=KTML_Bold=یەکگرتووی ئیسلامی، حیزبی ئیجباریی!=KTML_End=
#ئاسۆ عەبدوللەتیف#
کۆنگرەی هەشتەمی یەکگرتووی ئیسلامی کوردستان، دەرگای لەسەر چیرۆکێکی تازە بۆ ریفۆرم و ئیصلاح لەناو کادران و لایەنگرانی ئەم حیزبە کردۆتەوه و دیسان ریفۆرم و ناوگۆڕین و کێشمەکێشی ئەمیندارو ئەوانی دیکە و پرسی جیاکردنەوەی سیاسەت و بانگەواز بۆتەوە رۆژەڤێکی گەرم.
ڕەنگە ئیتر دواخستنی تەلەبی ئیسلاح و خواستی گۆرانکاری جددی و نەهێنانە پێشەوەی وزەی گەنج و گوتاری کلاسیکیانە بۆ سیاسەت و بانگەواز، ئینتیحاری سیاسی بێت بۆ ئەم پارتە ئیسلامیە، مۆدێلی نوێی کارکردن و نەخشەرێگای سیاسی و دیدی نوێ و تەتەڵەکردنی کادران بەتەواوی کاتی هاتوە، بەجۆرێک کۆنگرەی ئایندە دەبێت بە تۆپزیی ئەم پرسانە یەکلایی بکاتەوە، ئەگەرچی سەختە دەستکاریی روانگەی کلاسیکیانەی ئەمینداری گشتی بکرێت، لە کەوانەیەکدا هەموو کێشەکان نابێت بە عەلاگەی ئەمیندارەوە هەڵبواسرێت ئەوەش راسته و باوەرم وایە ئەم حیزبە هێشتا ئیلهام لە ئەمیندارەکەیەوە وەردەگرێت و بریاردان بە دەرەجەی یەک کۆکراوەتەوە لە یەک کەسداو ئه و کەسەش به و ئاسانییە کە قوڵاییەکی فیکریی و رێکخراوەیی و ئیخوانی و کاریزماتیکی هەیە، دەستبەرداریی کایەی سیاسی و کورسیەکەی نابێت، بەتایبەتی پرسی جیاکردنەوەی بانگەواز لە سیاسەت کە یەکێکە لە نەشتەرگەریە سەختەکان و وەک لە بێژنگدانی ئاو وایە ئاسان نییە، ئەمەش سروشتی تەواوی حیزبە رۆژهەڵاتیەکانه و بە ئاسانی مرۆڤ ناتوانێت هاتوچۆی تێدابکات و دەستکاری و چاکسازیی جومگە هەستیارەکانی بکات بەبێ لوتکەی هەرەمەکە، لە دامێنی هەرەمەکەشدا کەسانی هەلپەرست و حیزبکوژو گەندەڵ به و دەسەڵات و تەمەنە زۆرەی خۆیانەوە ماونەتەوە لەدەرەوەی هەموو رێکارو یاساو دیسپلین و لێپرسینەوەیەکی حیزبی، ئەمانیش هێندەی تر بازنەکەی دەوری ئەمینداریان توندترو تۆختر کردۆتەوە و رێگاکە سەختر دەکەن بۆ گۆرانکاریی و شەفافیەت و ریفۆرم، بۆیە پێش ئەمیندار پێویستە کۆنگرە دەستکاری ئەم هێڵەی پێشەوه و ئەم بازنە حیزبکوژە بکات، ئەم خڵته و پڵتەیە لابەرێت، هەڵەیە لە جوڵەی یەکەم دەستبەریت بۆ جوڵاندنی مەلیک و لوتکەی هەرەمەکە، سەرەتا دامێنەکە دەبێت پاک بکەنەوە له و کەسانە و چیتر بەسەری پیرۆزیان سوێندی تەنزیمی و رێکخراوەیی و پاکیزەیی نەخۆن!
