بنەماکانی دەرووندروستی و ژیانێکی بەرهەمدار
گرنگە ئاگاداری ئەو بیرۆکە و ئەندێشە و وتانە بین کە ڕۆژانە لە ڕێگای هەستەوەرەکانمانەوە دێنە ناو ئاوەزمانەوە، چونکە بە تێپەڕبوونی کات، زۆربەی ئەو بیرۆکە و ئەندێشە و ڕووداو و وتانە گۆڕانکاری لە کار و فرمانی پڕۆسەی شیکاریکردنماندا دروست دەکەن و بەمەش هەستەکانمان و ئەندێشە و بیرکردنەوەکانمان گۆڕانیان بەسەردا دێت، جا بە باش بێت یان بە خراپ.
دەرەنجامی ئەم گۆڕانکارییەش لە ڕەفتار و گوفتار و کارکردن و مامەڵەی ڕۆژانەماندا دەردەکەوێت، بە باش بێت یان خراپ.
بۆیە زۆر گرنگە بەباشی مامەڵە بکەین لەگەڵ هەر یەکە لە سێ ڕەهەندە سەرەکییەکەی دەرووندروستی، کە ئەوانیش بریتین لە:
- خۆشنووندیی دەروونی (ئارامیی دەروونی)
- ئارامی و ئاسایشی کۆمەڵایەتی.
- بەرهەمداربوون.
باش مامەڵەکردن لەگەڵ ئەم سێ چەمکە و پاراستنی هاوسەنگیی نێوانیان، زامنی پاراستنی دەرووندروستیمانە، بەمەش دەبینە تاکێک کە خزمەتی خۆمان و چواردەورمان دەکەین و دەگەینە ئەو خۆشگوزەرانییەی بەدوایدا دەگەڕێین.[1]