ئایا چیٛوێوە هەن بەنامیٛ فەلسەفەی ئیسلامیۆ؟!
بەشۍ دوەمە
نویستەی: #ئیبراهیم میکە عەلی#
بنەڕەتەنە فەلسەفەو هیچ فەیلەسوفێوە موقەدەس و پیرۊز نیا، وەلێم چا وینگۆ هەکە ئیسلام لاو موسڵماناوە موقەدەس و پیرۊزا، وەختێ سیفەتو ئیسلامیەتی کریۊ وەرو فەلسەفەیرە، چاگۆ پیرۊزیی ئیسلامی سەرە کېشۊ دلې فەلسەفەکەیچ و ئاڎیچی گېرۊرە، ئاوەختە ئېتر ئەر یۊ بواچۊ من فڵانە فەلسەفەی ئیسلامیم قبوڵ نیا، پەنەش ماچا: ئێ... تۊ خجڵەنی کفر مکەری و گەنجەفە مکەری بە پیرۊزییەکاما!!
ئاشکران ۋېیەردەنە چڼان فەیلەسوفې بیېنې هەکە زڵمشا وەنە کریان تەنیا ۋەرو ئانەیە پەرسېشا بیېنې سەرو فەلسەفەی ئیسلامی.
چ پەی موسڵمانی و چ خەڵکی تەریچ ئەشۊم ئا مافشا بۊ ئەر گەرەکشا بی بواچا: پەی نمونەی ئېمە پابەندې نمەبیمې بە فەلسەفەو ئیبنو سینایۆ، ئەشۊم ئا مافشا بۊ ئەر بواچا: فەلسەفەو مەڵڵا سەدرایما قبوڵ نیا، وەلێم وەختێ مۊرەو ئیسلامی بېیەیما دا ئەو فەلسەفەکەیشا ئیتر بە جۊرێوە ئاڎیشا پیرۊزې مکەرې و ئی پیرۊز کەردەیچە چەنی فەلسەفەی و چېش بېیەی فەلسەفەی دژ مردۊوە.
وەختێ کەسێ پابەند مبۊ پۆ فەلسەفەی ئیسلامیۆ ئیتر لاێوە بۊ بە پاسەوانو فەلسەفەو ڕۊم و یۊنانی و لاێوە تەریچۆ گەرەکشا بۊ بە پاسەوانو ئایەتەکا قورئانی و حەدیس و ئەوەگېڵنایە ئیسلامیەکا، گرفتەکە ئینا چاگەنە هەکە ئی دوە (ئیسلام و فەلسەفە) فرەو یاگانە دژ مرداوە وەراوەرو یۊترینی، پېسەنە کەسېوە یاگې هەرمانەکېشەنە دوې سەرکارېش با و سەرەمڕە چەپەوانەو یۊترینی خوڕاش ملەرە.
ئەر وردې بیمېوە فەیلەسوفێوە هەکە تەنیا بە میرات و کەلەپورو ویرو یۊنانی و ڕۊمای دېرینیۆ پابەند بۊ، توشو دژو وېبېیەیۆ نمێ.
بەهەمان شېوە موسڵمان و خوا ئەشناسێوەیچ هەکە پابەندا پۆ ئایەت و حەدیسەکا ئایینەکەیشۆ مەیدانەکەو وېشەنە توشو دژو وېبەیەی نمەبۊ.
وەلێم ئەر کەسېوە یەک وەختەنە گەرەکشبۊ پی دواوە هەردویشاوە پابەند بۊ، هەمیشە توشو دژو وېبېیەی بۊ.
قسێوە جە (کوینیتوس ترتولیانوس) ێوە گېڵناوە هەکە بە تاتەو خوا ئەشناسا مەسیحیەتی نریۊرە، واتەنش: ئەسینا حەقش چېشا سەرو ئورشلیم یۆ؟ کڵېسا حەقش چېشا سەرو ئاکادیمیایۆ؟
چا ڕوېوە هەکە پېخامئاوەرەکی بەنی ئیسرائیلی و عیسای مەسیح ئورشەلیمەنە بیېنې ئاگە هەمیشە نمادو ئایینی بیەن، ئەسینایچ نمادو فەلسەفەو یونانی کۊنین.
بینا سەرو ئانەی ترتولیانوس وەختێ ماچۊ: ئەسینا حەقش چېشا سەرو ئورشلیمیۆ؟ کڵېسا حەقش چېشا سەرو ئاکادیمیایۆ؟
مەرامش ئانەبیەن بواچۊ: تېکەڵ کەردەی ئایینی و فەلسەفەی بۊ بایسو دژو یۊبېیەی، چوونکوم هەردوی چەنی یوترینی مەسازیا و ڕېکې نمەگنا.[1]