نیشتیمانی با و...                         
نووسینەوەی سیمای نەسیم و..                 
خوێندنەوەی زەردەپەڕی ئێوارە                        
نووسەر: #حەمە ئەحمەد جاف#

بەسەرکۆڵی
گۆچانی ماندووی تەمەنەوە
بە ئاسۆی  فڕیندا هەڵزنام و
بەسەر شاباڵی نیشتمانی بادا  هاتم  !
هاتم و 
لەتراویلکەی ماچی  مەمکی
زەردەپەڕی ئێوارەدا توامەوەو
لە هەناسەی تایتانیکێکی تێکشکاوی،..
خنکاودا غەڕق بووم !
من لەوێوە
بەسەرباڵی بادا  ، هاتم
هاتم و
بەسەر چڵی دارهەنارێکی
ساڵی حەفتاوحەوتی تەمەنێکدا نیشتمەوە و..
لەچەمی چرپەی
خەندەی خاوی خەواڵووی ،
ئێوارە پاییزێکی خەنەیی
شارێکی سپییدا نقوم بووم!
ئەو ئێوارەیەی ،.
خۆم  لەباوەشی
خەندەی ژنە قەرەجێکی  بێ‌ نیشتیمان و  
خەیاڵی خەمێکی خنکاودا بینی و
لە کوانووی  نیگاکانی  شارێکی سپیدا توامەوە!
توانەوە لە زەردەخەنەی،..
  سەرلێوی  ئاڵی ئەودا
ئەوی  قەرەج  !
پێکەوە لەگەڵ
ئەشکی شەوانی تەنیایی و..
ڕژانی ڕۆشنایی
چراکانی نیشتیمانی (با) دا
هاتین
بێ ئاوڕدانەوە پێکەوە  هاتین و..
نیگامان،..
لەنیگای سەوزی سەرابی ،
سنەوبەرە سووتاوەکانی ئەزمڕدا تواندەوە و...
ڕۆیشتین !
لەوێ ..لەنیگای،
تابلۆیەکی ڕەشی شارێکی خنکاودا
ترس و
لە زەڵمی   گۆی مەمکی گوڵناری پاییزیدا
غەڕق و
لە شاری سپی نیشتیمانی
دڵی  (با) دا..  ئەو  !
ئەم ئێوارەش
لە گێژەنی دەریای عیشق و 
  ڕەوی  ڕێ و
  قودرەتی شیعرێکی  ڕدێنسپی و
   هەنگاوی گۆچانێکی ماندوودا
پەڕیمەوە ناو تروسکەی زەردەخەنەی ،
قوتیلەی بەرهەیوانی
خانووە قوڕەکانی  نیشتیمان
ئەو نیشتیمانەی
لە چاوی شینی ئاودا
ژیان دەنووسێتەوە و
  لەشەپۆل دا
(با )دەخوێنێتەوە
نیشتیمانێک
بۆن عارەقی  باڕو..
نێرگەلەی سەرلێوی قەیرە ژنەکانی شارو  پۆستاڵی حەیتەی 
شەوانی شەقامی  ترس و
غوربەت  و تەنیایی لێدێ !
نیشتیمانێک
بەمژۆڵی چاوی خەواڵووی
  قەڵەمێکی زیزو توڕە
وردە شووشەی ئاوێنە شکاوەکانی
  عومرێکی درێژو بابردەڵەی
لەخۆیدا خڕکردەوە و
خستیە نێو
ئەنگوچکی  کراسێکی ڕەشی 
ژنە پێشمەرگەیەکی شەهیدەوە
ئەوژنەی ،
جۆگەلەی فرمێسکەکانی
لەچەمی چاوی تەئریخێکی
بێ نیشتماندا قەتیسکردو
لە گۆڤەندی   شایی شاردا
بووبە چلوورەی گوێسوانەی خەم و
   دەسرۆکەی شاباش و  سەرچۆپیی 
ڕەشبەڵەکی بووکی سپی
نێو کەژاوەی گریانی خاک و
قوڵەباڵی لوتکە و
کۆڵوانەی   کۆڵی شاخ .
  کۆڵوانەی سووری ئەو ژنەی 
لە پاییزی غوربەت و نەهامەتیدا
  ڕۆژژمێری عومری هەڵوەری !
ئەو ئێوارەیەش
لەنیگای ژوانێکی سەوزی خنکاودا 
سووراوی ماچێکی گەرمی  لێوی  گۆیژە
بە سەرلێومەوە بەجێما و..
پاییز لە سەر پەنجەکانما  لەدایکبوو
ئەوپاییزەی،..
ژوانی تێکئاڵانی پەنجەکان و
ڕژانی  ڕۆشنایی
فتیلەی نیگای سووری نیشتیمانێک
تارمایی تابلۆی
چاوی ئێوارەیەکی تەڵخی
لە مەئوای گۆچانی شاعیرێکی پیرو
تەئریخی ماچێکی ماڕۆنی
  شەوی یەڵدای  من و ئەودا !
خوێندەوە !!
خوێندنەوەی (با)و..
زەردەپەڕی ئێوارەیەکی پڕ لەچاوەڕوانی 
دەنگی زەنگ و جیڕەی دەرگای
دووەم هۆدەی نهۆمی دووی
وڵاتی  کچی ئاگر و
باوەشی شار
بەسەرئاوارەیی مندا کڵۆمدەداو
لە سەر ڕوومەتی ڕۆشنایی
چرای چاوی ژنە قەرەجێکی ئەسمەری
قژ ڕەشماڵی  دەواری بەر ئاواییدا
             سەعاتی تەوقیتی ژوان و
تەئریخی سپی زریان و
(رەشەبا)ی شارێکی سەوزی
نیشتیمان دەنووسێتەوە  !
نووسینەوەی سیمای نەسیم و
تێکئاڵانی هەودای  بسک و
سیحری پەنجەی پەمەیی با و
قەیرە کچەکانی نیشتیمانی سوور
خوێندنەوەی
شکۆی قەڵەمی شنەی شیعرو
بای نەسیمی      
سیمای ئەوعیشقەی دێرینەی
لەنیشتمانی سەوزی تەمەندا درەنگ هەڵدەکاو..
لە سەر سینەی سپی ژواندا
ژن و ژیان دەنووسێتەوە! [1]