#پشکۆ نەجمەدین#

ئەزموون و یاد، ناونیشانی بەرگی سێیەمی نووسینە یاداشتەکانی نووسەر پشکۆ نەجمەدینە و ناوەندی غەزەلنووس چاپ و بڵاوی کردۆتەوە.
نووسەر دەربارەی ئەم کتێبە، لە پێشەکیدا نووسیویەتی:
کتێبی سێهەم، گێڕانەوەی بەشێکی ڕووداو و ئەزموونەکانن، لە ماڵەکانی تەنیایی غوربەتەوە. من دڵنیام کە ئێوە لە کۆڵانە تەنگ و پێچاوپێچەکانی کتێبەکانی یەکەم و دووەمدا، لەگەڵ ڕووداوەکان و کارەکتەرەکانیاندا، ڕووبەڕوو دانیشتن، قسەتان کرد و پاشانیش پیاسەیەکتان بە کەناری جۆگەلەی خوێنەکان و دیواری زیندانەکاندا کرد.

کتێبی سێهەم، گێڕانەوەکانی منی قسەکەر و جاروباریش منێکی ماندووی بێدەنگ و حەپەساوی ژێر گورزی پێشهاتەکانە. من دەگێڕمەوە و کەسانی دیکەش دەگێڕنەوە. من، پشتکۆ، ماریا و نالی، هەر چوارمان، حیکایەتەکانی ئازاری ژیان و مەینەتییەکانی خۆمان و میللەتێک دەگێڕینەوە کە ئێستا، خۆشبەختانە، قەدەر بەردەوامی ژیانی پێ بەخشیوە.