لە چوارچێوەی یارییەکانی خولی نایابی تۆپی پێی یانەکانی ئێراق و لە جەولەی 19ی خولەکە، تیمی تۆپی پێی #یانەی وەرزشی پێشمەرگەی سلێمانی# خاوەن پلەی یەکەمی ڕیزبەندی یانەکانی کۆمەڵەی یەکەم میوانداری لە تیمی تۆپی پێی یانەی ئەلفەهد (الفهد) کرد.
کاتژمێر 4:00ی ئێوارەی ڕۆژی هەینی #03-05-2024# و لەسەر یاریگەی فەرماندەیی تایبەت بە یانەی وەرزشی پێشمەرگە هەردوو تیمی تۆپی پێی یانەکانی پێشمەرگە و ئەلفەهد بە یەکگەیشتن، لەو یارییەدا و هەر لە سەرەتاوە یاریزانانی پێشمەرگە توانیان بە ئاستێکی بەرز ببینرێن و لە خولەکی 9 یاریزانی پیشەگەری تیمەکە (ستیفن سارگۆ) گۆڵی یەکەم و پێشکەوتنی تۆمار کرد.
ئەمە و هەمان یاریزان لە خولەکی 15 دووەم گۆڵی خۆی و تیمی تۆپی پێی یانەی پێشمەرگە کردوو هەروەک نیوەی یەکەمی یاری بەو ئەنجامە و بە دوو گۆڵی خاوێن لە بەرژەوەندی کوڕانی پێشمەرگە کۆتایی هات.
نیوەی دووەم دووبارە کۆنترۆڵی تۆپ لای یاریزانانی پێشمەرگە بوو لەپاش 6 خولەکی ئەو نیوەیەدا، (شەعبان مەحمود)ی یاریزانی پێشمەرگە سێیەم گۆڵی تۆمار کردوو پاشان و لە دوای خۆڕێکخستنەوەی تیمەکەیان یانەی میوان توانیان سێ گۆڵی یەک لە دوای یەک تۆمار بکەن و ئەنجامی کۆتاییش بەیەکسان بوونی هەردوو تیم بە 3 گۆڵ بۆ هەر لایەکیان کۆتایی هات.
بەو ئەنجامەش پێشمەرگە کۆی خاڵەکانی بۆ 34 خاڵ بەرز کردەوە لە دوای جەولەی 19ی یارییەکانی. [1]