دواڕۆژ، هانا چۆمانی
قایمقامی شنگال ڕایدەگەیەنێت، بەردەوام لە هەوڵی دۆزینەوەی بێسەروشوێنانی ئێزیدین دەستی داعشین و، بەپێی زانیارییەکانیش تەنیا لە سنوری قەزاکە پێدەچێت نزیکەی 60 گۆڕی بە کۆمەڵ هەبن.
مەحما خەلیل، قائیمقامی قەزای شنگال ئەمڕۆ سێشەممە 18ی نیسان بە دواڕۆژی ڕاگەیاند لەگەڵ وەزارەتی شەهیدان و ئەنفالکراوان و ڕێکخراوەکاندا بەردەوام بەدوای چارەنوسی ئەو هاوڵاتییە ئێزیدیانەدا دەگەڕێین کە لەلایەن داعشەوە بەدیلگیرابوون، لەکاتی هێرشەکەیاندا بۆ سەر ئەو سنورە و تاکو ئێستاش 35 گۆڕی بە کۆمەڵ دۆزراونەتەوە.
وتیشی لە کۆی ئەو گۆڕە بە کۆمەڵانە تەرمی زیاتر لە هەزار و 700 هاوڵاتی ئێزدی دۆزراوەتەوە، کە سەرجەمیان ئەو ئێزدییانەن کە لەلایەن داعشەوە لە مانگی ئابی ساڵی 2014 ڕفێنران و دواتریش بە دیلی کوژراون.
مەحما خەلیل، ئەوەشی ڕونکردەوە، بەپێی بەدواداچوون و لێکۆڵینەوەکانی ئێمە هەروەها بەپێی ژمارەی هاوڵاتیانی بێسەروشوێن، پێدەچێت کۆی ژمارەی گۆڕە بەکۆمەڵەکان بگاتە 60 گۆڕ، چونکە هێشتا گەڕان بەدوای ڕوفاتی قوربانیان بەردەوامە.
سێشەمەی ڕابردووش لیژنەی باڵای بە جینۆسایدناساندنی دۆسیەی ئێزدییەکان ئاشکرایکرد، 35 گۆڕی بە کۆمەڵ لە سنوری شنگال دۆزراوەتەوە و، زیاتر لە هەزار بەڵگەی جۆراوجۆریشیان لەبەردەستدایە لەسەر جینۆسایدکردنی کوردانی ئێزدیی و ڕادەستی دادگای تاوانی نێودەوڵەتیان کردووە.
18-04-2017