یەکگرتووی ئیسلامی کوردستان حیزبێکی ئاینی ئایدۆلۆژیی مەزهەبگەرای نەرمرەوی هێمنە، لە سەروەختی ئیعلانی ئەم حیزبەوە لە ساڵی 1994 تا ئێستا، تاکە پێناسەیەک بۆ ئەم حیزبەی بکەین لەدەرەوەی عاتیفه و موجامەلەی سەرکردەکانی، ئەوەیە حیزبێکی ئیجبارییە بۆ کوردستان، بەدەرەجەی ئیرشادو پەروەرده و زەرورەتی فیکریی و سیاسی و مرۆیی، هەم لە بواری پەروەرده و ئیسڵاح، هەم لە بواری ئیتیکی سیاسی و مۆدێل و زیهنیەتی حیزبایەتی، ناکرێت گروپێکی دەسترۆشتووی خاوەن ئیمتیازو بەڵاو حەرەج بۆ سەر ئەم حیزبە، ئەم توراس و سەرمایە رەمزیە لە ئیجبارییەوە بۆ خەڵکی بگۆڕن بە ئیخیتیاری و شکۆی حیزب بکەن بە قوربانی پۆست و ئیمتیازو خوێندنی راقی مناڵ و کۆشکی شاهانەی کەس و کاریان؟
ئێستا کە یەکگرتوو بەتەواوی هێزی جەماوەریی و بیرو ئایدۆلۆژیی و رێکخراوەیی خۆیەوە خەریکی ریسک و دەستکاریکردنی ریشەیی و پەیرەوی ناوخۆیی کلاسیکیانەی خۆیەتی، گرنگە بە جورئەتەوە دەستبخاتە سەر برینە گەورەکه و گوێ بە هیچ کاردانەوه و خاترجەمییەکی ئه و تایپە نەدات کە قوڕکی حیزبیان توند گرتوه و ئۆباڵەکەشیان خستۆتە سەر گەردنی ئەمیندار و لای ئەمیندار قسەیەک و لە بازنە و ئوسرەکانیشدا قسەیەک، ئەگەرچی هەر بۆخۆی باسکردنی ئەم جۆرە لە برین و کێشه و بێشە لە حیزبدا هەنگاوی ئەرێنیە بەره و دۆزینەوەی رێگا راستەکە، ئه و رێگایەی چیتر نابێت ئەکتەرە کۆنەکان بەتەنها پاڵەوانی سەرەکی بن تیایدا، ئەوانەی زەمەنێکە لەگەڵ کاروانەکەدا هەم وەک کاروانچی و هەم وەک رێبەرو سەرکاری رەها، هاوکارو پشتیوان بوون و رەنگە ئیتر کاتی هاتبێت یەکگرتوو بە عەینەکەوە رێنەکات، چاوی گەنج و بیری تیژوو سیاسەتی هاوسەنگ بەبێ عەینەک گەشە پێبدات تاوەکو بتوانێت گوتاری سیاسی خۆی بگونجێنێت و ژینگەی سیاسی خۆشی بپارێزێت.
