خەنجەری خێڵ 04
#شەماڵ بارەوانی#

ئێره سەر زەمینی ئەبێ و نابێکانە..!
بۆ ئەوەی بەهەشت بناسم
ئەبێ ڤۆدگا تەرک بکەم
ئەبێ ببمە ژنێکی باڵاپۆش
ئەبێ خۆشەویستی هاک کەم!!
ئەبێ و...
ئەبێ و...
ئەبێ....(1)
ئێرە مەملەکەتی ئەبێیەکانە.
لێره هەر ڕۆژەی دنیایەک ئەبێ و نابێ لە دایک دەبن و هەر ئەبێ و نابێیەی
ئەژدەهایەکە بۆ ژیانی مرۆڤەکان و ئازادی ژن.
ئەبێ وا پاڵکەویت، نابێ وا دایکەنیت، ئەبێ وا بیمژیت، نابێ وا میزبکەیت و ئەبێ وا بڕیت.
ئەبێ زەوقی مێردەکەت ڕابگریت و تێر گانی بکەیت و جوان ڕانەکانتی بۆ بەرزەوەکەیتەوە و بیگەیەنیت بە ترۆپکی ئۆرگازم،
گەرنا فریشە لە ئاسمانەکان، لە ئێوارەوە تا بەیانی نەفرینت بەسەردا دەبارێنن.
بە باش و خراپەوە، نابێ لە فەرمانەکانی باوکت بچیتە دەر، گەرنا تۆ کچێکی بێ حەیا و بەد ڕەوشتی.
ئێرەسەر زەوینی ئەبێ و نابێکانە!
لە ناو خێزاندا ژیانمان هەمووی بە کۆمەڵێک ئەبێ و نابێ تەنراوە.
ئەبێ و نابێیەکانی باوک، ئەبێ و نابێیەکانی برا،
ئەبێ و نابێیەکانی باپیرە...
لە کۆمەڵ هەر ئەبێ و نابێ!
ئەبێ و نابێیەکانی خێڵ، ئەبێ و نابێیەکانی نەریت، ئەبێ و نابێیەکانی کولتوور، ئەبێ و نابێیەکانی مەزهەب، ئەبێ نابێکانی ئایدیۆلۆژیا.
لە قوتابخانە دیسان هەرئەبێ و نابێ، ئەبێ تەنها مامۆستا لە شێوەی ئەفسەرێکی نازیزم قسەبکات و تۆ تەنها گوێی بۆ بگریت و نابێت جگە له بەڵێ هیچیتر بڵێیت.
ئەبێ هەموو وانەکانت توتی ئاسا و بە جوانی ئەزبەر بکەیت و گەر هیچیشی لێ حاڵی نەبیت، نابێت بڵێیت بێ زەحمەت دەتوانیت دووبارەی بکەیتەوە؟
ئەبێت لە هەر قسەیەکی گەورەکان، به باش و خراپەوە، نەچیتە دەر.
ئێرە نیشتمانی ئەبێ و نابێیەکانە، ئێرە ئەبێستانە.
ئەبێ و نابێکانی پیاوانی ئایین و مەزهەب و ئایینەکان،
ئەبێ تەبای عامێ بچیتە شامێ، ئەبێ دەمارگیربیت و کوێرانە شوێن ئاڕاستە و ئیدەلۆژیایەکی دیاری کراو بکەویت، ئەبێ لەسەر حزبی باپیرەت و ئاینی باوکت و مەزهەبی خێلەکەت بیت.
ئەبێ باوەڕت به یاساکانی خێڵ هەبێت،
ئەبێ به موو لە مێنتاڵێتی خێڵ لانەدەیت،
ئەبێ سوێند بە خەنجەری خێڵ و پیرۆزی خێڵ بخۆیت.
ئەبێ گوێ لە مۆزیک نەگریت، ئەبێ وێنە و تابلۆ نەکێشیت، ئەبێ نەڕۆیتە باڕ، ئەبێ سەما نەکەیت، ئەبێ قژت داپۆشیت، ئەبێ لە دووای سێبەری پیاو بڕۆیت، ئەبێ لە کاتی قسەکردنا دەنگت بەرزنەکەیتەوە، ئەبێ توخنی دڵداری نەکەویت، ئەبێ تەنها باوەڕت بە ئاینێک و مەزهەبێک هەبێت، ئەبێ وا بکەیت،
گەرنا تۆ دەچیتە دۆزەخ و دەتکەن بە کەباب!
