سەرنجێ سەرو دەقەکاو (پژگیای) نامق هۆرامی
بەشۍ: دوەمە
نویستەی: #ڕەئوف مەحموودپوور#
ژەنێوە مرۊنەو سووراوەکېش جیامەنا.
هەڵەبجەنە
ژەنەکیَو
ماتیکەکیَ
پیَوە مەردیَ و
گرد وەهاریَ هەنارەکی سوراو گیَرا.
ڕیوایەتیَ ئوستووراوی. پیَچەوانەو ئادرکنایاو ئا ڕیوایەتا کەوەلَتەر سەرو مەحشەروو هەلَەبجەی کرییَنیَ و من ئاگاڎارشانا.
چیَگەنە سوور بېیەی هەناری سوعالەنە! هەنار چی سووربۊ؟یان سووراو گیَرۆ؟! جوابەکەش نە کە بە میتۆدیَ زانستی و ئاوەزیانە، بەلَکووم بەمیتۆدیَ ئوستوورەیی و ڕۊحی لەیەک دریۆوە؟! هەنار سوور کەرۊ چوونکای هەلَەبجەنە، ژەنیَو ماتیک پیَوە مرا!
ژەنی پیَسە سەرچەمەزای و وەشەویسی و بېیەی. ماتیکیچ پیَسە هیَماو جوانخاسی و ئومېڎی وئارەزووی! کەپاسەن کارەساتو هەلَەبجەی، حەشریَ خیَزنۆ! مەرگو بېیەی و جوانخاسی؟! هەرئانەن کە ئیتر گرد سالَیَ هەنار سوور بۆ! هەنار پیَسە میَوەی ئوستوورەیی جەباوەڕوو یارسانەکانه و سووراوگیَرتەیەیچ پیَسە درکناییَ هیَمایی وچنمانایی. ئینەیچە کە دماو ئا کارەساتی گرد سالَیَ هەنار سووراو گیَرۆ!! ویَش بابەتیَوی فرە ڕەهەندی وتەئویلگیرا. کریۆ سەرشۆ مانۆڕ دریۆو.
دڼە دڼە هەنارو عەمریم
پێت هورتەکنو
هەنار چی دەفتەرەنە، یاگیَ تایبەتیەش هەنە. چیَگەیچەنە هەنار بۊ بە عەمرو دڼە دڼە هۆرتەکیۆ! هەناروو عەمری کەدووبارە هورقولَیَوەن جەهەمان ئوستوورەی.
هەنار، لاو مەولەویوە بۊ بە دلَ:
هەنارەکەی دلَ پەڕ جە دانەی ئیَش!
بەلام چی دەفتەر نەبۊ بەعەمر، بۊ بە وجوودو دڼە دڼە جە ڕاو وەشەویسیەنە هورتەکیۆ!
لازما ئانەی باروە هۊش کەماچا: زوانی تازه و درکنای تازە، جە فکری تازەی و پەیلوای تازەی و لەیەکدایۆ تازەیۆ هورقولَیۆ. شیَعرەی تازیَچ کە ساحېبوو ئی پاشخانا نەبۊ تەنیا ڕووکەشیَوەش مانۆوە کەزوو ڕووکیۆ یان کالَەبۊوە.
جە فرەو یاگەکاو ئی دەفتەریەنە زوانو درکنای و واتای بەدیار، گوزارەنیَ جە فکری تازەی و سەرنجیَو لەیەکدایۆ تایبەتیی و تازەی، جا ئی فکرو سەرنجیَ مجیارە دلیَ زوانیَوە شیَعراوی وئەدەبیی. ئانەن کەسەرنج بەریَنیَ و ڕەنگە وانایۆ و هۊرکڕنای فرەو جیاوازیچ شۆنه و ویَشارە بارا.
گەڵا زاناش
پاییز مەیلش چەنیش سەردا
پەوکای دەسش چەنە وەردا
دیاردەو خەزانی، پیَسەو بابەتیَوە سرۆشتی وەرچەمو فرەو شاعیَرا بېیەن.
جە ئەدەبوو هۆرامیچەنە هەر پاسە، هەر جە بیَسارانیوە. لاو شاعیَرە کلاسیکەکاوە خەزان، گوزارە بېیەن پەی بابەتیَوە نیگەتیڤی و جەڕوانگەی عاتفیەوە کارەساتاوی لەیەک دریانۆ. بەڵام چیَگەنە جۊروو سەرنجەکیَ بە تەمامی جیاوازەنە. چیَگەنە بە پیَچەوانەو ڕۆتی باوی، گەڵا ساحیب ئیراده و بڕیارا. ئانە گەلان کە دەسبەردارو چەنیبېیەیبۊ. جە حالیَوەنە جەشیَعرەی کلاسیکەی کوردیەنە، گەڵا کارەساتباراو جە دیارده و خەزانېیەنە هیچ بڕیار و ئیرادیَوەش نیەن.[1]