=KTML_Bold=مۆتیڤەکانی ئاوارەبوون و کۆمەڵکوژیی!؟=KTML_End=
#ئاسۆ عەبدوللەتیف#
ئایا کاتی ئەوە نەهاتووە تراژیدیای ئاوارەبوون و نەغمەکانی پشتەوەی ئەم مۆتیڤە جەرگبڕانە بگۆڕین بە وێنه و دەرکەوتی نوێ کە هاوشان بێت بە پێدراوەکانی ئەم زەمەنە، هیچ نەبێت تێبگەین گوتاری ئەمەریکی چییه و چی لە ئێمە دەوێت لە ئێستادا.
ڕۆژاڤا مۆدێلێک لە خەباتی تری تاقیکردەوە هێشتا بەشی ئەوە ناکات بمانگەیەنێتە دۆخێکی ئارام و بێکێشە، کاتی خۆی کە موسڵ وەک ویلایەتێک دوای پەیماننامەکانی سیڤەرو لۆزان، دروست لە #16-12-1925# خرایە سەر عێراقی مەلەکی، ئەتاتورک، تەنها ئەوەی کرد له و رێککەوتنە تێگەیشت و خۆی گونجاند لەگەڵیدا، تازە خەریکی بە پێوە وەستان بوو، باکی نەبوو بەم لکاندنەش، ئەمەش لەپای ئەوەی کە سنورەکانی ئارام بن تا، ناوچەکانی دێرسیم و ئامەدو وان و زاب و ئۆرامار، رۆژێک لە رۆژان بیری لەوە نەکردبویەوە کورد ئەوەندە بەهێزبێت دەستی بگاتە رۆژهەڵاتی فورات و سەردەریای رەش و هەرێمێک دروست بکات بە سەد هەزار شەرڤانەوە، ئێستا کە دەزانێت مەترسی لەسەرە سکێچی نەخشەکەی نەک ویلایەتی موسڵ، بەڵکو تەواوی کوردستانی رۆژاڤاو بەشێکی گەورەی باشوریشی خستۆتە سەر، وەک پلانێکی عەسکەری و فراوانخوازیی.
کاتێک ئەتاتورک لە ساڵی 1923 لە ژێر باڵی ناسیۆنالیزمی تورکەوە هات و پاکتاوی کوردی کرد، ئاینی وەک رەگەزی ستەمکاریی بەکارنەهێنا، بگرە ئاینی بە تۆپزیی کردە دەرەوەی مێژوو، ئەردوغان داهێنانی لەم پاکتاوو کۆمەڵکوژیەشدا کردو ملپێچی ئاینی کردە گەردن و شەرعیەتی پێبەخشی و دەوڵەتانی ئیسلامی و ئیخوان موسلیمینیش موبارەکەیان کرد.
ئەوەی ئەم قۆناغە سەختەی راگرتووە بۆ کوردانی رۆژاڤا بەتەنها شەڕ نییە، ئیرادەی کوردبوون و ئه و هەستە میللی و کۆنەستە جەماعی و سۆزە گشتگیرەیە، کە بۆتە رۆژەڤی جیهانی و لۆبیەکی بەهێز بۆ تەحەدیاتەکانی ئایندە ئەمە تاکە سەرکەوتنە، کورد بەم بیماریی و شۆکە سیاسی و ئازارەوە هێشتا هیچی پێناکرێت و پێویستە دەستکاری گوتاری سیاسی خۆی بکات و هیچ نەبێت بۆ ئەم قۆناغە، لە رێککەتنەکان تێبگات و مانۆڕو دانوستان و رێککەوتنی نهێنی خۆشی بپارێزێت.
ئەم دۆخە ئومێدە بۆ ئیستیقلال و سەربەخۆیی، تورکیا ئەوە باش دەزانێت، بۆیە خوازیاری ئەوەیە تێکی بدات وەک چۆن ریفراندۆمی سەربەخۆیی باشوریان تێکدا، کورد ئەگەر سەربەخۆیی خۆی هەبێت دەتوانێت ئاسمان و خاکی خۆشی بپارێزێت و رێبگرێت لە هەر گەلکوژیی و جینۆسایدێک.
