تەنیایی هەر پەی خوڎای خاسەن، وەختو تەنیایینە، خەیاڵۍ ئینسانی پەروازکەران، مەیا و ملا. مەولەوی جە تەنیایینە، دیگو دەروونیش، قوڵۍ مڎۊ، ئاڎ پېسە سورمەی سوبحانی بېیەن بە قەقنەس، دەسش بە هیچ کەس و هیچ یاگێ نمەیاوۊ، مەجبوور جە ساقی (زاتو هەققی) داوا کەرۊن، بە جامێ مەی، دەروونش سەردکەرۊوە، پەناچش پەی (نەی ژەنین)، پەی (دەف کوین)، تا بە سەڎای وەش، جە هەر سازێ، گازێ نە دەروون گېران، یوەی یوەی خەمەکاش بەرکەران:
ئېم شەو تەنیا بۍ جەستەی زەبوونم
دیسان سەرواز کەرد، دڵەی پڕ هوونم
خەیاڵانی خام، هاوەردم، بەردم
هاوار جە دەمەی، هەناسەی سەردم!
زوخاو گېج مەدا، دیگی دەرووندا
هووناو هۊرشاناش، جەستەی زەبووندا
ڕەنگا ڕەنگ ڕەنگ، ڕەنگ گوڵگوون هوونم
قرچەی برېشتەی کوورەی دەروونم
چوون دانەی سەر ساج، هۊرئامام جارجار
جە تاوی دووکەڵ، جە شەرارەی نار
سۊزیام هەی سۊزیام، وېنەی شوعلەی نوور
بیم سورمەی سوبحان، ئاوەردەی کۊی توور
من قەقنەس نەویم، ها بیم وە قەقنەس
یەکجاریچ ئېم شەو، ها بەرشیم جە دەس
ئەوەند خەیاڵان، بەردم وە دەروون
پەی دووریی یاران، بەتەر بیم زەبوون
ڕۊ جە شەو فېشتەر، زار و زەلیلم
ساقی! سا جامێ، ئەم جار دەخیلم
بدەر پېم نۊشکەم، چوون هەردەجاران
وە ڕەغمی گردین، گرۊی مەیخاران
شېعری وېم تەنخوای، سەمتوور سازێ
لێدەر، سا نەیچی! هەر تارێش گازێ
چنگ پېکۊ نە جەرگ، نەغمەی سازەکەت
بەربارۊ تۊتۊ، مېقراز گازەکەت
سا دەروېش! کەفێ بدە نە ڕووی دەف
گیان مونتەزېرەن، پەرێ ڕېزەی دەف
موغەننی! لێدەر یەک ئېم شەو سازان
بەشقی ئەو کەسە، تۊش ئاوات وازان
بەڵکە خەمانم، تۊ دەری وە باد
هەیهای جوانم، فرەم هەن مراد
ساقی! سا دەخیل، وە فریادم ڕەس
بە ڕووی نازەوە جام گېرە وە دەس
دەور دەرە وە ناز، چوون هەردەجاران
پېمدەر یەک مەنێ، سەبا و ئێواران
با وەس باڵینم سېڵاوی هوون بۊ
ئامېتەی زوخاو، دیگی دەروون بۊ
وەختەن سەر تا پام، ببۊ وە زوخاڵ
بۊیی سفتەکەم، هۊرگېرۊ شەماڵ
ساقی! ئامانەن، نەشوو جە ویرت
وە فریادم ڕەس تۊ بەشقی پیرت
بەڵ ئېم شەو خەمان، نە دەرۊم وە باد
ساقی گیان! قوربان، خاتر کەرە شاد
بۊ وە وە باعس ئەی نیمگیانی سەخت
سا بەڵکە نەمرۊ، مەعدوومیی بەدبەخت
[1]