یاڎەوەریەکېم
بەشو: نۊهەمی
خیابان، کناچێوە سەرەڕووتە و پاک و پوختە دێ چەموە. ھیزی شەوێ واران عال شۆرتەبێشوە و ڤژێش ھیشتای سیا و چەرمە ئەرمانێنە. کافە ئەرغەواننە، ئەدەبیات و شێعرە، دەمەتەقێ چەنی ھەڤاڵان کەلاوێ کەرێنە. بەریچوە خەڵک وەرمەلانیش کەوتەبێنە و حەریۆ پەی وێش ڕەمای ڕەمێنە، دڎانێم سەروو وێشاوە بە بێ دەرمان واردەیە، خوای خوێنێ! ڕێک، قەتاریێ و جەستەی چەرمە و خەندەران دیانێ وێمەرە، قۆز و پووششێوە سیاو بەڵام کەمێوە تازیەبار ئەرمانێنێ. زەردەخەنێوە کەم و تا کەسرێوەم ئاستەرە. پیاڵەئێسپێرسۆەکەم نیا سەرەموە، کوچالێوەش بنەوانوو فنجانە خرپۆڵەکەینە منوە و پەی پێخۆرێوەتەریم ئاستەوە. جە بەینوو پێخۆرەکەینە قسێ ئەینێ و لوێنێ. چەمێوەیچما خیابانەکەو بەھارانیوە بێنە کە جە دوودەریی کافەکەیوە دیاربێ. دەموو قساوە تاڵیی و شیرینیی، دەممانە مەتەلا کەرێنە. قسێو ئەی و قسێوەتەری بەرکەرێنە و وزێشنە خیابان. پەنجەرەو کافەکەینە، چوارڕایێوە بە چن چراوێ زەرد و سوورێ ڕانمایی ماشینەکا کەرێنێ کە گوزەرشان گنێنە ئی مەحاڵە. گجارێو سەبر و ئوقرەشان، زێھنییمان چڵاکنێرە. شێعرە و باسوو ئەدەبیاتوو گۆرانی پڕچنێنێ و وزێنێشنە گۆمەو ئەوەشێویاو جبەری. سەوقاتیی و داواکارییەکەمان مجیارە سەرووخوانیمان، ئسپرسۆیە و، لەتە یە و چایێوە تاڵ، چەنی کەیکێوە ڕازیاوە؛ ئەجێ بە دەسوو کناچێوە وەش سەلێقێ پچیان، ھەڵمیش تا بناروو گۆشامان لوێنە. تام و مەززەش و بوەوبەرامەش جە کتێبێوە ئەوەنەونیای و قسری شێنە، تاڵ شیرین و بەستەنی ئاسای ھامنی سوورەنە. ئەی حەزرەتوو مەولەوی نمەفەرماوۆنە:
رۆشەنی دیڎەم، سەرمایەی ژینم
مەززەی بەزم کەیف دڵەی خەمینم
ساکە من بێ تۆ نەسپەردم ئەروا
سەرنەنیام نەسای ئەڵحەڎ بێ پەروا.
کەلیمێ دەم و دڎانمانە شیرینتەر جە چکلیتەکەی و شەکەرەکەی گنێنێرەواری. ڕاوڕاداری نەڎێنێ. باس چەنی باسیی گژیای گژیێ و کەلیمێ چەنی کەلیما. ماڵئاوائیمان دما قسێما نەپڕچناش. جبەر جە کافە ئەرغەوانی و چن ھەنگامێ دوورتەر جە بناروو تاڵیی و شیرینییەکەی، ئەدەبیات فرەتەر گڕەش گرتێبێنە و دوور جە گیانیشان کەلیمێچ سۆچیای سۆچیێنێ.
بورهان ئەختەر[1]
کوردیپێدیا بەرپرس نییە لە ناوەڕۆکی ئەم تۆمارە و خاوەنەکەی لێی بەرپرسیارە. کوردیپێدیا بە مەبەستی ئەرشیڤکردن تۆماری کردووە.
ئەم بابەتە بەزمانی (هەورامی) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
ئی بابەتۍ بە زۋانی (هەورامی) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
ی کلیک کەرە!
ئەم بابەتە 156 جار بینراوە
ڕای خۆت دەربارەی ئەم بابەتە بنووسە!