ئەبێ وانان بخۆیت، ئەبێ وا ڕێبکەیت، ئەبێ وا بخەویت، ئەبێ وا پێبکەنیت، ئەبێ وا بگریێیت، ئەبێ ڕەنگی جڵەکان و پێڵاوەکانت و میکابەکەت وابێت، ئەبێ ستایلی ژیانت، هەمووی بە پێی ئەبێ و نابێکان بێت، ئەبێ وا پەرستش ئەنجام بدەیت و نابێت وا کڕنۆش بەریت.
هەر لە یەکەم چرکەساتی لە دایکبوونت و پێخستنە سەر ئەم سەر زەمینە، فرچکت بە ئەبێ ونابێ دەگرنەوە و دنیایەک ئەبێ و نابێ تێکەڵ بە شیری دایکت و خوێن و خۆراک و دەمارەکانت دەکەن.
ئیتر ئەو ئەبێ و نابێیانە تا کۆتایی تەمەنت و خستنە ناوگوڕ، لە دوو قنت نابنەوە؟و هەر لەگەڵت دەمێنمەوە.
ئێستا دوو فریشتەی ترسناک دێن و ئەبێ بەو شێوازە وڵامیان بەیتەوە.
ئەبێ وا دایبی بکەیت، ئەبێ ئەو جۆرە پانتۆل بکەیتە بەر،
ئەبێ تەنورەکەت تا خوار ئەژنۆت بێت، ئەبێ سمێڵ و ڕیشت وابێت.
لێره تۆ لە دایەنگاو باخچەی ساوایانەوە، فێری ئەبێ و نابێ دەکرێیت و بە ئەبێ و نابێکان تەلقین دەدرێیت و لەسەر ئەبێ و نابێ پڕۆڤەت پێدەکرێت.
هەر کەسەو کۆمەڵێک ئەبێ و نابێی لایه و دەبێت لێی وەرگریت و قبوڵی ئەبێ و نابێکانی بکەیت.
وڵاتی ئەبی و نابێ، خێڵی ئەبێ و نابێ،
گەڕەکی ئەبێ و نابێ، حزبی ئەبێ و نابێ، ڕۆژنامە و گۆڤار و ماڵپەڕی ئەبێ و نابێ، چایخانەی ئەبێ و نابێ، پەرستگای ئەبێ و نابێ، باڕی ئەبێ و نابێ، دادگای ئەبێ و نابێ، کتێبخانەی ئەبێ و نابێ، کۆڵانی ئەبێ و نابێ، چێشتخانەی ئەبێ و نابێ، کەبابخانەی ئەبێ و نابێ، نەخۆشخانەی ئەبێ و نابێ، دەرمانخانەی ئەبێ و نابێ، خێزانی ئەبێ و نابێ، خاڵە ئەبێ و مامە نابێ، باوکم ئەبێ و مامۆستا نابێ، شێخ ئەبێ و ئاغا نابێ، حاجی ئەبێ و بەڕێوەبەر نابێ، هونەرمەند ئەبێ و وەزیر نابێ، جەنابی ئەبێ و بەڕێز نابێ، ئارایشتگای ئەبێ و هاوسەرگیری نابێ، جەماعەتی ئەبێ و ژمارە یاسای نابێ،
وەزارەتی ئەبێ و نابێ، ئاواز و میلۆدی و گۆرانی ئەبێ و نابێ، ڕۆمان و شیعر و چیرۆکی ئەبێ و نابێ، کەناڵی ئەبێ و ڕادیۆی نابێ، فرۆشگای ئەبێ و یاریگای نابێ، سەرتاشخانەی ئەبێ و کابینەی نابێ، سیاسەتی ئەبێ و
تەوالێتی نابێ، دیوەخانی ئەبێ و کافتریای نابێ،
وێستگەی ئەبێ و بازگەی نابێ، فەرمانگەی ئەبێ و پارکی نابێ، باخچەی ساوایانی ئەبێ و قوتابخانەی بنەڕەتی تێکەڵاوی نابێ، پەیمانگای ئەبێ و زانکۆی نابێ، کۆلێژی ئەبێ و بەشی نابێ، و وانەی ئەبێ و خوێنەواری نابێ.
