گوڵ و گڵی دوور دەرمانە!
****
کانی وجۆگە و بەراوی خۆت
مەدە دەریای شەرابی وی!
بەسەر شەپۆلی ئیجەدا...
مەکەوە دوای سەرابی وی!؟
****
بێمروەت مەبە لە ئاستی
نیشتمانی شام شەکری دڵ
ئاسوودەمەبە. بەوەرزی،..
وەرینی گەڵا و مەرگی گوڵ
****
ڕەوتی لەرزۆکی کەشتییەک
لە پێچی باو گێژەنی ئاو
لە کەناری دابڕانەوە...
هەر ئەڕوا و ناگاتە هەتاو
****
بەسەر پشتی شەپۆلەوە
هاتین تا ئاو بخنکێنین!
لە وڵاتی سێبەرەوە...
هاتین تا هەتاو بچێنین!
***
کانوونی دووەمی 2016
هەولێر
ئەم شيعرە لە رۆژنامەى هەولێر ڕۆژی #11-02-2016# بڵاوکراوەتەوه [1]
=KTML_Bold=ئەم بابەتە بە ڕینووسی سەرچاوەی ئاماژەپێکراو نووسراوە کوردیپێدیا بەهیچ شێوازێک دەستکاری نەکردووە=KTML_End=