#ئاغا عەنایەت#

یەک ڕۊ نیشتەبیم نە گۊشەی زیندان
ڕەنگ زەرد و زایېف تەن لوخت و عوریان
دڵ پەڕ نە زوخاو دەردی پەنهانی
سەر نېیام وە بان کاسەی زرانی
دەس کەمەند کەردم نە دەوری زانۇ
نە دەریای بېپەی هەر باڵ مەشانۇ
قامەت خەمیدە لۇل وەردەن وە هەم
تاویای بۊتەی هەتیتەی ستەم
زەلیل و زگار دڵ پەڕ نە حەسرەت
کەوتەی سۊچېیای نار و زوڵمی سەخت
بۍ قەدر و قیمەت بۍ یار بۍ یاوەر
کەسیف و موحتاج مەبغۇزی نەبەز
ڕەنگم چۇن خەزان پاییزان زەردەن
سەرتاپای تەنم ئالۇدەی دەردەن
هەر دەردەن مەڎۊم وە ڕۇی زەمیندا
هەر ڕۊ دەردێ تەر ها نە کەمیندا
یەک دەم ئاسایېش پەیمان نەمەندەن
هەر ساتێ سەد جۊر گېیان لېمان سەندەن
هەشت ساڵەن وەی تەور نەی زیندانی تار
گرفتاری دەس زاڵم و ئەغیار
غەریب و بېکەس پاشېیای شاران
تەفرەقە و تەقسیم دۇرکەفتەی یاران
ڕەفېقان تەمام یەک جە یەک بەدتەر
غەرقەن نە گېجاو دەریای پەڕ خەتەر
قەومان و خوېشان هەر یەک نە شارێ
هەر یەک گرفتار دەستی ئەغیارێ
ئەوەند زوخاوان زیندانان وەردەن
لوان حەسرەتان وە گڵکۊ بەردەن
چېش واچۇن جەو وەخت نەزعی گېیانکېشان
نە یار نە یاوەر نە قەوم نە خوېشان
هەرچی چەم مەڎان پەرێ خەمخوارێ
کەس دېیار نەبۍ جە هیچ دېیارێ
ئەڵهای فەرزەندان مەکەردەن تاو تاو
دڵ ئەر سەنگ مەبی سەنگ مەبی وە ئاو
وەلحاسڵ وەی تەور نە گۊشەی زیندان
وەبۍ ناز کەفتە تا بەرمەشۊ گېیان
دەم دەم یەک نەفەر حازر مەکەردەن
نەعشی ئەو وە حەبس تاریک مەوەردەن
نەو جا کەفتە بۍ یەک شەوانەڕۊ
تا دوکتۆر بەیۊ تەسدېق بکەرۊ
ئەو سا مەوەردن وە کەناری شار
بۍ قەدر و حورمەت بە وېنەی ئەغیار
یاران عەزیزان گرانەن دەردم
ئینە دیم وە چەم هەر مام نەمەردم
هەر جە ئارۊوە تا عەهدی ئادەم
سەدەمەی وەی سەخت کەس نەدېیەن وە چەم
ئارەزۇم ئېدەن وەی دنیای فانی
قاسیدێ مەحرەم ڕازی نېھانی
باخەبەر نە حاڵ جەمعی زیندانی
بکیانۇن وە لای یارانی گېیانی
سەرگوزەشتەمان تەمامیی یەکسەر
مەنزڵ وە مەنزڵ پېشان دۊ خەبەر
تەفەککور کەردم غەیر جە بای شەماڵ
مەحرەمی ڕازەن حاڵزانی ئەحواڵ
زەحمەتکېش بېیەن پەرێ بەدبەختان
سەفابەخش بېیەن پەرێ زام سەختان
هەر ئەو مەتاوۊ ئەنجام بڎۊ کار
کارش هەر ئېدەن هەر سوب تا ئێوار
تەرەفتولعەینێ دنیا تەی کەرۊ
