زەرێ و فەخری ڕازی
بەشەی چوارەمە
ژەنی هەر یۊ چېوێو کەرېنێ قۆڕگەو زەرێرە تا لەمەکېش وزۆ، بەڵام لەمەش ڕۊ بە ڕۊ گەورێ و گۆرەتەرە بې.
ڕوێوشا یانەشانە قاڵە قاڵێو ئاما منیچ کرژ لوانی سەرو بانی. سەرەنجم دا زەرێ ئامێنە دلې باخچەکەیشا حاڵش خراو بېیەن و دلش هۆرمەیوە.
ماچۊ: ئەڎا دڵم گڕش گېرت، خەریکەن مەسوچیەو. لاشەم گڕش گېرتەن بە خوڎا ئی دەوا جە سێخە داخەکەو عەباسی خراوتەر بې. ئەڎایچش واتش: حەر کەس ملۆ شۊنی کاری خراویەرە و هاگاش وېش نېیەنە مشۊم سوچیۆ. هیچ کەس یانەشانە نەبې، سڵتانە بې و زەرێ.
من لوانی شۊنی مەڵڵا نەواتی و واتم زەرێ خەریکەن جە دەس ملۆ.
مەڵڵای واتش: ئێتر پەی چێ؟
واتم: نمەزانو
ماما گەورێ ئامە لێواروو حەوزەکەینە نیشتەرە و واتش: سڵتانێ گەرەکتەن چېشش پەنە کەری؟
واتش: ژەنېوە پیرەی یەهووڎیە گەڕاڵە دەوایەش دا و واتش: ئەر ئینەیە بوەرۆ ڕەحەت لەمەکېش وزۆ. منیچ دەواکەم پەنە دا ئێتر پاسشە سەر ئاما. ماما گەورێ واتش: ژەنەکێ ئا لەمێشە حەفت مانگێنە، ئەر بە وسەیش بېیایا چیروو ئا گرڎە شەق و لەقینە دەوا و دوعایانە بەر نەبەرێ.
ماما گەورێ کەوتە ڕا و پلێکانی دلې حەوشەکېشارە ئامارە وار و منیچ شۊنیشەرە ئامانی. زەرێ ڕەنگش بېیێبێ خەزانی زەرد و لەمەیچش حەساوی زلە بېیێبێ. پاڵو زەرێنە نیشتانیرە، ماما گەورێ واتش دا ئا دەوایا بڎە بزانوو. سڵتانە لتێوە جە دەوایەکەیش دا دەسشوە، واتش: ئینەنە، واتش پەنەما ئەر یەرێ ڕوێ شۆ‌ن بە شۆنوو یۆوی ئینەیە بساویوە و چەنی ئاوێ قاتیش کەری و بڎەیش پەنە لەمەکېش ڕەحەت وزۆ،
بەڵام حەر واردێش حاڵش شێویا و پێسشە سەر ئاما. ماما گەورێ وات ئی دەوا یۆوی مکوشۆ مشۊم کاریە کەرمې هۊرش بارۆوە. هەنگووسەش کەرڎە قۆڕگەو زەرێرە و زەرێچ پەسا پەسا دلش هۆرئێوە. ماما گەورێ واتش: سڵتان بۊ با بەرمێش پەی دوکتری. سڵتانێ وات، ئەر بەرمێش پەی دوکتری دنیای مارا ملمارە. عەباسیچ مکشوما و ونیما مەکەرۊ تەشتە. مەڵای پەنە واتانی، حسەین گېیان زەرێت وەش مسیۆ؟ واتم بې‌ئەڼاز.
واتش: زوو بڕفیە تا لاو حەمامیا و کەمیە شۊت بارە.
زوو فڕەم کەرد و بە ژەنەو ئۊسای واتم: شۊتتا هەن؟
واتش: ئارۊ مانگاوەکێما شۊتش کەم بې هۆرم گېرتەن پەی زاڕوڵا.
واتم: تۊ خوڎا حەر چیتا هەن بڎەش، زەرێ خەریکەن تەمامە بۊ. واتش: ئەی کناچە هەژارێ هەڕ بەسەرې. دەفرەکەش چەنە گېرتانی و پەڕش کەرد شۊت و منیچ یەرێ قەرانێم پەنە دا و پېسەو وای وېم یاوناوە یانەو زەرێ. ماما گەورێ بە زۊر شۊتەکەش کەرد قۆڕگەو زەرێرە.
زەرێچ حەر خەریکە بې ژەحر هۊر ئارێوە.
نەنێچ چن جارێ تەر شۊتش دا، ئاڎیچ بې‌حاڵ دلې حەوشێنە کەوتێبێ. دەرقاچەکەش هۆر‌دریابێوە، کتووپڕ سەرەنجم دا گرڎو قول و قاچیش بېیەبێ یاگێ داخا، مامایچ واتش: ئینە چېشەن، پەی چێ ئی کناچې پێسشە سەر ئامان؟! سڵتانەیچ واتش: هەرچی ڕوێنێ عەباس بەرێش چیرزەمین و زرمێوەش دێنە و داخێش کەرې. تا نامې تەرەفی واچۊ، ئا بې‌بابێچە نامې کەسی نەواچې.
ماما گەورێ واتش، ئی بەسە زوانێ ئڼە ئازار مەڎەیدێ، کێ ماچۊ لەمەشەنە زاڕۆن؟ تەنانەت یەک کەڕەتیچ نەبەرڎېنەتا دوکتر. حەفت مانگێن بېوچان دارکاریش مەکەرڎې.
سڵتانەیچ واتش: ئەر بەرمێش دوکتر ڕەسووڵ چەنی لالوەکاش مڎاشوەنە.
مامایچ وات: کۊرە غەڵەت کەرا، من ملو دوکتری ماروو. ماما گەورێ سەرەش نامنارە و نیاش سەرو لەمەو زەرێ. سەرو لەمێشەرە معاوێنەش کەرڎە. دماییچ بە من واتش: حسەین گېیان تۊ متاوی بلی بەر.
من لوانی دلې ڕاڕەوەکەی دیم ماما گەورێ بە دەنگی بەرز ماچۊ: سڵتانێ بە خوڎا قەسەم من زارۊ لەمەمەنە بۊ ئی کناچې نېیەن. ئەریچ بۊ حەفتا زەمانێ مەردەن.
شەریفی_بېساران.[1]