=KTML_Bold=ئاساییشی هەرێم هێڵی سوورە!=KTML_End=
#کارۆخ خۆشناو#
یەکێک لە سامانە نیشتمانییەکانی (هەرێمی کوردستان) کە نکۆڵی لێ ناکرێت و سازشی لەسەر ناکرێت، بریتییە لەو پێگە سەقامگیرەی کە لەم (ناوچە پڕ لەکێشەیە)دا هەیەتی، ئەو پێگە ئارامەی کە هەمیشە هەرێمی کوردستانی پێ جیاکراوەتەوە لە ئێراقێکی ئاڵۆز و ناسەقامگیر، ئەم سامانە نیشتمانییە هەمیشە جێگای شانازی خەڵکی کوردستان و نێردە دیپلۆماسییەکان و ڕێکخراوە نێودەوڵەتییەکان بووە، چونکە لەژێر سایەی ئەم پێگە سەقامگیرەدا نەک تەنیا خەڵکی کوردستان، بەڵکوو سەدان هەزار ئاوارەی ناوەڕاست و خوارووی ئێراق و پارچەکانی تری کوردستانیش حەواونەتەوە، بۆیە ئاساییشی هەرێم بەگشتی و ئاساییشی #هەولێر#ی پایتەخت بەتایبەتیی هێڵی سوورن، نابێت بە هیچ شێوەیەک ڕێگا بە هیچ گرووپ و میلیشیایەک بدرێت لە (ژێر هەر ناو و ناونیشانێکدا بن) هەرێم بکەنە گۆڕەپانی ململانێی ناوخۆیی و ناوچەیی و نێودەوڵەتی (هاوشێوەی بەغدا).
ئەمە چەند جارێکە هێرشی موشەکی دەکرێتە سەر هەولێری پایتەختی هەرێمی کوردستان، ڕوون و ئاشکرایە کەوا ئەم هێرشانە ڕاستەوخۆ یان ناڕاستەوخۆ لەلایەن ئێرانەوە ئەنجام دراون، بەڵام ئاماژەکان پێمان دەڵێن کەوا هێرشەکەی ئەم جارە ناڕاستەوخۆ لەلایەن پڕۆکزیەکانی ئێرانەوە ئەنجام دراوە، ئەویش بە مەبەستی گەیاندنی کۆمەڵێک پەیام، لەوانە:
1-هەوڵدان بۆ گەیاندنی پەیامێک کە (ھەولێر و کوردستان هاوشێوەی بەغدا و ئێراق ناسەقامگیرن).
2-ناردنی پەیامێک بۆ (ئیدارەی بایدن) کەوا شیعەکان خوێنی (قاسم #سلێمانی# و ئەبوو مەهدی موهەندیس)یان لەبیر نەکردووە.
3-تێرکردن و ڕازیگردنی شەقامی شیعە بە مەبەستی (استهلاک المحلي) و ڕیکلامکردن و کۆکردنەوەی دەنگ بۆ هەڵبژاردنەکانی داهاتووی پەڕڵەمانی ئێراق.
4-تاقیکردنەوەی (ئیدارەی بایدن) تاکوو بزانن تا چەند بەرگری لە هەرێم و وڵاتانی هاوپەیمانی ئەمریکا دەکات.
5-فشارێکە بۆ ئەمریکا تاکوو گەمارووەکانی سەر ئیران ھەڵبگرێت و بگەڕێتەوە ناو ڕێکەوتنی ئەتۆمی (5+1).
6-فشارێکی ئیرانە بۆ سەر هەرێم تاکوو لە ئەمریکا و هاوپەیمانەکانی دوور بکەوێتەوە، بە مەبەستی تێکدانی ئەم باڵانسەی کەوا هەرێم بە شێوەیەکی هاوسەنگ ڕایگرتووە لەنێوان ئەمریکا و ئێران.
7-پەیامێکی ئێرانە بۆ ئەمریکا کە دەتوانن لە ڕێگای پڕۆکزیەکانیانەوە لە هەموو شوێنێکی ئێراق هێرش بکاتە سەر بەرژەوەندییەکان و هێزەکانی ئەمریکا، بە تایبەت کە ماوەیەکە لە میدیا جیهانییەکان باس لەوە دەکرێت کە باشترین و سەقامگیرترین و ئارامترین ئەلتەرناتیڤی ئەمریکا لە شوێنی (بەغدا) ڕەنگە هەولێر بێت.
=KTML_Bold=دووبارە بوونەوەی هێرشە موشەکییەکان دەبێت ناچارمان بکات تاکوو هەڵوەستییەک بکەین بۆ ئەنجامدانی چوار خاڵی گرنگ:=KTML_End=
=KTML_Bold=یەکەم:=KTML_End= گرنگە هەرێم بە فەرمی داوا لە ئەمریکا بکات تاکوو فشار لە حکومەتی ئێراق بکات بۆ ئەوەی هێزەکانی حەشد لە سنووری هەرێم دووربخرێنەوە، چونکە لە ساڵی (2017) بە گڵۆپی سەوزی ئەمریکا هێزەکانی حەشد توانیان بێنە سنووری ناوچە دابڕێنراوەکانی هەرێم.
=KTML_Bold=دووەم:=KTML_End= گرنگە هەرێم داوا لە ئەمریکا بکات چۆن لە ڕێگای سیستەمی پاتریۆتەوە بنکە و بارەگاکانیان دەپارێزن ئەوهاش (خاک و خەڵکی) هەرێم لە هێرشی نەیارەکانیان بپارێزن، چونکە سەرەکیترین بەهانەی هێرشبردنی ئەم گرووپانە بریتییە لە بوونی هێزەکانی ئەمریکا لە هەرێم.
=KTML_Bold=سێیەم:=KTML_End= گرنگە هەرێم داوا لە نەتەوە یەکگرتووەکان بکات تاکوو فشار لە ئێراق بکات بۆ جێبەجێکردنی مادەی (140).
=KTML_Bold=چوارەم:=KTML_End= لەگەڵ ئەم سێ خاڵەی سەرەوەدا پێویستە سەرکردایەتی سیاسی کوردستان پەلە بکات لە پڕۆسەی ڕێکخستنەوە و یەک خستنەوەی هێزەکانی پێشمەرگە، بە مەبەستی ئامادەباشی وەرگرتن بۆ بەرپەرچدانەوەی هەر هەڕەشەیەکی سەربازی و ئەمنی بۆ سەر خاک و خەڵکی هەرێمی کوردستان. [1]