هەر خەبەرێ بۊ مارۊ و مەبەرۊ
شەماڵ فیدات بام گرانەن دەردم
فەریادڕەسی کەر وەرنە ها مەردم
شەماڵ ئامانەن مەدارا مەکەر
ڕاگەی وڵایەت بگېرە نە وەر
یاخوا وېران بۊ ئەسفەهان تەمام
بېیەن وە دۊزەخ ئېمەی خاس و عام
حەرەکەت بکەر جەی وەر مەکانە
یاخوا بۊ وە جێی باوەقوشخانە
ڕاگەی دلیجان بگېرە نە وەر
مەنزڵگان نەو جا لادێ نیگا کەر
ئەر مەیلی سەیران نەتەنز و کاشان
نە سەری ڕاتەن بویەر نە لاشان
نەو جا وېیەردی منارانی بەرز
بەرق مەڎۊ وە هەم وە سەد هەزار تەرز
مەعسۇمەی قومەن گېرتەنش قەرار
وە زاهېر مەدفۇن وە باتن بېدار
شەماڵ دەخیلەن ئامان سەد ئامان
زەلیل و بەدبەخت دەستم وە دامان
هەر تا مەتاوی نەو جا ساکن بەر
پەی نەجاتمان ئېلتیماس بکەر
مەلجەء و پەنای شاه و دەروېشەن
ئاگا نە ئەحواڵ بېگانە و خوېشەن
پەرێ تەقسیرات زوانم لەنگەن
دەستگیری کەرۊ عەرسەمان تەنگەن
غەریب و بېکەس بېنەوا و فەقیر
بۍ دۇن بۍ جېھەت هەشت ساڵ نە زنجیر
غیرەت هەر لایق وە ئەوان بېیەن
ئومېدی حەیات نە دەس بەرشېیەن
دمای عەرزە و حاڵ مەدارا مەکەر
دۇ ڕا نەو جا هەن خاس تەشخیس بدەر
دەستی ڕاست جادەی شەهری تەهرانەن
ئېشتېبا نەبۊ دەخیل ئامانەن
نە ئەو جا مەویەر ئامان هۊشت بۊ
نەوا ئاسیبێ وە تۊیچ بېیاوۊ
دارولمەظلەمەن قەتڵگای عامەن
مەنبەعی سدۇر حوکم و ئەحکامەن
هەشت ساڵەن تەمام ئېمە بۍ تەقسیر
عەرز و حاڵ مەدەین وە شاه و وەزیر
ئەسڵەن جوابێ پەی ئېمە نېیەن
زوڵمێ وەی سەختی کەی بی کۍ دېیەن
شەماڵ دەسی چەپ جادەی عێراقەن
بگېرە نە وەر تاقەتم تاقەن
مەنزڵ وە مەنزڵ تا سوڵتان‌ئاباد
سەیری وېت کەرە تۊ وە خاتر شاد
نە ڕای هەمەدان حەرەکەت خاسەن
زۇتەر مەیاوی مەسڵەحەت پاسەن
هەر وەخت کە یاوای وە کۊهی ئەلوەند
لادە نیگا کەر بەو سەحرا و دەروەند
هەمەدان یاگەی پەڕ سەفا و سەیرەن
پایتەختی قەدیم شاه و وەزیرەن
نەو جا نیگا کەر پەی کۊهانی بەرز
خەت خەت و ڕەنگ ڕەنگ هەر یەک وە یەک تەرز
کۊی بیستۇنەن نە عالەم بەرزەن
نەقش و نیگارش وە هەزار تەرزەن
مەشهۇری عامەن ئوستادیی فەرهاد
ڕەنجش پەی شیرین یەکسەر شی وە باد
سەیری نەقاشی بیستۇن کەردۍ
ڕەفعی خەستەگیی ڕاگەی دۇر کەردۍ
ڕشتەی شاھۊکۊ وەر نەدەی نەدەس
شەماڵ دەخیلەن تا ئاخر نەفەس
