داستانۊ گوڵ و بولبولی
بەشۍ شاڼزەهەمە
پاشاو گوڵانی، نە پاو دارەوەنی تەختش بەستەبۍ، بەچە بولبول، جە عەزرەتیۍ جوانی مەعشووقېنە بېهۊش کەوت.
پادشای گوڵان، جە عەینی چەمەن
تەختش بەستەبۍ، نە پای نارەوەن
چوون بەچە بولبول، خەستەی باری خەم
بە ناز و ئیعزاز، یارش دیی وە چەم
پېش نەمەن، هەنیی سەبر و هۊش و فام
کەفت نە یاگەی وېش، بۍ هۊش و سەرسام
ئەگەر، خوڎا، هەقق لېت بستانۊ
عاشق ئەختیار، چوون پېش مەمانۊ
چن وەقت، تۊ جەفای هیجرت کېشا بۊ
دەروونش، وە دەرد دووریی ئېشا بۊ
جامی غوسسەی غەم، زووخاو وەردە بۊ
فیراقی مەعشووق سەبرش بەردە بۊ
چن حەرفی ڕەقیب، چە تانەی ئەغیار
چڼین، سیاسەت، جەفای ڕوزگار
عەزابی گوڵ و جەفا و دەردیسەر
یە گشت کېشابۊ، پەی وەسڵی دوڵبەر
جە بەعدی ئی گشت جەوری بۍ شمار
نەوینۊ وە چەم مەعشووقی نازدار
سا چوون ئەختیار مەمانۊش بە دەست
مەنع کەر، شاڎیی، وەنەت بۊ دەربەست
کەمکەری مەنای عاشڤی دڵڕېش
هەی داڎ، هەی بېداڎ، دەسەڵات نېیەن پېش
عیشق پادشاهەن، گرتەن شاری دڵ
ئەستان، جە عاشق سەبر و تەحەمموڵ
نازەنین جە لای یارش وە گریان
سەبووری و تاقەت، جە دڵ دا، بڕیان
هەنیی، دەرس و پەند نەدارۊ زەروور
سورمە وە دیڎەی کۊر نمەدۊ نوور
غەرەز، من ئەوەند، وەنەم حاڵییەن
پەند، وە عاشق دان، بۍ کەماڵییەن.[1]