ڕۆمان ڕۊمانا... نە ڕۊمانە و نە ڕازە و نە هیچی تەر
نویستەی: #ئیبراهیم میکە عەلی#
هیزی شارو هەڵەبجەی و یانەو سیاوچەمانەینە ۋېرەگا دیدارێوە ساز کریا پەی پەردەلادای سەرو ڕۊمانێوی بەنامې (شاباڵ) ی هەکە نویستەو برای ئازیز م.ڕەفعەت مورادی بې.
من چێوە دەسوەشی کەرو ئەو م.ڕەفعەتی و ئەو یانەو سیاوچەمانەی و ئەو گرڎو ئا وەشەسیایا هەکە ۋېرەگا دیدارەکەنە ئامادێ بېیێ و پەیلواو وېشا وستشا سارا.
داخەم مەشۆ من بۊنەو هەرمانێوی وېمۆ نەتاوام بەشداری دیڎارەکەی بکەرو.
وەلێم وەشبەختانە ڤیدیۆ دیدارەکەیم بە تەمامی ئەوەڵ تاکو ئاخر دی و گۊشم پەی دارا.
چېوێ مەرامما چېگەنە بواچووش ئانەن؛ دیڎارەکەنە پەرسێوە وزیا وەرو باسی هەکە چند یاگ و بۊنەی تەریچەنە وزیۆ وەڕو باسی و خەڵک چەنی منیچ باسش کەرۊ و پەرسا: چی ماچدې و منوسدێ ڕۊمان یام ڕۊمانە و چی مەواچدێ ڕازە؟
مەگەر ڕۊمان هەر ڕازە نییەنە؟
هیزی چا دیداریچەنە بە گەرمی ئی پەرسې وزیا ڕوە و قسېش سەر کریێ.
منیچ ۋەرو ئانەیە نەبېیانې چاگە تاکو قسێ وېم کەرونە و بە فرسەتیچش مزانو چی بۊنەنە قسێ دڵو وېم کەرو پەوچی ماچوو: ڕۊمان ... ڕۊمانا و نمەبۊ هیچ نامۊی تەرش نریۆ و تاخایتێ نمەبۊ نامەکېچ کریۆ نامۊە مېڵې و موئەنەسە، چوون ئا تەئنیسە چاوە سەرچەمە گېرۆ گوایا مادام ڕازە مېڵېنە و ڕۊمانیچ یانی ڕازە دەی ئەشۆم ئێدیچە موئەنەسەبۆ.
ئینە و هەرچی تەر هامشێوەو ئی بابەتیە بۊ تەکەلوفێوە زیادەن ئەو وېما کەرمېش و عاقیبەتش خاس بەر نمەشۆ.
ئەشۆ بواچوو هەکە کاک سەرکاو فەیروز نمونێوە مەکینش ئاردۆ پەی ڕاسی قسەکېش هەکە واتش: کڵاش کڵاشا و نمەبۊ تەرجەمە کریۆ.
ڕۆمانیچ ژانرێوە جەهانین و نمەبۊ ئېمە تەقەلا دەیمێ نامېش فاڕمێ و کەرمېش مڵکو وېما، بەڵکو ئېمەیچ پېسەو گەلا تەری متاومې بەهرەش چەنە گېرمێ و نامەکېچش پېسەو ئەرکێوە ئینسانی پارېزنمې.[1]