ئەو ڕانمۇنە پەرێ کوردستان
مەیاونۊت بەو جا وە سۇک و ئاسان
نەو جا وېیەردی پەڕاو دېیارەن
نە فەرقش دایېم تەم و بوخارەن
(دایېمولئەوقات) وەفراو جارییەن
بەرز و بڵندەن خاس دېیارییەن
یاگەی کەڵڕەمان میر شکارانەن
مەنزڵگای وەهار شەدەلارانەن
سەختیی کۊی پەڕاو مەشهۇری عامەن
ئەو هەم نە جای وېش ساحېب مەقامەن
تاقەوسان نە پای ئەو نەقشش کنیان
کۆرسی کەیخەسرەو نەو یاگە ژنیان
شیرین و خەسرەو وە شەودېزەوە
تەمام سەرداران شەڕ ئەنگېزەوە
نە وەحش و تېیۇر هەرچی هەن نە عام
کول نەقشش کنیان خولاسەی کەلام
چەشمە و سەراوێ نەو جا جارییەن
شەماڵ نیگا کەر خاس دېیارییەن
سەیرانگای سەییاح تەمامی دنیان
ماچان تەعمیرش هەم تازە کریان
شەماڵ مەویەرە گېیانم فیداتەن
کرماشان نزیک نە سەری ڕاتەن
شارێ قەشەنگەن پەڕ سەفا و سەیرەن
بازاڕ خېیابان مەغازە و دەیرەن
ئەترافاتی ئەو چەشمە و سەراوەن
ئەویچ وە مەسکەن ئېمە حەساوەن
خاس بگېڵ نەو جا سەیرانی وېت کەر
قەوم و ئاشنا باوەر وە نەزەر
ئەر دیت ئەشخاسێ پەی ئېمە کەیلەن
یا خەفەتبارەن باوەفا و مەیلەن
سەفا و سەلامێ ڕەد و بەدەل کەر
سەرگوزەشتەمان پەی ئەو بەیان کەر
بواچە پەنەش حاڵ و باڵمان
سۊچېیای زوڵمەت کۊی زوخاڵمان
جەو دما ئەمری حەرەکەت بدەر
وېت ئاسا بناڵ گېجەلۇلە وەر
ئامانەت فەرزەن دەخیلەن شەماڵ
دېیارەن قەندیل وەیسی یەمەن ماڵ
یاگەی ئومېدەن زیارەتگاهەن
دەستگیری مەزڵۇم پەشت و پەناهەن
سەحرای هۊمەرمل بگېرە نە وەر
داخڵ بە نەو جا بۍ خەوف و خەتەر
عالی مەقامەن بڵندەن پایەش
ڕاحەت کەر یەک دەم تۊ هەم نە سایەش
ئېخلاس-وەرزی کەر وە دیدە و وە گېیان
سێ یەکێ ئومەت وە ئەو بەخشیان
شەماڵ تۊ وەکیل عەرزە و حاڵەنی
هەر چەند وېت شەخسێ پەڕ کەماڵەنی
غەریب و بېکەس دڵ پەڕ نە هېجران
هەشت ساڵ گرفتار حەبسی ئەسفەهان
پیر و زەعیف و هەزار لا بەدبەخت
ژاکېیای دەوران زوڵم و زۊری سەخت
نەحیف و خەفیف مەحرۇم جە دنیا
ڕیشەی زیندەگی سەد ساڵەم کنیا
یەکجار پەشېوەن حاڵ و باڵمان
عالەمش گېرتەن بۊی زوخاڵمان
مەحرۇمی دیدار ئەولاد و دۊسم
وەختەن ئېسخوانم بەرشۊ نە پۊسم
شەماڵ دەخیلەن هەر تۊ هەنی کەس
ئامان دامانش وەر نەدەی نە دەس
عەرز کەر نە خزمەت وەیسی یەمەن ماڵ
