سەربازېوی گوم

سی و يه ک سال چيوەلتەرو ڕوێ چوون ئارۊ
چاوەختۆ کە مەکتەبەنەبی و پۆلو ششی بۍ، ئاڼە گۆرە نەبی، وەلی ساڵەو پانزە و شانزەیش تەی کەردیبی. عورفەن و بەپاو زانستیچ ئینسان تاکو نەیاو (18) ساڵ پەنەش مەواچا پیا یانی باڵغ نەبېیەن. وەلی ئی کوڕە چی کاتو گەشەکەردەیشەنە پسە پېیێوی کامڵی کۊمەلگانە جمېو، سڵام کەری ئۆ خەڵکی، وەرو کەسانی جە ویش گۆرەتەری هورزیوەو ڕېزشا پەی قاییل کەری، دڵو هیچ کەسی عادز نەکەری، پیرو ڕیش چەرمەکا دونی و قسی وەشیشا پەی کەرۍ. پیسە هەرزەکاریوی چا هەڕەت و ڕشت و گەرمەیچەنە بی کەچی ئەتوارۍ هەرزەکارانیش نەبینی. دلی برادەرەکایچشەنە هەمیشە وەڵینە بی.
ئاوەختە ویرم مێ کە مەکتەبەکەو بەڵخەیەنە بی سەرو ئاستو پارێزگایەنە ئاستو یەکەم و دوەمی نەدی لا کەسی. کە وەختی ئازادش بی ساحەو مەکتەبەکەو بەڵخەیەنە چەنی ڕەفیقەکاش گەمەکەرینی. گەمەو ئا وەختیچە تەوەن زەخت کەردەی بی. ویرم مێ تەوەن زەخت کەردەی بە یەک دەس فرە باوبی، ئاد گەورەترین تەوەنی بە یەک دەس زەختە کەری. گردو برادەرەکاش تەعاجبکەرینی. چادمای پەیمابەرکۆت کە دەسیش پانی بینی و پەنجیچش دریژی. کە تەوەنەکی هورگیری پەنجە دریژەکیش بەتەمامی ئی لاو ئۆ لاو تەوەنەکی گیرینی و تەمامو هیزیش مەڕیی ملشەرەو ئیتر بە ئاسان بەرزەش کەریوە. دمای گەمەکەردەیچ، دەرسیچ واچیوە پا دەرسوانا مەکتەبەنە پیویستشا بە سەعیکەردەی زیاتەریبی تاکو حاڵیشا بیی. ئید فرە زوو حاڵیشا کەری.
هەرپاسەیچ کە هۆرامان بارکریا و دانشگاو موسڵیەنە وەرگیریا، نەک هەر بە پلەی نایاب پۆلەکاش بڕی، بەڵکوم یاردی دانشجوەکاو وارو ویچش دی دانیشگانە. پینەیچۆ نەمدری ڕوژانەو وەختی ئازادشەنە بانگەوازیوی پەروەردەیی سەرو ئاستو تاکیش گرتەبینە وەر کە چادمای واچینی نفوزەشکەردیبی ئاستو بەڕێوەبەرایەتی دانشگاو موسڵی. ئیسلامخوازیوی نەرم و نیان و ئیصلاحتەلەب بی. تاڕادیو فرەو بەها ئیسلامیەکاش چەنی هەڵسوکۆتو ڕۊژانەیش ئامیتەکەردیبینی. ئیسلامخوازیو بی کە دەنگ و ڕەنگش جە نوسخەی ئەصلی ئیسلامی موحەمەدی شی، ڕەفتارەکیش جە کۊمەڵگانە ڕەنگەشادیبیوەو گرکەس بە حەسرەتۆبی کە قسیش چەنی کەرو. ویرم مێ دوی ڕەفیقیش بە ماتوڕ سواری جە موسڵۆ ئامێ پەی مەجمەعەو عەنەبی جە هەڵەبجە پەی لایش. ئاوەختیچە جاش و جەیش و مخابەراتی عەسکەری ڕژیمو بەعسی فرە بە ئاسان تومەتی وزینی پاڵ و خەڵکیو تندو زیندانەکاش کەرینی. کەس نەیاری پەی پیاسەیچ ڕوەو بازارو هەڵەبجەی بلو. خەڵک ئەر دوسی و یان ڕەفیقیوش بیێ بەریش پەی یاگیوی دورە شکی. چەمشۊ بینی چەنی دوە ڕەفیقە موسڵیە غەریبەکاش بەسواری ماتوڕی ڕوەو باخەکاو عەنەبی خوڕیشا وەنە. چیسەرۆ چەنی یویشا سواربی و چۆسەریچۆ چەنی ئەوی تەریشا سوار بیەبی ئامێوە. ویرەگا کە ئامێ پەی مزگی واتم: کاکە ئانە چی چۆسەریجۆ حەرپیدیشا نامایۆ سوارو ماتووڕەکەو ئەویشا بیەبینی؟ وەڵامەنە واتش ئەی دیموکراسی یانی چیش. چاوەختەنە من باسو دیموکراسی نەزانینی فرە سەرش نەلانی. کە ئی پرسیاریمە وەنە کەرد هیشتای دەسش وەرنەدابینی کە توقەماکەرد، کە زاناش هیشتای من نەیاوانا لا چمک و واژەو دیموکراسی عادەتەکەو ویش کجیو زەردەخەنەش کەردو لجیوش کجیو کروتش پەی ئینەیە دەسم تندشوارو. چوون عادەتش بی، هەرکاتیو توقەکەری چەنی خەلکی تند دەسو کابرای شواری، بەڵام من هەستکەرینی دەسو من فرەتەر شواری تاکو ئیشیم.
هەمیشە دڵسوزوبی و یارمەتی خەلکی دی، بەتایبەتی جە بوارو زانستی و دەرسواتەیۆ بە دانسشجویا بە خوڕایی. کاتیو کە فیراری سەربازی بی هەرمان و کارش بیەبی دەرسواتەیۆ بە تەلەبە ئیکمالەکاو مەجمەعەو عەنەبی، بەتایبەتی بەلخەیەکی جە (قوتابخانەی شارای سەرەتایی) گلیریشا کەریوەو دەرسشا پەنە واچی. بەرگ و یەکەم و فرەو کتیبەکاو ماموسا حەبیب محمەد سەعیدی ئید ستایلشا پەی کەری، (هەرکام جا کتیباو زنجیرەو هەوالانی پێغەمبەریا ، خۆشنویسەکەش ئیدی نویستەن، بە نازنامو بەلخەیی. ساڵەو (1988ز) ڕویوی پسە ئاروی جە جەریمەو کیمیاۋاران؛ وارانو هەڵەبجەیەنە پەی هەمیشەی گیڵاوە لاو بارەگاو خوای چەنی گردو خېزانە بەڕېزەکەیش. یادش گەرامی بوو ڕوحش شاڎبوو، خوای گەورە چەنی ماباقی شەهیدە بیتاوانەکاو کیمیا وارانو هەڵەبجەی جە فیردەوسەنە چەنی پیغەمبەراو پیا خاسا گلیریش کەردیباوە.
پسەو وەفێوی پەی ماموسای بەڕیزیم . شەهید ماموسا عەبدولکەریم حامد بەڵخەی حه زم کەرد یادیوش کەروو.
هۆرامان عەبدولڕەحمان.[1]