#ئێستا کچێک نیشتمانمە#
کە وڵات بوو بە چەتەوڵی هەڕەشە و
چی دەرگایە لێی داخستی
ئیتر شتێک نییە لەودا هەرگیز
تۆ پێی بڵێی خۆشەویستیی
من تەڵاشم یان کۆتەرەم؟!
هەموو جارێ خۆم ئەبینم گێژاوێ خولم ئەدات و
ئەمباتە بنی بنەوە و لە ناکاویش هەڵم ئەداتە
سەرەوە نە ئەوەتا بە ئێجگاری نوقم بم و
نە ئەوەتایش هەتاکو سەر هەر لە سەرێ بمێنمەوە!
من تەمەنم نۆزدە مۆمە و
لەو نۆزدەیە فووی نیشتمان
سێ چوارێکی هێشتۆتەوە
بۆ شەوقی بزە و پێکەنین
نۆزدە باڵندەی ناو خەونی لاوێتیم و
لەو نۆزدەیە ساچمەکانی نیشتمان
سێ چوارێکیان هێشتۆتەوە
بۆ چریکە و بۆ هەڵفڕین
نۆزدە هەناسەی بەردێکی سەرەڕێ
نۆزدە بڵقی قیری جادەیەکی هاوین
نۆزدە قاوغەفیشەکی شەڕی ناوخۆ
نۆزدە تیکەی لە قوڕگ گیراو.
نۆزدە گۆرەوی کونکون و
نۆزدە سکاڵای و نکراو.
نۆزدە ڤالیۆم بۆ نۆزدە شەو.
نۆزدە ساڵیش لەناو زەرفێکی بەتاڵدا!
#شێرکۆ بێکەس# [1]
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە=KTML_End=