=KTML_Bold=کەس مەکەنەوە بە فریشتەی عێراق!=KTML_End=
#ئاسۆ عەبدوللەتیف#
ئێستا فەنتازیای موقتەدا سەدر و بۆن و بەرامەی سائیرون عێراقی بە جارێک وەک داری عوود تەنیوە، لەکاتێکدا سەرکەوتنەکەی موقتەدا سەدر لە 12/5/2018 ئەوەندە گەوره و بێ وێنە نیە راچڵەکینی بەدوای خۆیدا هێنابێت. بۆچی ئەمە؟ چونکە ئه و کۆکتێلە سیاسییە به و هەموو پەرچەمە ئایدۆلۆژیستیەی خۆیەوە هێشتا نەیتوانیوە زۆرینەی کورسیەکانی پەرلەمان مسۆگەر بکات بۆ نەزمی حکومەت، بۆیە هێشتا زووە بڕیار لەسەر ئەجێندا سیاسییەکەی خولگەی سەدریەکان بدرێت، دەبێت کەمێک لەسەرخۆبین و بزانین هەنگاوەکان بە ئاراستەی کوێ دەرۆن، بەتایبەتی بۆ کورد کە بە جەستەیەکی بریندارەوە ئەمجارە دەچێتەوە بەغدادو برینی قوڵی پێشمەرگە سارێژ نەبووە کە بەدەستی سەربازانی عێراقی نوێ بریندارکران و ئەم لیستەش بەشێک بوو لەستراتیجی ئه و عێراقە!
ئەوەی گرنگە بزانرێت ئەوەیە کورسی ناو پەرلەمان ئەرزشێکی ئەوتۆی نەماوە وەک دەریچەی چارەنوسسازی عێراق و تەنها بۆ دڵخۆشکردنه و رەقەمگەلێکی بێ ئیعتیبارە لە رووی کردارییەوە، لە ئایندەی عێراقی نوێشدا ئەوە کورسی نییە حوکم دەکات، بەڵکو تارماییە کۆنەکەی سەردەمی رێککەوتنە ژێربەژێرو نهێنیەکانی پۆڵ بریمەرو چەتری شیعەکانی عێراق و ئێرانه و بۆ ئێستاش وەک خێو درێژ بۆتەوە، ئەوەی حوکم دەکات دیموکراسی و دەنگی ناو سندوقەکانیش نیە کە هەندێک هەلهەلەی بۆ دەکوتن، بەڵکو هاوپەیمانێتیە بەهێزەکان و جەمسەرە گەورەکانی دەوری ئه و تارماییە سیاسیە کۆنەی عێراقن، کە دوای هەڵبژاردنەکانی ئەمجارەش داهاتووی حوکمرانی سیاسی عێراق دیاری دەکەن و کوردیش له و خەریتە سیاسیە کۆنە چونکە هەیە، ئێستاو ئایندەش دەبێ هەبێت وەک نەتەوە، ئیتر بێنه و بەردەی دوای هەڵبژاردن و کۆی سیناریۆکان و کێشمەکێشی دانوستانە حیزبیەکان و جرت و فرتی شاندەکان، جەنگی بێمانای تەوقەکردنێک و زمانی جەستەی شاندەکان و ئەم شەڕە وردانە بەهایەکی ئەوتۆی نیە لە بازاڕی کەوتووی سیاسی عێراقیدا.
خۆی لەبنەرەتدا دەنگ و کورسیەکانی کۆی هێزو نەتەوەکان لەعێراقدا یان دەنگەکان وەک یەکن یان نزیکن لە یەکدیەوه و هیچ قەواره و هێزێک نەیتوانیوە رێژەی سەرەکی 165 کورسی وەدەست بخات کە رێژەیەکی یاساییە بۆ دروستکردنی حکومەتی زۆرینە، لە ئێستادا ئەگەر سەیری نەخشەکە بکەین، دەبینین کورسی لیست و قەوارە براوەکانیش لە 19 کورسیەکەی تەیاری حیکمەی عەمار حەکیم ەوە تا 54 کورسیەکەیسائیرونی موقتەدا سەدر هیچیان دەنگ و رێژەی گەورە نین، کە مایەی شۆک بن، یان هەڕەشە بن بۆ کەمینەکان و توانستی حکومەتی زۆرینەیان هەبێت، خۆ ئەگەر کورد وەک ئیئتیلافێکی یەکگرتووی کوردستانی بەشداری بکردایە ئەوا دەبووە گەورەترین کوتلەی پەرلەمانی کە رێژەکەی دەگەشتە سەرو 60 کورسی، بەڵام دیسان ئەمەش هەر رێژەیەکی گەورە نیە بۆ عێراق کە حکومەتی پێ دروست بکرێت، کەواتە عێراق هێشتا بەدەست ئەم هێزە بچوکانەوەیە، خۆی موعادەلە نێودەوڵەتیەکە بە ئێرانیشەوە ئەمەی دەوێت، هێزی بچوک بچووکی بێ پەڕوباڵ دروست بکرێت تا رێگری بکرێت لە هێزی گەوره و بلۆکی شیعی مەزن و مەرجەعی باڵا، ئەم تێزە بۆ عێراق کۆتایی هاتووە هێزێک هەموو عێراق بەرێوەبەرێت، عێراق دراوەتە دەست ئەم هێزە پەرتبووە بچوکانەی خولگەی ئێران ئەمریکا، ئەم هێزە بچوکانەش هێزی جەمسەری و هەرێمی دروستی کردوون و دەیانجوڵێنن، خۆلاسەی کەلام هەر دەبێت بە شێوە دراماتیکی و تەقلیدیەکە عێراق سکە بگرێت لەسەر سازانی نیشتیمانی و رێزگرتن لە شوناس و ئیراده و ماف و ئازادیەکانی یەکدی.
