سڕڕێ وەحدەت ژ ئەزەل گرتییە حەتتا ب ئەبەد
واحد و فەردە ب زاتێ خوە وی نینن چو عەدەد
د قدەم دا ئەزەل و عەینی ئەبەد هەردو یەکن
سەرمەدییەت وە دخوازت نە ئەزەل بت نە ئەبەد
فەرقە واحد ژ ئەحەد لێ د مەقامێ سەمەدی
ب حەقیقەت کو یەکن هەردو چ واحد چ ئەحەد
یەکە دەریا تو بزان قەنج چ مەوج و چ حەباب
د ئەسل دا کو حەمی ئاڤە چ ئاڤ و چ جەمەد
ئافتابێ ئەحەدییەت د خوە دا گرتییە کەون
نە کو عەورەک هەیە لێ گرتییە چەهڤێن مە ڕەمەد
حوسنێ زاتێ بوت و لاتان ژ جەمالا سەمەدە
ژ مسالێ سەنەمی وەه کو تەجەللایا سەمەد!
غەیری دەریا نییە سەحرا ب حەقیقەت ئەمما
ژ ڕووێ کەیفە کو ئەڤ ئاڤە بوویی شوبهی زەبەد
«کل يوم هو في شأن» نەبی غافل ژێ
هەر پەیاپەی ژ شوئوونان دکرت فەیز و مەدەد
گەر د ئادەم بدیا سڕڕێ علم ئبلیسی
«حَينَما أبصرهُ کَبَّرَ حيناً و سجد»
چ زەمان و چ مەکان و چ جهاتن چ حودوود
چ مەقادیر و تەفاسیل و حسابن چ عەدەد
چ مونافات و لوزوومن چ قیاس و چ مسال
ئەڤ چ تەولیدە و چ تەرکیبە چ ڕووحن چ جەسەد
سەر ب عەجزێ ددەرت قووەتێ دەرراکەیێ ما
«رجع القلب کليلا و متي قام قعد»
حیرەت و عەجزە سەرەنجام د بابێ نەزەرێ
«کی به خالق نظر قاصر مخلوق ڕسد؟»
گوفتوگۆ مەعرفەتێ چەندی مەلا پەیدا بکی
گەوهەرا مەعرفەتێ ناگهتێ کەس ب خرەد
#مەلای جزیری# [1]