نامۍ: شێخ عوسمان
نازنام: سیراجەدین
نامۍ تاتەی: خالید ئاغا
نامۍ ئەڎێ: حەلیمە
ساڵەو ئامای دنیای: 1781
یاگۍ ئامای دنیای: تەوېڵۍ - هۆرامان
ساڵەو کوچی دمایی: 1868
یاگۍ کوچی دمایی: تەوېڵۍ - هۆرامان
$ژیواینامە$
شېخ عوسمان هەر بە زارۊڵەیی حەزش بە وانای کەردەن و قورئانش وانان و خەتمش کەردەن، جە وانگا ئایېنەکاو(تەوېڵۍ، بیارۍ، خەرپانی، خورماڵ،. هتد) عیلم و (نەحو، سەرف، عیلمی شەرعیش) وانان. دماتەر بە وایەو یاوای بە پلێوە ڕوحی بەرزی، لوان پەی شارو بەغڎای پەی مزگی شېخ عەبدولقادری گەیلانی، چاگە دەسش کەردەن بە وانای و خەریک و زیکرو فیکرو حەلقەی خوڎا پەرەسی بیەن. ساڵەو(1811ز) مەولانا خالیدی نەقشبەندی حەلیفەو(شېخ عەبدوڵڵای دەهلەوی) جە وەڵاتو هیندستانیۆ مەگېڵۊوە پەی عیراقی و جە مزگی شېخ عەبدولقادری گەیلانی نیشتەجابۊن، شېخ عوسمان مەلۊنە خزمەتش و تەمەسوکش پەنەکەرۊن و پېسە موریدێ خزمەتشەنە مەنۊوە. شېخ عوسمان وەڵتەر مەولانا خالیدش ئەشناسان کە جە مەدرەسەکاو(بیارۍ، تەوېڵۍ، خەرپانی، خورماڵ) ینە ئاشناییشان بیەن. شېخ عوسمان پېسە موریدێ دڵسوزو مەولانا خالیدی خەریکو زیکرو فیکرو خوڎا پەرەسیەن، تا ساڵەو(1816ز)ی ئیجازەو تەریقەتی وەرگېرۊن و مەبۊن بە خەلیفەو مەولانا خالیدی، کە یەکەمین کەسەن ئیجازەش جە مەولانا خالیدی وەرگېرتەن. شېخ عوسمان خەلیفەو دڵسوزو مەولانای تا سەردەمو سەفەرو مەولانای پەی (شامی) خزمەتشەنە بیەن و دمای سەفەرەکەیش بە فەرمانو مەولانا خالیدی مەگېڵۊوە پەی شارو سلېمانی و جە خانەقاو مەولانای خەریکو ئیرشادی بیەن. تەنیا پەی ماوەو یەرۍ ساڵا جە شارو سلېمانی مەنۊوە و دماتەر یەکجاری شار جیامازۊو مەلۊوە پەی(بیارۍ)، چاگە بەردەوام خەریکو ئیرشادی بیەن و جە گردلێوە زاناو پیاخاسەکۍ مەیانە خزمەتش و تەریقەت وەرگېران. ساڵەو(1854ز) بیارۍ جیامازۊو مەگېڵۊوە پەی(تەوېڵۍ)، چاگە تا وەختو کوچی دماییش خەریکو ئیرشادی و خوڎا پەرەسیەن.
شېخ عوسمان زیاتەر جە(83) هەشتاو یەرۍ خەلیفېش بیېنۍ و چڼەها مەنسوبېچ کە پلەشان نەیاوان بەخەلیفەی.[1][2]