ناونیشانی بابەت: ئەو هۆکارانەی وامان لێ دەکەن پەنا بەرین بۆ نەشتەرگەری لابردنی منداڵدان چین؟
ناوی نووسەر: د. #کەژان کاوە تەها#
دەتوانین بڵێین ئەم نەشتەرگەرییە کۆتا هەڵبژاردەیە لە ڕێگاکانی چارەسەرکردنی کێشەکانی منداڵدان و لای بەشێک لە خانمانیش دەبێتە هۆی بێتاقەتی یاخود ترس بەڵام لەم حاڵەتانەی کە لە خوارەوە باسمان کردووە ئەنجامدانی نەشتەرگەییەکە زۆر گرنگە لەپێناو سەلامەتی خانمەکە:
1- بوونی گرێی منداڵدان لەجۆری Fibroid کە ئەم گرێیانە زۆرینەی کات پاکن واتە گرێی شێرپەنجەیی نین بەڵام لەوانەیە ببنە هۆی ئازار یان خوێنێکی زۆر لەکاتی سوڕی مانگانە.
2- هەندێک جار بەهۆی ڕوودانی خوێنبەربوونێکی زۆر لەکاتی نەشتەرگەری منداڵبوون کە ڕێگاکانی تر سەرکەوتوو نەبن بۆ کۆنترۆڵ کردنی پێویست ئەکا لەم کاتەیا منداڵدان لاببرێت.
3- بەهۆی چەندین جار دووبارە بوونەوەی خزانی منداڵدان کە نەخۆشەکە بێزار دەکات و کێشەی کۆنتڕۆڵکردنی میزی بۆ درووست دەبێت.
4-خوێنبەربوونی زۆر کە نەخۆشەکە تووشی کەمخوێنی بکات و هیچ چارەسەرێکی تەواوەتی نەبێت بۆ کۆنترۆڵ کردنی.
5- شێرپەنجەی منداڵدان یاخود ملی منداڵدان.
6- هەندێک جاریش بۆ ئەو خانمانەی تووشی نەخۆشی ئیندۆمەتر یۆسیس بوون کە حاڵەتێکە تیایدا شانەی ناوپۆشی منداڵدان لە دەرەوەی منداڵدان گەشە دەکات وەکوو هێلکەدان یان جۆگەی فالوپ یاخود ئەندامی تر ، ئەگەر ڕێگاکانی تری چارەسەرکردن سەرکەوتوو نەبن لابردنی ڕەحم یەکێکە لە ڕێگاچارەکان. [1]