ئاژەڵداری جە هۆرامانەنە
ئەوەنویستەی و دەسکاریکەردەی: ئەسعەد ڕەشید
بەشۍ پەنجەمە

هەڵیزە:
هەڵیزە، پۊسو(مەیۍ یان بزۍ)، کە ساق بۊنەو هۊرنەدڕیابۊ و ۋڵ ۋڵ نەکریابۊ، خوری یان موەکاش کەناوەو ئینجا بە چن دەرمانێ دەباخی، وەشش کەران، دمای ماوێ کەمی، ماسش چەنە ژەنیۊ.
هەڵیزە، پېویسیش پی ئامرازا هەن:
دەسەڵقوت:
دوېنۍ، یۊشا وەرۆ، یۊشا دماوە. ئانەو وەری سەرێش بەسیۊن بە هەنگۊڵ(سەر) و هەڵیزەکېوە، ئەویتەرشان، هەرپاسە، بەستەکەیچشا بە هۊ و کاشیبەڼیۆن.
کاشیبەڼ:
ڕېڵەخوێ حەیوانینۍ، وەشېکریاو فرە پتەوېنۍ و دېر بڕیا.
بەرەبین:
بەڼێن، بەسیۊن دلېڕاسەو دەسەڵقوتو وەرینیۆ و قایېم کریۊن، دەمو هەڵیزەکېش پەنە بەسیۊن.
وەرېسە:
پەتێ قاییمەنە،جە موو بزۍ وەشکریۊن، پەی بەستەیۆ هەڵیزەکۍ بە یەرەپاکەیۆ بەکارمێ.
سېپا:
یەرۍ دارۍ درېژ و ڕاسۍ، کە درېژیشان دوۍ گەزۍ یان زیاتەرەن، دلېڕاسەنە بە وەرېسەکۍ مەبەسیان یۊترینیۆ و چیلاوچۆلاوە سەرەکېشا شۊڕېباوەو هەڵیزەکېشا بە دەسەڵقوتەکاوە پۆوە بەسیۊ، پا جۊرە هەڵیزەکۍ هۊرمەواسیۊن، بە ئاردەی و بەردەی پەی وەری و دمای، ماسو دلۍ هەڵیزەکۍ بۊ بە دۊ، دماتەر کەرەکۍ جە دۊکەی جیامەکەراوە. کەرەکۍ گلېرەمەکەراوەو بە گەرمکەردەی کەراش بە ڕوەن، ڕوەنەکەی دلۍ (خیگە)ینە هۊرگېران، جە دۊکەیچ کەشکی و دوخەوا کەران.[1]