سەر تا وە دامان بوین وە کۊی زوخاڵ
دۇدی هەناسەم بەرمەشۊ کۊ کۊ
مەر قرچەی جەرگم نەیاوان وە تۊ؟
مشکڵ گوشادەن پەی کول کەس هەردەم
ڕجالولغەیبەن ئەوتادی عالەم
شەماڵ قوربانت ئېستېغاسە کەر
تا قەوڵ نەسانی نەو یاگە مەویەر
دمای ئېتمینان بوڵند بەر نە ئەوج
سەف ئارایی کەر تیپ تیپ و فەوج فەوج
خیتەی ناو دەرۇن بگېرە نە وەر
چاڵاوە وەبۍ هەور باوەر وە نەزەر
نەو جا نیگا کەر دەشتی مایدەشتەن
سەحرا موسەتتەح ماچی بەهەشتەن
تۊ تۊ و بن وە بن چاڵاو بگېڵە
نەچیرگای سەییاد هەوارگەی خېڵە
قاعېدە و قانۇن کول جە بەین شېیەن
قەدیم یاگەی عەیش خەوانین بېیەن
نەو جا وېیەردی دەشتی ماراوەن
ئەو جە من بەدتەر جەرگش کەواوەن
ئەهالی ماراو عاجز و دڵ ڕېش
ئازیەتبارەن پەی زیندانی وېش
شەماڵ دەستی چەپ فەرامۊش مەکەر
شالیاوان مەحدۇد خاکی ڕوانسەر
ئېسمش مەشهۇرەن بېھتەر ئەملاکەن
پەی مەردانی ئەو جەرگم چاک چاکەن
ئیسە نە زیندان کەوتەن وە بېکار
زەلیل و موحتاج چۇن گەڎای بازار
ئارام و کەم کەم حەرەکەت بکەر
قوللە وە قوللە تا وە ڕوانسەر
شەماڵ چەن ڕۆژێ نەو جا مەکان کەر
بگېڵە پېشدا ئی سەر تا ئەو سەر
ئېڵاخانی بەرز چەشمە و سەراوەن
هەر کەسێ دېیەن جەرگش کەواوەن
یاگەی کەڵڕەمان شکارگای خانەن
ئەلحەق شاموڵکەن بېھتەر مەکانەن
چەند ساڵ نە دەوران دنیای دۇن شېیەن
یاگەی دەبدەبەی ئەردەڵان بېیەن
چەند وەلی نېعمەت چەندێ سەرداران
وە عەیش و عېشرەت دنیا وېیاران
چەند والیزادە نەو جا پەروەردەن
فەڵەک وە ناکام دۇبارە بەردەن
چەندێ نۊکەران چەند فەڕاش باشی
غوڵام و کەنیز چەنی داواشی
چەند سوپا و لەشکەر کۆرس و بەشارەت
فەڵەک وە یەک جا کول دا وە غارەت
ئەوەن نازاران کەفتەن وەبۍ ناز
پەی ئەوان جەرگم مەگېران وە گاز
شەماڵ وە گېیانت فەڵەک خڎېشەن
تا نۊشێ بڎۊ سەد نېش نە جېشەن
بویەرە نەو جا دڵ بی وە کەواو
بشۊ بنۊشە ئاو کانی سوورخاو
بنۊش ئەو شەربەت چەند جام پەیاپەی
شەرتمان ئېدەن یادی ئېمە کەی
پشتە و دەرەوېیان بان زەڕنە تەمام
بگېڵە پېشدا وە مەیل و مەرام
زەڕنە مەشهۇرەن بېھتەر ئېڵاخەن
چەند خان خەوانین پەی ئەو وە داخەن
تەعریف و تەحسین ئەو وەر مەکانە
هەرچی بواچۇن زېیاد مەزانە
خەراجیانەن نەو جا دېیارەن
پەرێ نەعلەی نەی ئازیەتبارەن
