سیزدەی ساڵ نوو، سەیر چەمەنان
تورکیان تەرک، نازک بەدەنان
خانم خاتوونان، گیسوو کەمەنان
مەلەک مەحبووبان، حووری حووریان
سەوڵی قامەتان، تەن بلووریان
تەرمەی زەڕبەفت پووش، پېچەکەڵافان
بانوو بەگزادە، نویری سەرافان
ئەتڵەس و مەخمەڵ، کەڵافی زاخان
پووشان پەرێ سەیر گێڵگەشت باخان
ڕەنگ بەسی ڕەنگین، سەر تاکو وە دامان
جەمەن نە سەراوسەر چشمەی خانان
جامەی ئەو ئەتڵەس، تافتەی زەڕین بوو
پووشان پەرێ سەیر سیزدەی ساڵ نوو
نەوبەهار وە کەیف دەماخشان بی
ئیرادەی گێڵگەشت چار باخشان بی
عەقەب عەقەب بی، پاشووپاشوو بی
سەرتاسەر زەمین، چوی دیبای نوو بی
بڕێ بڕێ بی، بڕۊبڕۊ بی
هەرکەس نگا کەرد، دڵ نە گرەو بی
سەیر سەرچشمەی سەراوان کەردەن
ئێوارە وەختی گشت تەشریف بەردەن
خانمان لوان وە ماوای وېشان
هەر سەی یاقوو مەن پەرێ ئاوکێشان
#سەید یاقۆی ماییدەشت# [1]