بۆیە لە ئێستاوە کورد دەبێت خۆی بۆ ئه و ئەگەرانە ئامادە بکات کە ئەگەری دەرەکین نەک ناوخۆیی، رێککەوتن لەگەڵ جەمسەرو مۆتیڤە بەهێزەکانی دەرەوە بە بڕوای من زامنی کوردستانێکی جێگیرو ئارامتر دەکات لەوەی ئێستا، خۆ هەڵواسین بە کوتلەیەکی پەرلەمانیەوە کە ئاسۆکەی روون نییە هەڵەی کوشنده و سیاسییە، ئێستا هەموو وەک یەکین، کەس شەریفتر نییە لەوی دی، کورد دەبێت وەک جوگرافیاو ئیستیحقاقی نەتەوەیی و خاک و زمان و مێژووەکەی مامەڵە بکات نەک بە شانازیکردن بە کورسیەکانیەوە کە کورسی حیزبین لە ئێستادا، ئەوەش روونە کە هەموو لایەک گلەیی و رەخنەی جددی لە پرۆسەکه و کۆی میکانیزمەکانی کۆمسیۆنی هەڵبژاردن هەیە لەم گەڕەی هەڵبژاردن، بۆیە دەبێت کورد وەک کەمینه و برا بچووک خۆی نەخاتەوە ناو سیناریۆکانەوە، پۆست گرنگە بەڵام لە پۆست گرنگتر شکۆو کەرامەتی تاکی کوردییە، بۆیە با یەکگرتوو بین و یەک لیست و یەک قەواره و کوتلەی پەرلەمانی و ئەم دروشمانە وازلێ بهێنن بۆ شتێک، ئەویش ئەوەیە چی بکەین لە بەغداد بۆ ئایندەی هەرێمی کوردستان و مافە دەستوریەکانی؟
پێشتر لە وتارێکمدا ئەمەم نوسی ئەم هەڵبژاردنەش هیچ ناگۆڕێت، خۆتێکدان و خۆسوورکردنەوەی ناوێت، تەشهیر بەیەک مەکەن با بوەستێ ئەم کەلتورە ناشیرینە، با سبەی لە بەغداد بتوانن مەرحەبایەکی یەکتر بکەن و شەرمەزاری یەک نەبن، هەر لە ئێستاوە بیر لە کەین و بەین و خۆدەوڵەمەندکردن و دانوستانی نهێنی و ژێربەژێرو لێدان لە نەتەوە لەسەر حسابی دەنگدەر مەکەنەوە، تۆ دەزانیت هەڵبژاردنی عێراق شانۆگەرییەکی کۆمیدیە بۆ سیستمێکی خراپ
هێشتا نەچوینەتەوە بەغداد خەریکی شکاندنی ئێسک و پروسکی یەکترین، ئەمەش دەرفەتی ئەوە ون دەکات کە چیمان دەوێ لە بەغداد بۆ کوردستان، ئه و هەرەشانەی لەسەر کوردستان هەبوون و هەیە، دەبێت کار لە رەوینەوەی بکرێت و بەپێی دەستووری عێراقی ماف و خواست و بودجه و شایستە داراییەکانی زامن بکرێت، لە ئێستادا دەبێت کەس نەکەین بە کاراکتەری رزگارکه و فریشتەی نەجات، ئەوە ئیشی پارتی سیاسی نییە کە دۆزێکی گەورەی نەتەوەیی لەسەر شانە، موقتەدا سەدریش وەک هەر کاراکتەرێکی عێراقی و شیعی لە رابردوودا رۆڵی نەگەتیڤی هەبووە لە وێرانکردن و حوکمرانی خراپی عێراقی و گەندەڵی سیاسی و ئیداری و دروستکردنی حەشدی شەعبی و تەنانەت داگیرکردنەوەی کەرکوکدا، ئه و لەیەک کاتدا هەم عەمامە بەسەرێکی دۆستی ئەمریکا و هەم خوێندکارێکی حەوزەی قووم و ئومێدبەخشی عەرەبستانی سعودی و نەیارێکی ئیسرائیلی و هەم وەک رزگارکەرێکی نیشتیمانی و دژە گەندەڵی و دۆستی شیوعیەکان و پرۆلیتاریای نوێ خۆی پیشان دەدات، بۆیە زەحمەتە لەم مەعدەنە تێبگەین بە ئاسانی؟
مایەی نیگەرانییە لە دەساڵی رابردوودا کورد هیچ دانوستانێکی نەبردۆتەوه و بگرە هەندێ پرسی هەستیاریشی دۆراندوە، ئه و قسەیە هێشتا ئەزرنگێتەوە لە گوێماندا کورد جەنگ ئەباتەوه و دەستکەوتەکانی جەنگیش لەسەر مێزی دانوستان ئەدۆرێنێت گرنگە ئەمجارە خۆمان بۆ بردنەوە ئامادە بکەین، ئایا کاتی ئەوە نییە ئیتر دانوستانەکان بەرینەوە و ئەوەندە سازشی حیزبیان لەسەر نەکەین، عەبادی لە رابردوودا بە جۆرێک شکۆی ئەم هەرێمەی شکاند، هیچ سەرۆک وەزیرێکی عێراق ناتوانێت تا چەند ساڵێکی تریش بە قسه و پێکەنینی شاشە قەرەبووی بکاتەوە ئەگەر خۆمان قەرەبووی نەکەینەوە. [1]
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End=