دمای سېیاحەت بان زەڕنە کەردی
نەو چەشمە و سەراو ئاوێ سەرد وەردی
چەپ و ڕاست سەیران ئەمڵاکات نەو جا
وەشتەرەن نە سەیر باغی ڕۊح ئەفزا
ملەی لۆن نەو جا باوەر وەنەزەر
چاڵاوەی گەشن بگېرە نەوەر
نە ملەی گەشن سەر باوەر وە بەر
سەیری ئەمڵاکات ڕوانسەر بکەر
چە خاس دڵگیرەن ئەو زێد و ماوا
شەماڵ وە گېیانت جەرگم شکاوا
بویەرە کەم کەم کڵاو وە کڵاو
تا مەشی وە بان چاڵاوەی سوورخاو
چەند خان و ئەمیر نەو یاگە نیشتەن
عەجایب ئاوەن خوا سرۇشتەن
ساتێ ڕاحەت کەر باسەفا و سەیرەن
سەوز و خوڕەمەن یاگەی نەچیرەن
جۊق جۊق کەڵڕەمان مدران وە پاوە
مەیان مەویاران وە لارە ماوە
نەو جا وېیەردی گڵکێ دېیارەن
ئامانەن شەماڵ جەرگم خار خارەن
پەی تۇلی کەلام ئەر تاقەت بارۊ
هەر قولە سەنگێ یەک ئېسمێ دارۊ
ئەو تونکە تونکە یەکسەر هەوارەن
مەنزڵگای عېلەن یاگەی دەوارەن
پەی ڕۊی نەدامەت نە جەمعی مەردم
چەن وەختێ مەنزڵ نەو جاگە کەردم
ئیسە هەر ئەو فېکر ئەو خېیاڵ ئەو خاو
سۊچنان جەرگم کەردەن وە کەواو
نە ویر نمەشۊ تا وە ڕۊی مەردەن
دین و ئیمانم جە دەسم بەردەن
بەدبەختی بەختەن شەماڵ گېیانی تۊ
وەر نە من جە کۊ ئەسفەهان جە کۊ
دەس مەدەر نە زام گشت گېیانم خەستەن
عەقڵ ڕای تەقدیر هیچ وەخت نەبەستەن
شەماڵ مای میرەن جە حەد بەرشېیەن
شکارگای قەدیم حکۇمەت بېیەن
ڕاحەت کەر نەو جا یەک شەوانە و ڕۊ
تەمام سەیران کەر خاکی جوانڕۊ
شەماڵ هۊشت بۊ گېیانم فیداتەن
سەراوگەڕ نەو جا نە چېری پاتەن
ئامانەن دەخیل چېش مەکەری پېم
ها وەختەن ئایېر یەکجار بشۊ لېم
حوبولوەتەنەن نېسفولئیمانەن
فەرمۇدە و تەسدېق پېغەمبەرانەن
تا سەیری شاھۊ تەمام نەکەری
تەشریف وە دېھات پاین نەوەری
مای میرەن بەرزەن سەفا ماوەرۊ
نیگا کەر نەو جا تا چەم کار کەرۊ
هەر جا مەیلت هەن یەکسەر دېیارەن
ئەر سەحرا و دەشتەن ئەگەر کۊسارەن
ئای شەماڵ یەکجار گرانەن دەردم
چەند شەوان نەو جا وە ڕۊ ئاوەردم
چەنی چەند سەییاد ڕەفېقی خۆش خۇ
کارم هەر ئېد بی هەر شەو تا وە ڕۊ
سەحەر ھۊرېزە نە ئەو سەر کڵاو
تەشریف بەر وە بان کانییەکەی مەڕیاو
ئاوی حەیاتەن جامێ بنۊشە
وە گېیانت شەماڵ قەلبم بېھۊشە
ئاخېزکەر نەو جا کەل بەورەوارەن
گوزەرگای عېلەن ڕاگەی هەوارەن
چەند ماجەمینان نەو جا وېیەردەن