ئێره مەملەکەتی ئەبێ و نابێکانە.
لێره نابێ خەونەکانت باس بکەیت،
ئەبێ ئاواتەکانت بکوژیت.
نابێ بە فلان قاچ بڕۆیتە تەوالێتەوە،
ئەبێ بە فیسار دەست نان بخۆیت.
نابێ وا ڕابکشێیت، ئەبێ لەسەردەم پاڵکەویت.
ئەبێ، نابێ، ئەبێ، گوتم نابێ کاکە، ئەبێ، نابێ، ئیلا ئەبێ، بیلا نابێ، ئەبێ، نابێ، گوتم:ئەبێ، نەخێر نابێت.
ئێره کیشوەری ئەبێ و نابێکانە!
لێره مێژووی هەمووی شەڕ و ناکۆکی نێوان ئەبێ و نابێکانە.
دەیان جار مناڵەکان لە گەڕەک لەسەر ئەو ئەبێ و نابێیە
دەمانکرد بەشەڕ، ئەوان دەیانگوت:نابێ لێره پەنارتی لێبدەن، ئێمە دەمانگوت:ئەبێ، نابێ، ئەبێ، نابێ، ئەبێ، سەرەنجام ئەبێ و نابێ دەستیان دەخستە گەرووی یەکتری و شەڕ دەستی پێدەکرد.
لە گەڕەکەکەی ئێمە، پیاوێک لەسەر ئەبێ و نابێ کوژرا.
دوو خێڵ لەسەر ئەبێ و نابێ بوو بەشەڕیان.
:ئێوە سەرەتا ئەبێ سەرەتا داوای لێبووردن بکەن لەسەر ئەوەی جوێنتان بە خێڵەکەی ئێمە داوە، نەخێر ئەوە نابێ هەرگیز،
ئەبێ، نابێ، ئەبێ، نابێ.
ژنێک هەر لەسەر ئەو ئەبێ و نابێیە تەڵاقدرا.
پیاوەکەی سەعات دووی شەو گووتی: هەرئێستا دەمەوێت.
ئەویش گووتی:چاویشت دەربیێت من بەو درەنگەی شەو تاقەتی دانێم نییه و نابێ، ئەبێ، نابێ، ئەبێ نابێ.
بیرمە مناڵ بووم و لەگەڵ هاوڕێ کچەکانم یەکەو گوڵێکمان دەهێناو هەر یەکەو کوڕێکمان دەخستە ناو خەونەکانمانەوەو لە ڕێگەی پەڕەی گوڵەکانەوە بەختی خۆمان تاقیدەکردەوە و دەمانویست بزانین کە ئەو کوڕەی بۆخۆمان داناوەو کەی گەورەبووین ببێت بەهاوسەر و هاوبەشی ژیان و سوارچاکی نێو خەونەکانم، دەهاتین و
گوڵەکانمان دانە دانە هەڵدەوەراندو لەگەڵ هەر دانەیەک دەمانگوت:ئەو کوڕه بۆمن ئەبێت، نابێت، ئەبێت، نابێت، ئەبێت، نابێت، گەر کۆتا پەڕەی گوڵەکە بە ئەبێ بووایه، ئەو دەمانکرد بە قاقا و تلیلی لێدان و چەپڵە کوتان، گەریش نابێ بووایە، بە خەم و نیگەرانییەوە دووبارە بەختی خۆمان لە ڕێگای دوو سێ دانەیتر تاقیدەکردەوە.
هاهاها
ئێرە هەسارەی ئەبێ و نابێکانە!
خودایه:
ئەو هەموو جەهننەم ئەبێ و ژەهر نابێ و قوزەلقورت ئەبێ و بە نەفرەت نابێیانە چین؟
ئێرە ئەبێخانە و نابێخانە!
ئەزانیت چی بەهار گیان؟
ئەبێ کەرێتی بتگرێت و یاخی بیت و جڕتێک و جوتەیەک بەیت لەو هەموو ئەبێ و نابێیە پڕوو پووچ و بێ مانایانە. بەڵێ، ئەبێ وا بکەیت و نەڵێیت نابێ هاهاها
سەروین وای دەگووت.[1]

----
1-هەنار موفتی، شینی شەوان، ڕۆژنامەی هەولێر، ژماره(3720)، 2022/9/14٫ ل10.