شای «خيرالبشر» فەخر کائینات
مەنبەع ئەوساف زومرەی مومکینات
ئەسدەقی موتڵەق، «بالحق» و بە حەق
بە یەد ئیعجاز قەمەر کەردی شەق
ڕەفڕەف، بوراقت تا بە لامەکان
چەند هەزار ساڵ ڕاﮪ تەی بی بە یەک ئان
جیبریل مەخلووق، ڕەسووڵ خەللاق
شافیی موزنیبان، وافیی جە میساق
تاوسی قودسیی ئەنوار قودرەت
مەللاح لوججەی نوور مەعریفەت
جە قەترەی جەناح نوورت ئەنبیا
جە زەڕڕەی پڕتە و حوسنت میهر و ما
ئەزەڵ نوور تۆ، تۆ زیا زاتی
ئەبەد خاک و تۆ ئابی حەیاتی
توحفەی ئەزەل و سیڕڕی سوبحانی
حەبیب مەحبووب حەییی ڕەببانی
پەی نوورت سوجدەی ئادەم کەرد مەلەک
شەیدای عیشقی تۆن نۆ کاخی فەلەک
پەی تەسدیق تۆ حەق بەخشان گەوا
«ان هو الا وحی «جە» يوحی»
دەستم دامانت سەیید سەروەر
نیسیانم نەکەی جە سەحرای مەحشەر
ئەر ئەڵتاف وێت وەنەم نەنمانی
نەبی بە شەفیع عەبد عیسیانی
مەسدوودەن تەریق پرد سیراتم
نار جەحیمەن سزای سیفاتم
بەڵ جە سایەی تۆ «عزيز الغفّار»
عەفووم کۆ بە لوتف ڕەهام کۆ جە نار
ڕەحمێ کەر بە حاڵ وەختم بێ وەختەن
ئەعزام موقەییەد عەزاب سەختەن
بناڵ نە دەرگاش «فەقێ» دڵفگار
تا مەدۆت نەجات دارای جیهاندار
#فەقێ قادری هەمەوەند# [1]