چەنێ نازاران حەسرەتان بەردەن
چەند خان خەوانین ئامان و شېیەن
کۊچ و تەڵمیت بار ڕەنگینش دېیەن
بویەرە نەو جا سێخڕان تەی کەر
شانشینەکە باوەر ئەو نەزەر
شانشینەکەی ساناو مەشهۇرەن
پەی تۊ نزیکەن پەی ئېمە دۇرەن
شەماڵ نیگا کەر هەوارێ وەشەن
نیشتەن نەو یاگە تەمام دڵکەشەن
بنیشە نەو جا باسەفا و بەرزەن
سەیران نە ئەو جا وە هەزار تەرزەن
بەردی کەشکانەن نە ئەو یاگەی بەرز
مەنزڵگای شەوەن وەختی کەڵەهەرز
چگاکی ساناو مەعرۇفەن نەو جا
بەرز و قەشەنگەن پەرێ تەماشا
کانی هەمرۊئی نە سەری ڕاتەن
سەرکېشی کەرە گېیانم فیداتەن
چاشتەوەر نەو جا چە خاس دېیارەن
هەمیشە و دایېم پەڕ نە شکارەن
کەلی کۊلیجۍ یاگەی هەواران
باسەفا و سەیرەن جاگەی شکارەن
مەنزڵگای شەو بۍ نە وەختی شکار
مەگېڵاین پېشدا دېیار وە دېیار
چەند وەختێ نەو جا وە عەیش و عېشرەت
چەنی ڕەفېقان مەکەردم سوحبەت
کەلی تفەنگچی و تەڵاش نیگا کەر
شەو مەنزڵگامان باوەر وەنەزەر
بڎیە ئاساری ئېمە نەمەنەن
یەکجار هەر ئېدەن گېیان جە من سەنەن
شەماڵ یانە گشت بدەر دماوە
بشۊوە خدمەت پیرخدری شاوە
یاگەو مەقامش عالییەن نەو جا
مەشهۇرەن قەدیم وە ساحېو پەنا
مەواچان پیری هەزار ماڵ جافەن
فەریادڕەس بېیەن هەم سینە سافەن
باپیرەی جاف و جوانڕۊ بېیەن
ئیسە ئەولادش گشت زەبۇن بېیەن
ئەسیرکېش کریان وە شارانەدا
تەفرەقە کریان وە زیندانەدا
سەر گوزەشتەمان تەمام بەیان کەر
شەماڵ دەخیلەن بگېرەش کەمەر
واچە هەشت ساڵە غەریب و بېکەس
زەلیل و بەدبەخت نېیەن فریادڕەس
باپیرەمانەن پەی کەی پەرێ چېش
هەرتا مەتاوی تەعنە بدەر لېش
ئامانەن شەماڵ نە ویرت نەشۊ
کافییەن وەسەن ڕەحمش بجۊشۊ
دمای عەرز و حاڵ نەو جا نیگا کەر
چەپ و ڕاس یەکسەر باوەر وە نەزەر
تەمام دېیارەن کۊساران جە دۇر
داڵەهۊ، بەمۊ دەشتی شارەزۇر
هەورامان، پاوە وە ئاتەشگاوە
شمشېر و سەریاس قشڵاخ تا شاوە
گەرمەزناوەن چەنی ماکوان
جە نەزەرگاتەن یەکسەر سەراوان
ساراوەن چەنی بەنیگەز وەشەن
چەشمە و سەراوش تەمام دڵکەشەن
جوانڕۊ تەمام نە سەری ڕاتەن
بگېڵە پېشدا گېیانم فیداتەن
دمای سېیاحەت قەدەم ڕەنجە کەر
ڕاگەی نیگاگار بگېرە نە وەر
شانی وەزیمە تا کەوە شیروان
ڕاخېز وە ڕاخېز دەسم وە دامان
بڎیە کەڵڕەمان نەو جا چېش کەران
