بە پێی ڕاپۆرت و بەدواداچوونێکی (باسکورد) لە سەرەتاکانی سەدەی ڕابردوو چەند ماڵێکی جوو لە گوندی ڕۆست نیشتەجێ بوونە و لەگەڵ موسڵمانەکان ژیاون، ئەم جووانە کەنیشتەی تایبەت بە خۆیان هەبووە بۆ عیبادەت، هەروا گۆڕستانی تایبەتیش بە خۆیان.
کوردە جووەکان لە سەدەکانی ڕابردوو دانیشتووی هەر چوار پارچەی کوردستان بوونە و هەڵگری زمان و ناسنامەی کوردی بوونە، هاوشێوەی خەڵکی ناوچەکە ژیان و گوزەرانیان بەڕێکردووە. لە ناوەڕاستی سەدەی ڕابردوو لە پاش دروستبوونی دەوڵەتی ئیسرائیل، بەرەو ئەو وڵاتە کۆچیان کردووە، بەشی زۆریشیان بە زۆرەملێ لەلایەن دەوڵەتی عێراق و ڕژێمی ئەوکات بەرەو ئیسڕائیل دەرکراون.
بەپێی سەرچاوە مێژووییەکان لە سەرەتای سەدەی ڕابردوو، بگرە پێشتریش چەند خێزانێکی جوو ڕوویان لە گوندی #ڕۆست#ی سەر بە قەزای چۆمان لە دەڤەری باڵەکایەتی کردووە، گوندی ڕۆست مێژوویەکی زۆر کۆنی هەیە و خاوەن کولتوورێکی ڕەسەن و بەناوبانگە، ئایینەکانی دیکەیش لەوێ بوونیان هەبووە، هەر بۆیە چەندین گۆڕستان لە سنوورەکەدا هەن، وەک دیاریشە شێوازی ناشتنی مردووەکان لەنێوان ئایینەکان جیاوازە و ئەمەش وا دەردەخات کە جووەکان لەو کاتەدا گۆڕستانی تایبەت بە خۆیان لە گوندی ڕۆست هەبووبێت و لە ئێستاشدا شوێنەواری گۆڕەکانیان دیارە.
وەک باسیشی لێوەدەکرێت: مێژووی گەڕانەوەی جووەکانی دۆڵی ڕۆست بۆ ساڵانی (1947 - 1948) دەگەڕێتەوە، کە ئەوکات گوندی ڕۆست 23 ماڵە جووی لێ بووە، دواتر لەگەڵ دروستبوونی دەوڵەتی ئیسڕائیل دەڤەرەکەیان بەجێ هێشتووە و بەرەو وڵاتی ئیسڕائیل کۆچیان کردووە.
کرێکار قادر، خەڵکی گوندی (ڕۆست)ی سەر بە قەزای چۆمان، چەند لێکۆڵینەوەیەکی لەسەر مێژووی دەڤەرەکە کردووە، بە (باسکورد)ی ڕاگەیاند: هەرچەندە لە مێژوویەکی کۆن جووەکان لە گوندی ڕۆست ژیاون، بەڵام سەرچاوەیەکی دروست لەبەردەستدا نییە بۆ ئەوەی بزانرێ لە ساڵی چەند ڕوویان لەو گوندە کردووە، لە لێکۆڵینەوە و بەدواداچوونەکانمدا خەڵکی گوندمان دواند، دەڵێن کاتی خۆی جووەکانی گوند لەسەر ئایینی خۆیان بوون و شوێنی پەرستشی خۆیان هەبووە، کە پێی دەڵێن کەنیشتە، هەروەها هاوشێوەی خەڵکی دیکەی ناوچەکە کار و کاسبی و ژیان و گوزەرانیان بەڕێکردووە.
بەپێی سەرچاوەکان، جووەکانی ڕۆست بۆ بژێوی ژیانیان کاری بەرگدروویی و کرێکارییان کردووە، تەنانەت ئەوەندە دڵسۆزبوونە پارەیان بۆ دروستبوونی دەوڵەتی ئیسڕائیل کۆکردووەتەوە و ڕەوانەیان کردووەتەوە.
ئامادەکردنی: #سارا سەردار#
[1]