جە ماددەی دروود پەی تەسهیل کار
باوەڕ بە دەفتەر تەرجومەی ئەفکار
ئەی «دلائل الخيرات» پەیدا کەر
تا نەبی ماتڵ جە سەحرای مەحشەر
مەعلووم چەند حەدیس نەقڵەن نە دروود
هەرکەس بوانۆ مەوینۆ مەقسوود
ئێد کەردن مەعلووم سینف عولەما
هەرکەس بوانۆ دروود با دوعا
بزانۆ مەعناش پڕ دارۆ سەواب
دوعای تەزەڕڕوع خوفیەن موستەجاب
مەئزوونەن هەرکەس بوانۆن دروود
ئینشەڵڵا نائیل مەبۆ بە مەقسوود
بەو شەرت پەی نەبیی و پەی ئال و ئەسحاب
وانۆ بە ئیخلاس «فاتح الکتاب»
چەنی سێ دروود «فاتح الکتاب»
ڕەوان کەرۆ پەی ڕۆح نەبی سەواب
دووەم بەو دەستوور من کەردم تەعریف
فاتیحە و ئیخلاس پەرێ موئەللیف
بکەرۆ هەدیە هەر یەک بە جای وێش
ئەوسا بوانۆ دروود بێئەندیش
مەرووییەن حەدیس شاﮪ ئەنبیا
هەرکەسێ هەر ڕۆز «أسماء الحسنی»
ویردش کۆ مەدام بوانۆ یەک بار
جە «يوم المحشر» ئازادەن جە نار
#فەقێ قادری هەمەوەند# [1]