=KTML_Bold=سەرۆک و هەڵبژاردن لە زۆنی کوردستاندا=KTML_End=
#ئاریان فەرەج#
ئەرکی نیشتمانی، سیاسی و یاسایی سەرۆکی هەرێمی کوردستان لەو چەند ساڵەی رابردووی ویلایەتی خۆیدا ئەوە بوو:
لە ئاستی نێوخۆ، دامەزراوەی سەرۆکایەتیی هەرێمی کوردستان بکاتە چەتری کۆکەرەوە و ماڵە باوان، بە یەک مەودا هەموو حیزبەکان بوەستێ، سەرباری سیخناخیی کایەی سیاسیمان بە ناکۆکی، رق، بوغز و کۆنەقین، لە هەوڵی هێنانەدیی ئاشتەوایی و یەکڕیزی و پاراستنی یەکپارچەیی خاکی هەرێمی کوردستان، کۆڵنەدات. ئەزموونە دیموکراتییەکەمان لە رێی ئەنجامدانی هەڵبژاردن و ئیدارەی مەدەنییانەی ناکۆکییە سیاسییەکان، یەکتر قبوڵکردن و فرەیی و سەقامگیریی سیاسییەوە، پەرەپێبدات. هاوکات لە بەغداش بە دوای لێکتێگەیشتن و دامەزراندنەوەی هاوبەشی و دابینکردنی مافە دەستوورییەکانی گەلەکەمانەوە بێت، لەسەر ئاستی ناوچەکەش بۆ سفرکردنەوەی تەنگ و چەڵەمە و کێشەکانمان لەگەڵ دەروجیران، لە ئاستی جیهانی بۆ لەدەستنەچوونی دۆستانی دۆزەکەمان و پاراستنی نێوبانگی دیموکراتخوازانەی کوردستان، هەموو هەوڵ و تواناکانی بخاتەگەڕ.
هاوکات و لە بەرامبەردا، ئەرکی حیزبەکانیش بوو لە بەجیهێنانی ئەم ئەرکە نیشتمانییانەدا و بۆ بەرژەوەندیی کوردستان، ئاسانکار، دەستبار و هاوکاری سەرۆک و سەرۆکایەتیی هەرێمی کوردستان بن. بسازێن، پەڕگیر و پێداگیر نەبن و لە ناوەڕاستی رێگەدا بۆ یەکدی داشکێنن و پێکبێن و ریککەون.
یەکێک لە ئەرکەکانی سەرۆک، سەروکاری ئەنجامدانی هەڵبژاردنە وەک ماف و بنەمای سەرەکیی حوکمڕانیی هەرێمی کوردستان، کە دوو ساڵ لەمەوبەر و لەگەڵ نزیکبوونەوەی وادەکەیدا، بووە ئەجێندا و کاری لەپێشینەی، بەڵام نەک تەنها دیاریکردنی وادەکەی، بەڵکو زەمینەسازیی بۆ سەرخستنیشی. واتە چەندە ئەرکی سەرۆک بوو کاربکات بۆ ئەوەی پرۆسەکە لە وادەی خۆیدا بەڕێوەبچێت و دوانەخرێت، ئەوەندە و زیاتریش ئەرکی بوو کاربکات بۆ ئەوەی:
- لە زەوینەیەکی لەبار و بە سازان و لێکتێگەیشتن و بەشداریی هەموو لایەنەکان و لە زۆنی کوردستان بەڕێوەبچێت و، پرۆسەیەکی واقیعی و سەرکەوتوو بێت.
- یاسا و رێسا و رێکار و میکانیزمی بەڕێوەچوونەکەی، یەکسانی و عەدالەتی کۆمەڵگەیی و پێکهاتەیی دابین بکەن و رەزامەندی گشتییان لەسەربێت.
- پرۆسەکە خزمەت بەو ئامانجە نیشتمانییانە بکات کە لەپێناویدا بەڕێوەدەچێت، کە ئەوانیش: بەهێزکردنەوەی پێگەی کوردستان لەسەر هەموو ئاستەکان، دوورخستنەوەی تارمایی لێکترازان، قوڵکردنەوەی فەرهەنگی دیموکراتخوازی و بەخشینەوەی رەنگ و روویەکی گەش و پەسندکراو بەنێوبانگی هەرێمەکەمان، نوێکردنەوە و شەرعیەت بەبەرداکرنەوەی دامەزراوە نیشتمانییەکانمان و دیزایینکرنەوەی دەسەڵات بە خواستی میللی.
