هۆرامان و مەولانا خالیدی نەقشبەڼیی
پېسە مەزانمۍ بەشێ فرەو ئا مەڵڵا ئایینیا کە مامۊسێ مەولانا خالیدی بیېنۍ خەڵکو هۆرامانینۍ، پېسە (مەڵڵا جەلالو خورماڵی و شېخ عەبدوڵڵاو خەرپانی و مەڵڵا ئیبراهیمو بېیارۍ) ، گەر بگېڵمېوە پەی ژیوای سەردەمو گەنجی و سەردەمو فەقی بېیەی مەولانای، وینمۍ فرەو ئا ژیوایشەنە دلۍ هۆرامانینە گوزەرنان، تیرەو میکائیلی کە گەرمیان و کوېسانشان کەردەن، زیاتەریچ خانەواڎەو مەولانای، هۆرامانو وەرکۆتی و جە (کانی حەوشو ۋاران؛ وارانی) هامنەکەشا سەربەردەن. مەولانا ئڼە ئولفەتش گېرتەن بە هۆرامانیۆ پېسە یاگە زېد و ماواو وېش تەماشەش کەردەن، دەمو مەولانایۆ مەگېڵناوە کە فەرماوانش: هۆرامان بەهەشتو سەرزەمینېیەن. ئەڎاو مەولانایچ هەر جە هۆرامان وەفاتش کەردەن، دلۍ زیارەت تەڵانو (دارو بەرمەڕای) نزیکو شارەدەگاو بېیارۍ بە خاکی ئەسپاریێنە.
ئەسعەد ڕەشید.[1]