لە دوای جینۆسایدی هەڵەبجەوە دەتوانین سەرێکانی بە کۆمەڵکوژیەکی نوێ هەژمار بکەین کە توندترین چەکی قەدەغەکراوی فسفۆری تێدا بەکارهات و جیهانیش گوێی خۆی ئاخنی، تورکیاو ئەمەریکاش دەیانزانی زەمەنەکە گونجاوە بۆ چاوداخستن و گوێ ئاخنین، دەرکەوت ئەم زەمەنە زەمەنی پیشەسازیی کردن نییە بە خوێن و کۆمەڵکوژیەوە، زەمەنی حیزب و ئایدۆلۆژیاو پاڵەوانبازیش نییە، وەک سەردەمی جیڤاراو ماندێلاو گاندی، زەمەنی پیشەسازییە بە جوگرافیا و جێکەوتەی باش و نەوتی سپی و بیزنسی رەشەوە، کورد لەم زەمەنەدا کەوتۆتە بن، یان پەراوێزی هاوکێشە جیهانیەکانی نەوت و بیزنسەوە، دەبێت یان خۆی بگونجێنێت لەگەڵی یان لێی تێبگات بەتایبەتی رێکەوتنە سیاسیەکەی مایک پێنس جێگری سەرۆکی ئەمەریکا و ئەردوغان لە #17-10-2019#.
بەتەنها جەنگ و شۆرش و بەرخودان و پیشاندانی هاوار و قیژەی مناڵان بەس نییە، چیرۆکی ئاوارەبوون بۆ کورد دەرکەوتێکی تازە نییە، جیهان خۆی لە ناو پرۆسەیەکی گەورەی ئاوارەبون و کۆچ و گۆڕینی دیمۆگرافیادایه و هیچی پێناکرێت ئەوروپیەکان باش لەمە تێدەگەن، سنور یان دەوڵەتی نەتەوەیی وەک خەونێک بەسەرچووە، ئێستا شتێک نییە بەناوی ناسیۆنالیزم و بڕوا، ئەوەی هەیە مانەوه و بەردەوامی و جەنگە بۆ دروستکردنی ناسنامە، بۆ پاراستنی بەرژەوەندی و بەرزبونەوەی دەخلی تاک و ئامانجە ئینیدفیجواڵەکان، تورک بە دیماگۆگیەتی ئاین و خەونی دەستبەسەراگرتن و ئاواکردنی خەلافەت و ئیمپراتۆریەت ئەمە دەکات بۆ ئەوانەی بە تورکی دەئاخڤن، بۆیە پشتگیری ناوخۆیی شۆڤێنیستی و ئاینی هەیە، ئاوارەبوون و سەرگەردانی لەم زەمەنە زۆر گرنگی پێنادرێت بۆ وڵاتانی خولگەی ترەمپیزم ، ئەوانەی لە گفتوگۆی ترەمپ و بیزنسەکەی دەگەن، دەبێت بزانن زەمەنی بە کاڵاکردنەی ئینسان خۆی و زەمەنی بێبڕوایی میدیاو گوتاری جدیی و سیاسەتی فەرمی بازاریان نەماوە، نە بەیاننامه و کەمپەین و نە ئیدانه و گریان و مافی مرۆڤ و تەنانەت ئەمنستی ئەنتەرناشناڵ و تەواوی رێکخراوەکانی مافی مرۆڤ مایەپووچ بوون بەدەست دیاردەی ترەمپ و بەربەریزمی نوێوە.