جۊق جۊق و فەوج فەوج مەیان مەویەران
مەویەرە ئامان بنی بەرد وە بەرد
مەخسۇسەن وەشەن سەیری هەوشەزەرد
کەورگی تفەنگچی ئەسڵی مەکانەن
یاگەی زەمرەمەی ڕەئیس و خانەن
مەنزڵگای قەدیم سەییادان بېیەن
هەر وېش مەزانۊ چەند کەسش دېیەن
ئېمەیچ چەند ڕۆژێ نە عەهدی وېمان
ڕەئیس و مەڕئۇس ئېد بۍ خڎېمان
وەلحاسڵ چەند وەخت وە کامەرانی
چەنی ڕەفېقان یارانی گېیانی
شەوان تا وە ڕۊ وە سەر مەوەردین
زەمزەمە و مەزاق شکار مەکەردین
بۍ خەف و خەیاڵ بۍ ئەندېش نە کەس
لاقەید جە تەقدیر فەردی فەریادڕەس
چەرخی چەپ ناگاه چەرخش وست ئەو کار
ناغافڵ پېچاش بە وېنەی تۊمار
شەماڵ بویەرە دەردی دڵ بېشەن
ئەر شا ئەر وەزیر ئەگەر دەروېشەن
جوانڕۊ وەشەن بېھتەر وڵاتەن
شەماڵ دەخیلەن گېیانم فیداتەن
مەکان وە مەکان بگېڵە پېشدا
یاگەی کۍ بېیەن کۍ گېڵۊ تېشدا
چەشمە و سەراوان یەک یک بگېڵە
گشت یاگەی خانان مەنزڵگای خېڵە
ئاخېز کەر پەرێ دەشتی ھەسېران
پەی سەیری کاوات یاگەی ئەمیران
نیگا کەر کاوات ئاوش چەند سەردەن
گرەوش نە ئاو کول دنیا بەردەن
قوڕەقەڵا بڎیە ئاوش زەڵاڵەن
شەماڵ بنۊشە نە تۊ حەڵاڵەن
چەمە میرانەن یاگەی سەرداران
هەوارگە و مەنزڵ وەختی وەهاران
بېڵەگی خەیلێ نە ئەو وەشتەرەن
پەی هەر دۇ، قەلبم پەڕ جە نەشتەرەن
چەمە میرانەن سۊچنان جەرگم
بېیەن وە باعېس نەزدیکیی مەرگم
چەمە میران بۍ مەرکەزی شکار
یاگەی عەیش و نۊش مەخسۇسەن وەهار
هەوارێ وەشەن یەکجار باسەفان
عەیبش هەر ئېدەن دنیا بېوەفان
ئایشەدۊڵ تەی کەر تا وە دارۊمەرد
بانی تۇوان و شیریدەر بگەرد
ملە و دەشتی گەڕ بگېرە نە وەر
بېیاشۆش سەرۆ تا وە سەراوگەڕ
هەوارگەی پشتگەڕ سەنگلاخ و سەختەن
گا گا مەنزڵگای بەندەی بەدبەختەن
هەر چەن نە ئەنزار نازیبا و زشتەن
شەماڵ وە گېیانت پەی من بەهەشتەن
ئېسراحەت بکەر نەو چەشمە و سەراو
ئامانەن دەخیل جەرگم بی کەواو
دمای ڕاحەتی قەدەم ڕەنجە کەر
وېرانەکەی من بگېر ئەو نەزەر
داخڵ بە نەو جا خەستەگی دەرکەر
خاس دېققەت بدەر مەلاحېزەش کەر
وېرانەکەی من نە پای ئەودارەن
مەنزڵگای قەدیم لەیل و نەهارەن
داروەنێ نەو جا گېرتەنش قەرار
عومرش زېیادەن نەدارۊ شومار
سەر بکېش نەو جا بزان کۍ مەنەن
یاگەی کۍ بېیەن ئیسە کېش چەنەن
[1]