- دڵنیابوون لەوەی ئەنجامەکانی هەڵبژاردنەکە لەسەر ئەرزی واقیع جێبەجێ دەبن و لەجیاتی پتەوکردنی یەکپارچەیی و یەک ئیرادەیی و یەک ئیدارەیی خاکی هەرێمی کوردستان، نابنە مایەی لێکترازانی یەکجاری و قەیرانی سیاسی و گرفتی لە ئێستا گەورەتر.
لە راستیدا هەر چاودێرێکی سیاسی و بەر لە هەمووانیش یەک بە یەکی حیزبەکانی کوردستان شاهیدی ئەوەن و، هەمووشیان بەر لەوەی بەم دواییە تای بانگەشەی هەڵبژاردن هەندێکیان بگرێت، ئەو گەواهییەیان داوە کە هیچ کەس لەم کوردستانە هێندەی سەرۆکی هەرێمی کوردستان پەرۆشی ئەوە نەبوو هەڵبژاردن لە وادەی خۆیدا بکرێ و سەرکەوتووانە بەڕێوەبچێت. هیچ رێگەیکیش نەما بۆ ئەو مەبەستە نەیگرێتەبەر، زیاد لە دوو ساڵ هەوڵ و تەقەللاکانی بۆ زەوینەسازیی یاسایی، بۆ سازاندن و لێکنزیککردنەوەی حیزبەکان، بۆ دڵ رازیکردن و گەرەنتیی بەشداریی هەمووان، بۆ دابینکردنی پشتیوانیی نێودەوڵەتی بۆ پرۆسەکە، بۆ گونجاندنی رێسا و رێکارەکان و نزیککردنەوەیان لە عەدالەت و پەسەندیی هەمووان. بۆ ئەوەی پێکهاتەکان خۆیان بڕیار لە مافی خۆیان بدەن و زۆر هەنگاو و هەوڵ و تەقەللای دیکەش پێشتر لەسەر ئاستی کوردستان و دواتر لەسەر ئاستی عێراقیش گەواهی ئەو پەرۆشییەن. بەڵام لە راستیدا ئەوەی بووە هۆکاری نەکردن و دواخستنی زیاد لە جارێکی وادەکە، حیزبەکان و پێکنەهاتن و نەسازان و ناڕەزاییەکانیان بوو، ئینجا هەر جارە و یەکێکیان. مەعلومیشە کە بە بێ سازان و رەزامەندی و بەشداریی حیزبەکان و بەتایبەت سەرەکییەکان، دیاریکردنی هیچ وادەیەک بۆ هەڵبژاردن یەکسان نییە بە هەڵبژاردێکی واقیعی و راستەقینە و سەرکەوتوو کە کوردستان پێویستییەتی. دیسانیش هەموو چاودێرانی سیاسی و بەر لە هەمووانیش یەک بە یەکی حیزبەکان (ئەگەرچی بانگەشەی پێشوەختەی هەڵبژاردن ئێستا قسەیەکی جیاوازیان لێ دەخوازێ) ئەم راستییە باش دەزانن.
خولاسەی کەلام؛ سەرۆک کاری خۆی بێ کەمتەرخەمی کرد، لەو زەرەر و زیانەش کە بەهۆی دواخستنی هەڵبژاردنەوە بە هەرێمی کوردستان کەوتن، دوا کەس و دوا دەزگا لێیان بەرپرسیاربێت، سەرۆک و سەرۆکایەتیی هەرێمی کوردستانە. هەموو هەوڵەکانی ئێستاشی هەر بە هەمان شێوەی هەوڵەکانی دوو ساڵی رابردووی نە بۆ خاترگرتنی ئەو حیزبە و نە ئەم حیزب، بەڵکو تەنیا بۆ یەک ئامانجە کە ئەویش سازدانی هەڵبژاردنێکی سەرکەوتووی بێ کەم و کاسییە بە بەشداریی هەمووان.
لە راستی دا پەیوەستبوونی کوردستان و پرسەکانی و حیزبە پێکناکۆکەکانی بە دامەزراوەی سەرۆکایەتیی هەرێمی کوردستان وەک مەکۆی کۆکەرەوە و ماڵی هەمووان، وەک ئەو مینبەرە تەباییخواز و میانڕۆیەی دەتوانێ هەمیشە گرژییەکان هێور بکاتەوە و کۆی هەوڵەکان بۆ خێری گەلەکەمان لێک گرێبداتەوە. وەک دامەزراوەی سەنگین و جێ ئیعتباری گەلەکەمان لە سەر ئاستەکانی عێراق و ناوچەکە و جیهان، وا دەخوازێ ئەم دامەزراوە نیشتمانییە کۆکەرەوەیە نەخەینە نێو پێکداهەڵپژانی بانگەشەی هەڵبژاردن و تێکەڵی ناکۆکی و کێبرکێی دەنگ کۆکردنەوەی حیزبەکانی نەکەین. [1]
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End=