ئێستا بەهای هەموو شتێک هاتۆتەخوار، ئینسان خۆی لە جیهاندا بێبەهاترین شمەکە، نرخی گەورە، خوێن و تراژیدیاو ئه و تابلۆ کۆنە نییە کە هەبوو لە رابردوو، ئەوەی نەقاشەکان کاتی خۆی بۆ جیهانیان کێشا، نرخی گەورە لە ئێستادا تێگەیشتنە له و هاوکێشه و هێڵ و مۆدێلە موخابەراتی و بیزنسە جیهانیانەی کە چواردەویان داوین و وەک تەون قوڕگیان گرتوین، کورد دەبێت لە رێککەتنەکان و لە پێکەنین و تورەبوونی سەرکردەکان تێبگات و کار بەم لۆژیکە بکات و چیتر خیانەت و فرۆشتنی خاک و بێمروەتی و بێوەفایی گەلان نەخاتە زهنیەتی خۆیەوە، ناوچەی نەوت بۆ ئەمەریکا پێشنیار بکات بە ئۆفەرێکی باشترلە تورکیاو ئێران، بەشێک لە گرێ کوێرەکان بەم کۆدانە دەکرێنەوە، کورد شەڕی ئاسمانی و تەکنەلۆژیای مۆدێرنی لە شارەکان پێناکرێت، دەبێت رێگای دیکە تاقی بکاتەوە، یان هیچ نەبێت بۆ ئێستا سەقفی داواکاری و خەیاڵاتی خۆی کەمێک دابەزێنێت ئەمەش بە رێککەوتن، تا نەیارانی سەرسام بکات، چونکە تورکیا پێش ئەوەی کۆمەڵکوژیی کورد بکات، بە رێککەوتنی پێشوەخت زامنی هەر گوشارێکی ئەمەریکاو روسیاو جیهانیشی کردووە.
ڕاستە کورد بە دەیان ساڵی دیکە بە وتارو وەعزی سیاسیەکانی و میدیاکەیەوە، نەیدەتوانی تەفسیری فاشیزمی ئاینی تورکیا و بەربەریەتی ئەردوغان بۆ دنیای دەرەوە بکات، بەڵام چ سودی هەیە، خۆ فاشیزمی ئەردوغان، کۆمەڵکوژی و بەربەریەتیشی هاتە سەرو کۆمەڵگای نێودەوڵەتی هێشتا نەیانتوانی بیوەستێنن، با واز لە هاتنە دەنگ و قڕەقڕو بێدەنگی جیهان بهێنین، دیزاینی کتێبخانەکە گرنگ نییە، ناوەرۆکی کتێبەکان گرنگن، کورد گرنگە فیکرو جیهانبینی خۆی بگۆرێت، کە ئەمەریکا داوای دیداری مەزلوم کۆبانی کرد بۆ کۆشکی سپی تەڤگەری کوردیی هاوسەرۆکی ئەنجومەنی سوریای دیموکرات ئیلهام ئەحمەد یان نارد بۆ گفتوگۆ لەگەڵ ناوەندە ئەمەریکیەکان، ئەمەریکا کەسایەتی بۆ کورد دروست دەکات و تێکی دەشکێنێت، دەبێت کورد لەم یاریە تێبگات و دۆزی کوردیی، کێشە گەورەکە، بێدەوڵەتی و بێشوناسی، بە موخاتیب بگرین لەگەڵ ئەمەریکا نەک کەسایەتیەکان، جیهان لە سەردەمی مەلیک مەحمودەوە تا شێخ سەعیدی پیران و قازی محمد و بارزانی نەمر، تا مەزڵوم کۆبانی خەریکی ئەم گەمە ناشیرینەیە.
ئاخر بڕوانن ئەمەریکا لە چاوەڕوانی مەرگ و جینۆسایدکردنی رۆژاڤادا له و پەڕی ترۆپکی سۆسیالمیدیاو دیجیتاڵ میدیادا چۆن سیاسەت دەکات بەرانبەر بە کورد، کوردیش دەبێت مانۆڕو سەرلێشێوان و کۆنتراکتی ژێربەژێرو رێککەوتنی کاتی و ستراتیجی و چەندین گرێ و گۆڵ بخاتە گۆرەپانەکەوە با بچوک بێت، گفتوگۆی ئەسەدو روسیاو ئێران و سعودیه و هەموو ئەمانە بخاتە رۆژەڤ، بەمانایەکی تر پرۆسەی هیلاککردن و شێواندن گرنگە، کورد لەم دۆخەدا دەبێت مانۆڕ بکات لەبەرانبەر رێگریی لە سەپاندنی دیکتاتۆریەت و سڕینەوه و گۆڕینی دیمۆگرافیای کوردستان و رەشەکوژیی تورک و بێدەنگی ئەمەریکا، دڵنیام لە ئایندەی نزیک فۆرمی حوکمرانیەکان و کۆی دەسەڵاتە هەرێمی و نێودەوڵەتیەکان، بەم شێوەیە نامێننەوە. [1]
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End=