بەپێی نوێترین ئامار: کێڵگەکانی پەلەوەر لە سنووری پارێزگای #سلێمانی# لە چوار مانگی ڕابردوودا نزیکەی 38 ملیار دینار زیانیان پێگەیشتووە. هۆکارەکەشی بۆ ئەوە دەگەڕێتەوە: حکومەتی عێراق ڕێگە نادات مریشکی بەرهەمهاتوو لە کێڵگەکانی هەرێمی کوردستان، بنێدرێنە بازاڕەکانی باشوور و ناوەڕاستی عێراق.
نازم عەبدوڵڵا جێگری سەرۆکی کێڵگە پلەوەرییەکانی سلێمانی دەڵێ زیانێکی زۆر بە کێڵگە پەلەوەرییەکانی سلێمانی و هەرێمی کوردستان کەوت، زیاتر لە 38 ملیار دینارمان زەرەر کرد، بەهۆی ئەوەی نرخی مریشک بەشێوەیەکی خەیاڵی دابەزی، هەمو کیلۆیەک مریشک دوو هەزار و 250 دینار لەسەر خۆمان دەکەوێت، ئێمەش بە 900 بۆ 1250 دینارمان دەدا.
بەرزونزمی نرخەکان، کاریگەریی ئەوتۆی لەسەر ساخکردنەوەی مریشکی بەرهەمهاتوو لەبازاڕەکانی نێوخۆدا نەبووە، پاڵنەری بەهێزیش بۆ ئه و خواستە زۆرە، پەیوەستە بەوەی گۆشتی مریشک بووەتە یەکێک لە خواردنە سەرەکییەکانی هاونیشتمانییان.
فەرەیدوون عەبدوڵڵا، مریشکفرۆشە و دەڵێ ئەگەر دەرگای بەغدا دابخرێت، خاوەن کێڵگە پەلەوەرییەکان زەرەر دەکەن و خەڵک قازانج دەکات، ئەگەر مریشک بە هەزار دینار بێت، یان 10 هەزار دینار، خەڵک که بیەوێت بیکڕێت، هەر دەیکڕێت، بۆیە ئێمە قازانج دەکەین و خاوەن کێڵگە پەلەوەرییەکان زیان دەکەن.
هەرچەند نرخی مریشک بەپێی ڕۆژ جیاوازە، بەڵام کڕیاران پێیانوایە ئه و نرخە لەچاو نرخی ماددە خۆراکییەکانی دیکەدا هێشتا باشترە.
بەرهەم سابیر، کڕیاری مریشکە، دەڵێ گۆشتی مریشک بووەتە خۆراکێکی ڕۆژانەی خەڵک، نرخەکانی خراپ نین، لەگەڵ ئەوەی خواستی خەڵکی لەسەرە، گران نییە، هەندێ بابەتی خۆراکی کە خواستی لەسەربوو گران دەکرێت، بەڵام مریشک زیادکردنی لەسەر نییە.
کاروان ئیبراهیم، کڕیارێکی دیکەیە و باسی ئەوە دەکات نرخی مریشک بەرز و نزمی دەکات، لەم ماوەی پێشوودا باش بوو لەگەڵ گیرفانی خەڵک دەگونجا، بەڵام ئێستا جێگەی ڕەزامەندی نییە. ئێستا نرخ بەرزبووەتەوە و خەڵک توانای نییە بیکڕێت.
لە هەرێمی کوردستان نزیکەی سێ هەزار کێڵەگەی پەلەوەری هەن، 683 کێڵگەیان دەکەونە پارێزگای سلێمانی و دوومانگ جارێک حەوت ملیۆن و 74 هەزار تۆن مریشک بەرهەمدەهێنن، کە ئەمەش دوو ملیۆن 500 هەزار تۆن لە خواستی بازاڕ زیاترە و بەهۆی ئەوەی حکومەتی عێراق ڕێگەنادات مریشکی کوردستان هەناردەی باشوور و ناوەڕاستی عێراق بکرێت، کێڵگەکانی پەلەوەر بەبڕی دەیان ملیار دینار زیانیان پێگەیشتووە.[1]
#22-07-2018#