پارېزنای زۋانی هۆرامی
نویستەی: #ئاکۆ مارانی#
وەنەرۍ ئازیزە، وەنەری ئازیز، هامزۋانی ئازیز
سڵام و ڕێزی فراۋان
پاسە کە تۊ ئاگاڎار هەنی، ساڵۊ (2016ز) تاکو ئیسە کومەڵېۋ کەسۍ چالاکی بوارو (پارېزنای زۋانی هۆرامی) جە بەشۊ هۊرگېڵنای ئینتێرنێتیی گوگڵی داۋاشاکەردینە، تاکو زۋانی هۆرامی پېسەو زۋانەکا تەری و هەر پاسە ئەر بە دیالێکتیچش بژناسا، پېسەو (کرمانجی و سۆرانی و زازایی) هۆرامیچ زیاڎکەرا.
بەڵام فرە بەداخۆ، هەرچڼە ۋەڵی 2016 و دماو ئانەیچ جە لایەنو کەسانېۋیۆ بە بەردەۋامی دەیان جارۍ و سەڎان پەیامۍ و فیدبەیکۍ پەی بەشۊ هۊرگېڵنای گوگڵی کېیانییێنۍ و نزیکەو 3000 کەسا کەمپەینەکېشا واژۊکەرڎېنە، کەچی دماو ئا گرڎە ساڵا و پەیام و کۊشش و واژۊکەرڎەیا، سەرپەرشیتکەرۍ بەشۊ هۊرگېڵناو گوگڵی هەفتېۋ چێۋەڵتەر تاقە وەڵامېۋشا دانۆ و ماچا هۆرامی زۋان نېیا، دیالێکتا، ۋەرو ئانەی زېیاد نمەکریۊ.
هەرچڼە ئېمە وېما مزانمۍ و فرە کەسۍ زۋانژناسی ناهۆرامیېچ مزانا، کە هۆرامی زۋانا و قسۍ هۊرنمەگېرۊ، چنی ئانیچە، تەنانەت [ئەر] پاسەیچ بۊ، کە سەرپەرشتیکەرۍ هۊرگېڵنو گوگڵی ماچا، هیشتا ئېمە ئا مافەما هەن، کە پېسەو سۆرانی و کرمانجی و زازایی، بە هۆرامیچ ڕابڎریۊ.
هەڵبەتە مەڵامەتو ڕەتکەرڎەی داازییەکەو ئېمە دېیارا و پەی ئېمەی هۆرامی زۋانی ئاشکران، کە بېکەسی و یۊ نەبېیەی وېما و هامکات ستەمېۋی تاریخی، کە زۋانی هۆرامی کریان بە سەبدیالێکتو دیالێکتېۋی تەری نریانەرە، کە جە ڕاسییەنە ئاڎ دیالێکتېۋی هۆرامین.
ئیسە ئیتر ئېمە بېجگە یۊگېرتەی و هامپەشتی وېما، هیچ پەشت و پەنێۋما نېیا و نەمەنەن، تاقە کارتېۋو فشاری کە دەسو ئێمۆ مەنەبۊ و مەنەن، ئانەن، کە گرڎ کەس سەرو ئا لینکە وارینەیە کلیککەرۊ و بە هەر زۋانېۋ کە مزانۊ، پېسەو وەڵامی پەیلۋاو وېش بنۋیسۊ؛
بەڕێزا سەرپەرشتیکەرا هۊرگېڵنو گوگڵی، سپاس پەی وەڵامدایتا، بەڵام هۆرامی زۋانا، [ئەر] دیالێکتیش بۊ، ئا کاتەیچ پېسەو سۆرانی و کرمانجی و زازایی، هۆرامیچ مافو بەشداریکەرڎەی بەشۊ هۊرگېڵناو گوگڵیش هەن، یان ئی نۋیستە ئینگلیزییە کۆپیکەرە و یاگۊ وەڵامەکەینە بنیەشەرە
Dear Administrators of Google translator tool,
thank you for your answer,
but Horami is a language like other indu european languages, if you claim that Horami is a dialect, then like other Kurdish dialects (kurmanci, sorani, zaza) it should have the same chance and rights in the google translator tools.
پەی وەڵامۆدای بە گوگڵی، سەرو ئی لینکەیە کلیککەردۍ
https://support.google.com/translate/thread/94591449?hl=en&msgid=94650974.[1]