لە راستیدا دروستکردنی فۆرمێک بۆ ئیشکردنی دونیەویی پەرلەمانی و حکومیی لە دەرەوەی یەکگرتووی ئیسلامی، بەمانایەکی تر ئیئتیلافێکی سیاسی و هەیکەلێکی نوێ بەپێ پاشگریی ئیسلامی، هاوتەریبی مەرجەعیەتێکی حیزبی مەرکەزیی خاوەن دیسپلین بۆ پەروەرده و بانگەوازو شەریعەت و مزگەوت، دەرەنجامێکی پۆزەتیف ئەدات بەدەستەوە، وەک چۆن موقتەداو عامیریی لە بەغداد لە رێگایسائیرون و فەتح کردیان و سەرکەوتووش بوون، بەڵام پرۆسەکە بۆ پاکتاوی نەیاران و کێبرکێکارانی ناو حیزب و بازنەی مونافیسی ئەمینداریەت و کرده و گەمەیەکی تەکتیکی سیاسی نەبێت بۆ کپکردنەوەی دەنگە نارازیەکانی ناو کۆنگره و کۆنفرانسکاران، رێک هەنگاوی عەمەلی بێت بە دەنگی بەرز بۆ دروستکردنەوەی گوتار و دیسکۆرس و بڕیاردانی دروست لەم حیزبەدا، نەک باسکردنی پرۆسەکە بە تەدەروج و قۆناغبەندیی، ئەمە وەک ئەوەیە هیچ نەکرابێت، ئەم هەنگاوە چەند پێویستی بە جورئەتی سیاسی و مرونەتی رێکخراوەیی هەیە، ئەوەندەش پێویستی بە دروستکردنی کەشی لەبار هەیە بەره و کەلتوریی پێکەوەیی و دەستاودەستکردنی دەسەڵات و وەلانانی رق و بیرکردنەوەی ستالینیانە بۆ ئەوانی تر، ئەم سەردەمە ئەگەر سەردەمی دیموکراسی و گەشەی فیکرو کرانەوه و بیزنس و کۆنتراکتە گەورەکان بێت و جێگای هەموو دیارده و دەرکەوتێکی تێدا بێتەوە ئەوە بێگومان جێگای تۆتالیتاریەت و زیهنیەتی رەفزکردن و قۆرخکاریی و پاکتاویی بەرتەسکی تێدا نابێتەوە بەتایبەتی بۆ یەکگرتووی ئیسلامی.
خاڵێکی دیکەی کارکردن بۆ جیاکردنەوەی کایەی سیاسی و حیزبی لە کایەی بانگەوازو دەعوه و ئیرشاد پێویستی بە کاراکردنی رۆڵی دامەزراوە مەدەنیەکان و میدیاو سۆسیالمیدیای ئەم حیزبە هەیە، لە بری چەقداکوتین و وەستان لەناو مەنزومەی دامەزراوە شەرعی و کلاسیکیەکاندا هێنانە پێشەوەی کاراکتەرو گەنجی سیاسی و مەدەنی و لیبراڵ و نەتەوەیی و تەنانەت سیکولارو ئایدۆلۆژیای دیکە گرنگە بکرێتە ئەمری واقیع و جێگای بێتەوە، ئەمە تەجاوزی رابردووه و ریفۆرمە لە هەیکەلی کاری رێکخراوەیی، بۆ ئەوەی پیاوانی ئۆردوگانشین چیتر بوەستن و دەستێوەردانەکانیان راگرن تا یەکگرتوو بە فۆرمێکی ترەوە لە کۆنگرە بێتە دەرەوە، ئەمە دەریچەیەکە ئەگەر بیانەوێت یەکگرتووەکەیان وەک هاوکێشەیەکی ئیجباریی بمێنێتەوه و کۆمەڵگا قبوڵی بکات و دوچاری ئیحراجی گەورە نەبێتەوە لە هەڵبژاردنەکاندا.
دواجار کێشەی یەکگرتوو ئەوەیە تا ئەم ساتەوەختە بۆ پەروەرده و دەعوە دروست بووە، حوکمرانیکردن و موشارەکەی سیاسی پێویستی بەڤێرژنی نوێ و روئیاو روانگەی دیکە هەیە کە یەکگرتوو دەبێت لەمەودوا تەوزیفی بکات و ترسی لە رەخنه و نارەزایەتیەکانیش نەبێت، نەک سیاسەت بە سەرئێشه و ترس بۆ سەر یەکگرتوو هەژمار بکەن و بیانەوێت بە تەدەروج دەعوه و بانگەواز لە سیاسەت جیابکەنەوە، کە لەراستیدا ئەم تەدەروجە دوورخستنەوەی رەمزە دیارو گەنجەکانی یەکگرتووە لە کایەی دەسەڵات و رێک گەرانەوەیە بۆ خاڵی سفرو چوارگۆشەی سەرەتا و مانەوەی یەکگرتوو لەم دۆخە پاسیڤەی ئێستادا. [1]
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End=