تەشيەک بەن بادە خۆت لەبێ حەيا لادە
تەشی ڕێسی کارێکی ئاسان نی يە و لەکۆندا زۆر بەسەر تەشی ڕێس وتراوە(تەشی لەڕێوە دەڕێسێت) يان(تەشی ڕێس تەشی ڕێس بێت بەکلکی کەرێوە دەيڕێسێت) لەگەڵ ئەمەشدا تەشی ڕستن کارێکی ئاسان نی يە و هەموو کەسێک نەيتوانيوە بيڕێسێت، بەن-يش لە خوری مەڕ يان موی بزن دروست دەکرا، تەشيەک بەن واتە(گڵۆرە يان خڵۆرە)يەک ئەمەش شان و پيل و کات و ماوەيەکی دەوێت تاوەکو دەتوانی تەشيەک بەن بادەی هەڵبەت لەبەر ووردی و زۆر ماندووبون و هيلاکی، بێ حەيا واتە بێ شەرم خەڵکی بێ شەرم لەيەک کاتدا کوێستان و گەرمێن بکات بەبای گوێ-شيا نايەت، هيچی پێ شەرم و(عار) نی يە، هەروەک پەيامبەری ئيسلام فەرمويەتی(ئەگەر شەرمت بەخۆت نەبوو چی دەکەيت بيکە) بۆيە کورديش ئامادەيە يەک تەشی بەن بڕێسێت تاوەکو ڕووبەرووی کەسێکی بێ حەيا و شەرم ببێتەوە، هەر لەبەر ئەمەشە بە دەريڕينەوە وتويەتی(تەشيەک بەن بادە خۆت لەبێ حەيا لادە).