شەوەش گېرتېنە دەمۆ
ئیدیۆمێن، پا کەسا واچیۊن هەکە نیمەشەوەنە مزیارەو ملان سەردەمو هەرمانېشاوە. پەی نمونەی دۋۍ نەفەرۍ پېخامێشان پەنەن، گەرەکشانەن دلۍ دەگاکۍ وېشاوە بیاوناش دەگێوە تەرە، پەی ئانەی زوو بیاوان وەرۆ، نیمەشەو، یام لېڵ و بووم مەگنا ڕا، زوو ملاو زوو مەگېڵاوە، پەنەشان ماچان فەقیرۍ شەوەشان گېرتېنە دەمۆ، پی نیمەشەوە جمێنېرە. ماناو ئیدیۆمەکۍ کوچێ ناڕۊشنەنە، شەوە چەنی گېریۊ دەمۆ؟ بەڵام ڕەنگە ماناکېش ئەپېسنۍ بۊن: دەم بە ماناو وەختی مەی، بە نمونە ماچان: دەمو ساعبی، دەمو وېرەگای. یانی کە ماچان شەوەشان گېرتېنە دەمۆ، یانی وەختو شەوەکېشا گېرتەن، یام سوودشان جە وەختو شەوۍ گېرتەن پەی پوڕنای هەرمانەکاشا.[1]