قەڎرو تەڵای ئینا لاو تەڵاچیۆ و قەڎرو چای لاو کەسی مانیایۆ
ویرما یانەو مامو حەمەی و لالۊ سەلیمی سەرەچېر بېنۍ، کەمتەر ئەینېوە وەزەنۍ، مەگەر بەسەردای ساڵێو یان دوۍ ساڵۍ جارێ کاک حامېڎ کە ئەشیێ بەشە باخەکاو ئاڎییشایچو باخەکەو وېچش وەی کەردێ، پاڵیچشەنە قېخایی دەگێچش کەردێ. وەرۋېڕکیچش تەنیا کاک عەزیز بۍ، کاک ئیبراهیم کە سنوو ساڵش هیشتا جە منیچ گولانەتەر بۍ. جارجار ئەر کەسێو
پیسەو کاک حاملەی (حاجی حامېڎی) سەرە وەرېسێوەش پەی گېرتەبیێ، ئەگینا باقی هەرمانە قورسەکا زیاتەر کاک حامېڎ وېش بۍ. دەمێو کەلارا بۍ، دەمێو هانە نەسرین، دەمێویچ هانەۋیڵەو هەمزەکور دەرەو هارەگلی بۍ.
گېڵناوە: ئا گرد هەنارو هەنجیرو هەنگورو میوەجاتە وەرو دەسیشەنە بۍ، خوڎا نەکەرۊ دەسش بەردەبیێ پەی هەنجیرېوی، بەڵام حەتا خوڎا حەزکەرۊ حەزش جە چای دیژلەمەی بۍ. بە هەمان دەسور ئەڎای ڕەحمەتیەچم فرە زەحمەت کېشە بۍ، فرە حەزش جە چای دیژلەمەی بۍ. چایێ کە ئەشیێ قوڵش نەڎابیێ. ئەر فرە مانیێ بیێ ئیحتیاجش بە وەنۆزېوەی کوڵۍ بیێ، قۊریەکۍ نیۍ قەراخو ئێرەکەی و واچېما پەنە حەر قوریەکۍ خوا یانی (حەر بڵقو چای لولۍ قوریەکېنە ئاما)، هایم کەردێ. جارجار کاک حامېڎ ئەر پەی ئاو هورکەردەی بیێ یام جوو هورماڵای وەیام بە حوکمو قۆمی (کە چەنی ئەڎێم لالوزێ و مەتیەزێ بېنۍ)، لادۍ لاماو چەنی وەشی و تشی گەرمی، پېوەرە دیژلەمېو نۊش کەرېنۍ.
ڕوحشا شاڎ و یاڎشا بەخێر، خوڎای گۆرە هەردوۍ عەفوە کەرۊ، ماواشا بەهەشت بۊ ئینشەڵڵا.
فاروق سان ئەحمەد.[1]