هاتنی (بایدن) هاتنی (دەرفەتێکی زێڕینە) بۆ کورد!
#کارۆخ خۆشناو#
(ترەمپ) وەک سەرۆکێکی ناوازە و دیاریدەیەکی شاز لەناو سیاسەتی ئەمەریکادا، بەم هەموو هاش و هوش و عەجوولیەی خۆیەوە، نەیتوانی بنەماکانی دیموکراسی ئەمەریکا بشڵەژێنێت و یاسا و ڕێسا دەستوورییەکان تێپەڕێنیت، چونکە (دەستووری ئەمەریکا) قەڵغانی دیموکراسییەتی ئەمەریکایە و زامنکەری هەمیشەیی بەرهەمهێنانەوەی پڕۆسەی دیموکراسی ئەمەریکایە بۆ هەموو سەردەمێک و بۆ هەموو حاڵەتێک و بۆ هەموو کەسێک، واتە دەستووری ئەمەریکا (هێڵی سوورە) و لە سۆنگەی ئەم دەستوورەشەوە (ڕەگ و ڕیشەی قووڵ) بۆ دەسەڵاتەکانی (جێبەجێکردن و یاسادانان و دادوەری) ڕەنگڕێژ کراون و دام و دەزگای بەهێز بۆ ئەمەریکا بنیاتنراون، بە جۆرێک ئەگەر سەرۆکێکی شێوە دیکتاتۆر وەک ترەمپیش هەڵتۆقێت، ئەوا ناتوانێت ژێرخانی دیموکراسییەتی ئەمەریکا هەڵبتەکێنێت، خۆ ئەگەر ترەمپ بیتوانیایە سنووری خۆی ببەزێنێت ئەوا دەستووری ئەمەریکای لە بەرژەوەندی خۆی هەمواردەکردەوە و خۆی وەک (سەرۆک و مەلیک و پاشای هەتاهەتایی) لە کۆشکی سپی دەهێشتەوە، چونکە ترەمپ دنیابینییەکی ڕۆژهەڵاتی هەیە و دۆڕانی لە یاری دیموکراسیدا قبووڵ نییە، تەنیا ئەو کاتە نەبێت کە خۆی براوەی یارییەکە دەبێت.
دوای پەسەندکردنی دەنگەکانی (ویلایەتی میشیگن) لە بەرژەوەندی بایدن، ترەمپ نائومێد بوو لەوەی کە بتوانێت لە ڕووی سکاڵای یاساییەوە ئەنجامی هەڵبژاردنەکان لە بەرژەوەندی خۆی بشکێنێتەوە، بۆیە بە شێوەیەکی ناڕاستەوخۆ دانی بە بردنەوەی بایدن دانا، ئەویش لە ڕێگای کردنەوی دەرگاکانی کۆشکی سپی بۆ تیمەکەی بایدن و ئامادەیی تەواوی دەربڕی بۆ هەماهەنگی کردن بۆ دەستاودەستکردنی دەسەڵات، لەگەڵ ئەوەشدا تاکوو ئێستا ترەمپ بە ڕوون و ڕاشکاوی دانی بە دۆڕانی خۆیدا نەناوە و پیرۆزبایی لە بایدن نەکردووە، ئەگەرچی ئەم دانپێدانەی ترەمپ (ئەرکێکی یاسایی) نییە، بەڵام نەریتێکی دیموکراسی و پێویستییەکی ئەخلاقیە بۆ دەستاودەستکردنی دەسەڵات بە شێوەیەکی ئاشتییانە، لەگەڵ ئەوەشدا دەبینین خاتوو (ئیمێڵی مۆرفی) بەرپرسی کارگێڕی (خزمەتگوزارییە گشتییەکان) ئامادەیی تەواوی دەربڕی بۆ هەماهەنگیکردن لەگەڵ تیمەکەی بایدن.
بە هاتنی (جۆ بایدن) وەک (46)ەمین سەرۆکی ئەمەریکا، سەردەمێکی نوێ و دەرفەتێکی نوێ و لاپەڕەیەکی سپی لە (کۆشکی سپی) دەکرێتەوە، ئایا پلان و ستراتیژی سەرکردایەتی سیاسی کوردستان چییە بۆ ئەم سەردەمە نوێیە؟
ئایا نوێنەرایەتی کوردستان لە واشنتن چ پلانێک و میکانیزمێکیان ئامادەکردووە بۆ پڕۆسەی (لۆبی)کردن لە سەردەمی بایدندا؟
ئایا ڕەوەندی کوردی (کە بە نزیکەی 70 هەزار کەس مەزەندە دەکرێن) لە ئەمەریکادا کاریگەرییان لەم سەردەمە نوێیەدا چییە؟
یەکێک لە خاڵە لاوازەکانی ئێمەی کورد بریتییە لە نەبوونی دەزگای تایبەتمەند بە داڕشتنی پلانی کورت ماوە (تاکتیکی) و پلانی درێژماوە (ستراتیژی) بۆ ڕەنگڕێژکردنی سیاسەت و ستراتیژییەکی تۆکمە بە ئامانجی قۆستنەوەی دەرفەتەکان و ڕووبەڕووبوونەوەی هەڕەشەکان، هۆکاری ئەم خاڵە لاوازەش دەگەڕێتەوە بۆ نەبوونی دەستوور (وەک لە وتاری پێشوودا ئاماژەمان پێکرد: بۆ خوێندنەوەی وتارەکە کرتە لێرە بکە)، چونکە لە ڕێگای چەتری دەستوورەوە دەتوانرێت ئەم جۆرە دەزگایانە بنیاتبنرێن و پلانی ستراتیژی و هێڵی سووری نیشتمانی و ڕەهەندەکانی ئاساییشی نیشتمانی دیاری بکرێن.
لە کۆتاییدا پێم وایە (هاتنی سەردەمی بایدن، واتە هاتنی دەرفەتێکی زێڕین بۆ کورد)، چونکە بایدن شارەزاترین و هاوسۆزترین و نزیکترین کارەکتەری سیاسی ئەمەریکایە بەرانبەر بە دۆزی کورد، بۆیە گرنگە تا زووە سەرکردایەتی سیاسی کوردستان خۆیان ئامادە بکەن و پلانێکی تۆکمە بۆ ئەم سەردەمە زێڕینە دابڕێژن، تاکوو (وەبەرهێنانی دیپلۆماسی) لەم دەرفەتە زێڕینە بکرێت و مامەڵەیەکی تەندرووست لەگەڵ ئیدارەی بایدندا بکرێت و بەرچاوڕوونی پێشوەختەمان هەبێت بۆ قۆناغێکی نوێ و سەردەمێکی نوێ، نەک تەنیا سیاسەتی (کاردانەوەمان) هەبێت! بۆ گۆڕانکارییە گەورە و گرنگەکانی کۆشکی سپی، کە سەرچاوەی بڕیارە چارەنووسسازەکانی جیهانە. [1]