ئی هەمیرە ئاوی فرۍ کېشۊ
هەمیر شېلتەی، یام نان کەردەی، سەرەتا بە هەمیر شېلتەی دەسپەنەکەرۊن، ئاردی خەلەی دلۍ تەشتێنە ئاویشا کەرانەو سەرو وۍ شېلاشان تاکو پېسە هەمیری مدرۊو دماتەر بە (مەسۍ) گونکېش چەنە بڕان، مەسۍ ئالەتێ گولانەن، پارچە ئاسنێ گولانەن، دەمێ پانکیلەی گولانەش پۆن و بە دەسە باریکڵەکەیش مەگېریۊن و هەمیرەکەش پەنە مەبڕیۊن.
بڕێ ئاردی هەنۍ پەی ئانەی بکریان بە هەمیر ئاوی فرۍ مەکېشان، یانی هەر هەمیرەکەی شېلان و هەر یۊمەگېرۊن، مەجبور کوچە کوچەی ئاویش کەرانەو شل مەبۊوە. پېسە ئیدیۆمێ بەکارئامان پەی بڕێ بارا، پەی نمونەی گرفتێ مەگنۊ میانو چن کەسێ، بە ئاسانی چارە نمەکریۊن، چیلا و چۆلانە خەڵکۍ تەرۍ مەیانە دلۍ، یام جە وەختو چارەسەری گرفتەکەینە چېوۍ تەرۍ مەگنابەر، گرفتەکەی گرانتەر و قووڵتر مەکەراوە، ئەچاگە کەسێ ماچۊ بە خوڎا برا ئی هەمیرە ئاوی فرۍ کېشۊ، یانی گرفتەکە بە ئاسانی جارەنمەکریۊ، وەختی فرەتەرش گەرەکا.[1]