دواڕۆژ، #رەڤەند گوهەرزی#
سەندیکایێن کرێکارێن کوردستانێ لقێ #دھوک#ێ ئامارا روویدان و بنپێکرنێن ساڵا 2017 بەرامبەر کرێکاران ل سنوورێ پارێزگەھا دھۆکێ دکونگرەیەکێ رۆژنامەڤانیدا ئەڤرۆ پێنجشەمبی 4ێ کانوونا دووێ، راگەھاند و دیارکر، ل ساڵا دەربازبوویی 14 کرێکاران ژیانا خوە ژ دەستدایە و 300 بنپێکرن ژی بەرامبەر کرێکاران ھاتینە تومارکرن.
عیسا نسری، سەرۆکێ لقێ دھۆکێ یێ سەندیکایێن کرێکارێن کوردستانێ راگەھاند ل ساڵا 2017 ل سنورێ پارێزگەھا دھۆکێ 14 کرێکاران ل دەمێ کاریدا ژیانا خوە ژ دەستدایە و 28 ژی برینداربووینە کو پێنج ژ وان کرێکارێن بیانی بوون.
گۆت ژی 300 بنپێکرن ژی بەرامبەر کرێکاران ھاتینە تۆمارکرن.
نسیرى دوی کونگرەیدا ديارکر، 188 کێشەیێن کرێکاران ھەتا نوکە ب ھەلاویستی ماینە و نەھاتینە چارەسەرکرن و سێ ژی ھاتینە رەوانەکرن بۆ دادگەھێ و ئەوێن دی ژی یێن ھاتینە چارەسەرکرن.
ناڤھاتی راگەھاند ژی، 27 ھزار و 797 کرێکاران ل لقێ دھۆک یێ سەندیکا کرێکارێن کوردستانێ وەکو ئەندام ناڤێ خوە تۆمارکریە ژوان ژی 491 کەس ئەندامێن ژنن و 115 ژی کرێکارێن بیانی نە.
ل گور گۆتنا سەرۆکێ لقێ دھۆکێ یێ سەندیکایێن کرێکارێن کوردستانێ، دناڤ ھەموو ئەندامێن کرێکاران دا بتنێ 154 کرێکار یێن ھاتینە خانەنشینکرن.[1]
#05-01-2018#