ئاوی و ئاوەڎانی و بڕێ جاریچ یانە وېرانی
ئاوی و ئاوەڎانی و جاریچ هەن پێسنەو هېزی؛ ئاوی و ۋېرانی پەی یانەو غەریبێوە بە مەنزڵ نەیاوای... بڵبەر و گېیانکەنشتوو کەسېوە کە دماو پەنج ساڵا دووری، نەیاواوە دڵبەراو وېش.
دەسێو ئەڎایێوە و تاتەیوە کە پەی گېرتەیو باوشوو ڕۊڵەی دوورە وەڵاتیشا پەی هەتاهەتاین سڕێ بیێ. ڕۊڵێوە کە پەی دیڎاروو تاتەی غەریبیش و کەرڎەیوە زرێو ساکڵەکەیش هەڵای هەر چەمەنەزارا و پاسە زانۆ، تاتەش ئەریچ نەیوە، تاوۆ پەشتوو قاپوو گووشینە وینۊش و گلەیێو دێر ئامایشۆ کەرۊ.
قەرار بۍ باوشێوە گەرمەنە فشاراش وېشارە و خێر ئامایش کەرا، بەڵام لاشەیوە چیا، بۍ گېیان و فیسیا تاخەیت نەلاوە وەروو بەرەکەیچشا.
ئاوی زاڵمە یوونان تاکو ئێنگلیس ئاڎش دوور وستەو، ئاوی زاڵمە بڵبەر تاکو مەریوان، هێناسەو ڕۊڵێوە غەریبیش پەنگنانا شمشاش و خنیکناش.
ڕەفێقێ وناڵینێ، مەرگو ڕەفێقیشا و ئاواتەکێ کە وەڵات بە وەڵات دیاریێشا کەردێ بێنێ، بڵبەری بەرڎێرە بڵ و ئاڎیچی بەرڎێوە ماواو چنیەیشا و واتەیشا.
یۆسف ئاماوە و تاتەش چەمېش بیێراوە و حەنەر نەبۍ، ئێڎێ بەڵام، دیڎارشا کەوت قیامەت، سەبووری چکۆنی؟
متن: مێهران ئەحمەدی.[1]