=KTML_Bold=میدیای بێدەوڵەت؟=KTML_End=
#ئاسۆ عەبدوللەتیف#
بە تەنیشت یادی دامەزراندنی کوردستان24، وەک ئەزمونێکی نوێ لە میدیای کوردی و گەیاندنی زانیاریەکان بۆ ناوخۆو دەرەوە، گرنگە لە هەمان ئه و شاشەیەوە ئەم دۆخەی کوردستانی تێدایە وا پێناسە بکەین، کورد ئەگەرچی دەوڵەتی نییە، بەڵام لە میدیاکەیەوە خەونی گەورە بەدی دەکرێت بەره و ستاتۆیەکی رەسمی و پەرچەمدار، میدیاو رۆژنامەگەریی کوردی بێ کەموکوڕیی نییە، بە هەموو کێماسیەکانیەوە کورد لە ئێستادا خاوەنی گوتارو دیسکۆرسێکی تەلەڤزیۆنی و ریتمێکی میدیایی هاوسەنگی خۆیەتی بەتەنیشت ئه و پێناسەیەی ترامپەوە کە دەڵێ کوردان خاوەن شەڕکەرو جەنگاوەری ئازان! دەبێت چەند ساڵێکی دیکە ئەم دروشم و سلۆگانەی زمانی سەرکردە جیهانیەکان بهێنینەوە بۆ ناو دنیای میدیاو رۆژنامەگەریی کوردیی.
میدیا وەک دەزگایەک کە بەرهەمی مۆدێرنێتەی دیموکراتی و شۆڕشی پیشەسازیی و چاپەمەنیەکانە لە سەدەکانی چواردەی زاینیەوە، لە سەردەمی ئیمپراتۆریەتی رۆمانی و داهێنانەکانی یوهان گۆتنبێرگی ئەڵمانی بە دروستکردنی چاپی سەرەتایی بە پیتی پچڕپچڕ لە ساڵی 1440 و تا داهێنانەکانی سەدەکانی دواتری چاپکردن و گەیاندن بە ئاسن و بوخارو تیشک و کاغەزو لەیزەرو رادیۆو تەلەڤزیۆن و کۆمۆنیکەیشنی بێتەل و هەواڵدەری کلاسیکی نامەبەر، هەموو ئەمانە بۆ یەک پرەنسیپی مرۆیی و سیاسی بووە، ئەویش زانیاری و هەواڵ بە دروستی بگاتە خوێنەر، تاوەکو دابڕان روونەدات.
کورد لە سەرەتای سەدەی نۆزدەهەم کە هێشتا شۆڕشی چەکداریی و بزوتنەوەی سیاسی نەبووە، دەستی کردوە بە هۆشیاریی و بڵاوکردنەوەی وشەی کوردیی، بە چاپ و بڵاڤۆکی گشتی و سیاسی و جڤاکی بۆ پارێزگاری لە بوون و زمان و کەلتور و پەچەی ژیانداریی و مەئوای خۆی، کاروانەکە تا ئەمرۆ گەشتووە بە چەندین سەختی و هەڵدێرو بندێری سیاسی و ئاستەنگی جیاواز جیاوازەوە، ناکرێت ئەم قۆناغە گەشەسەندووە لە میدیای لیبراڵ و ئەهلی و تایبەت و کوالیتی شاشه و بێژەرو هەواڵسازی بە ئەزموون و کامێرامانی لێوەشاوه و نەخش و دیزاینی سەردەمیانە بەهەند وەرنەگرین، دەوڵەت هەیە هێشتا میدیایەکی گەشەسەندوی نییه و فیگەرێکی میدیایی نییه و هێشتا نازانێت پیشەسازیی میدیایی و هەواڵ و دروستکردنی ریپۆرتاژو ریکلام چییه و چۆنە؟
ئێستا چەند دانەیەک لە میدیای کوردی بینراومان هەیە کە درێژەپێدەریی ئه و دیرۆکەیە، لە ناویاندا کوردستان 24، ئه و تایپە لە گوتاریی جددیی و هاوسەنگ لە گەیاندنی میدیایی و ئاوپرژێنکردنی هەستی کوردانی ناو وڵات و تاراوگە بە دیدی رۆشنی بۆ کۆی رووداوەکان، سەرەتای ئومێدێکی گەورەیە، رەخنەشمان هەیە هەندێک جار بۆ بە حیزبی کردنی هەندێ هەواڵ و روماڵ بەڵام هێشتا هەر دیدگاکە رۆشنه و بینیمان ئەم کەناڵە بۆ روماڵی هەڵبژاردنەکانی کوردستان و کۆی روداوەکانی رۆژئاوای کوردستان و چەند پرسێکی دیکە چۆن یەک ریتم بوون و هاوسەنگیان لەدەست نەدا، بەتایبەتی روماڵە سیاسی و ئابوریی و کۆمەڵایەتیەکانی ئەم کەناڵە بۆ رۆژاڤا، تاقیکردنەوەیەکی نوێی میدیایی و ئەزموونی حوکمرانی کوردیی بوو بەره و دروستکردنی پرۆژه و خەونی گەورەتر.
پەیوەندی میدیا بە گوتاری سیاسی و دۆزە مێژووییەکەیەوە، پەیوەندی کوردی باشوور بە پارچەکانی دیکەوە، یەک پاکێچ کردنی گوتاری سیاسی کوردیی بۆ جیهانی دەرەوە، هەموو ئەمانە گرنگی خۆی هەیە، ئەم جۆرە لە میدیا بۆ کورد گرنگیەکەی لەوەدا نییە هەوادارو بینەرێکی زۆی لە خۆی کۆکردۆتەوە بەڵکو چەقی قورساییەکەی ئەوەیە کورد لە غیابی دەوڵەت و پیشەسازیی دەوڵەتدارییدا، زانیاری دەوڵەتیانە و فۆرماتیکیانە ئاراستە دەکات و رای گشتی دروست دەکات، بەجۆرێک راستەوخۆ میدیای کوردیی لە ئاستێکی لۆکاڵ و ناوچەیی و حیزبیەوە بۆتە میدیایەکی جیهانی و یونیڤیرساڵ، تەجاوەزی دۆخی میدیای حیزبی زۆر زیاتری دەویست لەوەی بەم چەند ساڵە کراوە، بە کورتی، ئەم میدیایە سەرنج و فۆکەسەکانی خستە سەر روبەرە گشتیەکەی جیهان و ئاژانسەکانی جیهانیشی هێنایە سەر خوانی هەواڵە گەرمەکانی خۆی و ئەمەش دەستکەوتە بۆ ئێستاو ئایندە. [1]
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End=